မဲခေါင်၊ မတ် ၆
၂၀၁၁ ခုနှစ်မှာ ထိုင်းနိုင်ငံရဲ့ ပထမဆုံးအမျိုးသမီး ဝန်ကြီးချုပ်ဖြစ်လာခဲ့ပေမယ့် ၂၀၁၄ စစ်အာဏာသိမ်းမှုမှာ ပြည်ပကို ထွက်ပြေးတိမ်းရှောင်ခဲ့ရတဲ့ ယင်းလတ်ရှင်နာဝပ်တရာကို ဝန်ကြီးချုပ်ဖြစ်စဉ် အစိုးရပိုင်ငွေ မတော် မလျှော်လွှဲပြောင်းပေးအပ်မှုနဲ့ တရားစွဲဆိုထားမှုကို ပြန်လည်ပယ်ဖျက်ပေးခဲ့ကြောင်း မတ် ၄ ရက်နေ့က ထိုင်း တရားရုံးချုပ် အတည်ပြုထုတ်ပြန်သွားပါတယ်။
တရားရုံးချုပ် နိုင်ငံရေး ရဇဝတ်မှု မှုခင်းဌာနခွဲကနေ ယင်းလတ်ကို အမှု ပလှပ်ပေးကြောင်း ထုတ်ပြန်ကြေညာ ရာမှာ ၂၀၁၃ ခုနှစ်က ယင်းလတ်အစိုးရအဖွဲ့ဟာ ဘတ် သန်း ၂၄၀ (ဒေါ်လာ ၆ . ၇ သန်း) ကို အစိုးရ စီမံကိန်း အခြေခံအဆောက်အအုံလုပ်ငန်းမှာ မီဒီယာကြီး နှစ်ခုဆီ လုပ်ကွက်ကို မျက်နှာလိုက်ချပေးခဲ့တယ်ဆိုပြီး တရားစွဲခဲ့တာဖြစ်ပါတယ်။
ဒါပေမဲ့ ကိုယ်ကျိုးစီးပွားအတွက် အသုံးပြုခြင်းမရှိခဲ့သလို ဒီစီမံကိန်းကလည်း စည်းကမ်းတကျ အောင်မြင် ပြီးစီးသွားခဲ့ပြီဖြစ်လို့ စွဲဆိုထားတဲ့ အမှုကို ရုပ်သိမ်းလိုက်တာဖြစ်တယ်လို့ ဖော်ပြ ပါရှိခဲ့ပါတယ်။
ဒါပေမဲ့ ၂၀၁၇ ခုနှစ်ကတည်းက ပြည်ပြေးလုပ်ခဲ့တဲ့ ယင်းလတ်ကို အငြင်းပွားဖွယ်ရာ ဆန်ဖြန့်ဖြူးခွဲဝေပေးမှု စွဲချက်နဲ့ ထောင်ဒဏ် ၅ နှစ်ချမှတ်ထားတာကို ပယ်ဖျက်ကြောင်း မပါရှိတဲ့အတွက် ယင်းလတ်ဟာ သူ့ အစ်ကို သက်ဆင်လို ပြည်တော်ပြန်လာပြီး အရင်ဆုံးထောင်ဒဏ်ကျခံပြီးမှ ဘုရင့် လွတ်ငြိမ်းချမ်းသာခွင့်နဲ့ ပြန်လည် လွတ်မြောက်လာမှာဖြစ်တယ်လို့ သိရပါတယ်။
သက်ဆင်ဟာလည်း ၂၀၀၆ စစ်အာဏာသိမ်းမှုမှာ ပြည်ပြေး ဘ၀ ရောက်ခဲ့ရပြီး ထောင်ဒဏ် ၈ နှစ်ချမှတ်ခံထားရပေမယ့် သမီးဖြစ်သူရဲ့ ဖွေထိုင်းပါတီက အစိုးရဖွဲ့ပြီး ဝန်ကြီးချုပ် တင်မြှောက်နိုင်ပြီးနောက်မှာ ပြည်တော်ပြန်ဝင်လာပြီး ထောင်ဒဏ် ၆ လသာ ဆေးရုံးပေါ် အကျယ်ချုပ်အဖြစ် ခံယူရင်း လွတ်ငြိမ်းခွင့်နဲ့ ပြီးခဲ့တဲ့လက လွတ်မြောက်သွားခဲ့သူဖြစ်ပါတယ်။
ထိုင်းနိုင်ငံမြောက်ပိုင်းမှာ ဩဇာအကြီးမားဆုံးဖြစ်တဲ့ သက်ဆင်ရဲ့ ဖွေထိုင်းပါတီနဲ့ နှစ်ပေါင်းများစွာ ပဋိပက္ခ အသွင်ဆောင်ခဲ့တဲ့ ထိုင်းဘုရင်မျိုးနွယ်ထောက်ခံ စစ်တပ်နဲ့ ရှေးရိုးစွဲနိုင်ငံရေးသမားတွေအကြား လက်ရှိအချိန်မှာ ပြန်လည်ပေါင်းစည်းမှုအဖြစ် သက်ဆင်ကို လွှတ်ပေးခဲ့တာဖြစ်သလို ယင်းလတ်ကိုလည်း ဒီလမ်းစဉ်အတိုင်း ပြန်လွှတ်ပေးခဲ့တာဖြစ်တယ်လို့ ထိုင်းနိုင်ငံရေးလေ့လာသူတွေက သုံးသပ်နေကြပါတယ်။
ဒါ့အပြင် ပြီးခဲ့တဲ့ ရွေးကောက်ပွဲတုန်းက မဲအများဆုံးအနိုင်ရခဲ့တဲ့ ဖိထာရဲ့ Move Forward ပါတီရဲ့ ဩဇာလွှမ်းမိုးမှုကို တားဆီးနိုင်ဖို့ သက်ဆင်မိသားစုရဲ့ ဖွေထိုင်းနဲ့ ရှေးရိုးစွဲ စစ်ဘက်ဆိုင်ရာ အကြီးအကဲတွေ ပေါင်းစည်းနေတာဖြစ်ကြောင်းလည်း သုံးသပ်မှုတွေ ရှိနေခဲ့ပါတယ်။
Ref: thediplomat
MKF-001
