မဲခေါင် မေ ၂
တအာင်း TNLA တပ်သားတွေ မွေးနေ့ပါတီမှာ တားမြစ်ထားတဲ့ မြန်မာဘီယာဝယ်ယူ သောက်သုံးပြီး ကျင်းပခဲ့လို့ ကြိမ်ဒဏ်(၁၀)ချက်နဲ့ ထောင်ဒဏ်(၁)လအပြင် လူမှုရေးပြစ်ဒဏ်ဖြစ်တဲ့ အများပိုင်ဆေးရုံ၊ ဘုန်းကြီးကျောင်း သန့်ရှင်းရေး လုပ်အားပေးစေခဲ့တယ်လို့ PSLF/TNLA ရဲ့ သတင်းနဲ့ ပြန်ကြားရေးဌာနက သတင်းထုတ်ထားပါတယ်။
နမ့်ခမ်းဒေသခံတစ်ဦးက “ မွေးနေ့ပါတီမှာ TNLA တပ်သားတွေနဲ့ တခြားသူတွေ မြန်မာဘီယာသောက်နေတဲ့ပုံတွေ အွန်လိုင်းမှာ ပျံနှံနေပြီး အရေးယူခဲ့တာနဲ့တူတယ်” လို့ပြောပါတယ်။
PSLF/TNLA ထိန်းချုပ်နယ်မြေဖြစ်တဲ့ မြို့ (၇) မြို့ နဲ့ စစ်ဒေသတွေမှာ စစ်ကောင်စီ ထုတ်ကုန်ပစ္စည်းတွေ ရောင်းဝယ်စားသုံးနေတဲ့ သူ တွေ တွေ့ရှိပါက ထုတ်ပြန်ချက်ပါ အမိန့်အတိုင်း အရေးယူသွားမှာဖြစ်တယ်လို့ ထုတ်ပြန်ထားပြီး သယ်ယူရောင်းချနေတာတွေကိုလဲ ဖမ်းဆီးတာတွေရှိတယ်လို့ သိရပါတယ်။
ပြီးခဲ့တဲ့ ၂၀၂၁ခုနှစ်၊ ဇွန်လ (၁၅)ရက်ရက်ကစ PSLF/TNLA အနေနဲ့ စစ်ကောင်စီ ထုတ်ကုန်ပစ္စည်းတွေ ရောင်း၀ယ်စားသုံးခြင်းမပြုရန် အမိန့်ထုတ်ပြန်ခဲ့တာ ဖြစ်ပြီး အဲဒီ အမိန့်ထုတ်ပြန်ချက်အတိုင်း တားမြစ်ကုန်ထုတ်ပစ္စည်း ရောင်းဝယ်သူတွေကို တွေ့ရှိပါက သတိပေးပြုလုပ်ပြီးမှ ထုတ်ကုန်တွေကို ရောင်းချတဲ့ ဆိုင်ရှင်တွေနဲ့ အများပြည်သူရှေ့မှောက်တွင် ဖျက်ဆီးခဲ့တယ်လို့ သိရပါတယ်။
MK 008
