မဲခေါင်၊ ဧပြီ ၅
Move Forward Party (MFP) ခေါင်းဆောင်လွှတ်တော် အမတ် ရမ်ဆီမန်ရုမ်းက ထိုင်းအစိုးရဟာ နိုင်ငံတွင်းဩဇာကြီးတဲ့ စစ်ဘက်၊ အရပ်ဘက်ခေါင်းဆောင်တွေအကျိုးစီးပွား မြ၀တီဘက်က ကာစီနိုနဲ့ ကျားဖြန့်လုပ်ငန်းတွေကို တိုက်ဖျက်ဖို့အရေး ပျက်ကွက်နေတယ်လို့ အောက်လွှတ်တော် အထွေထွေ စကားစစ်ထိုးပွဲ (General Debate ) မှာ ဝေဖန်ပြောဆိုသွားပါတယ်။
မင်းအောင်လှိုင်နဲ့ရင်းနှီးပြီးလက်နက်ပွဲစားလုပ်နေသလို မူးယစ်ဆေးဝါးလုပ်ငန်းနဲ့ ငွေကြေးခဝါချတဲ့ ထွန်းမင်းလတ်အမှုကို တင်ပြဖော်ထုတ်ခဲ့သူ ရန်ဆီမန်ရုမ်းက အခုလည်း ထိုင်း စစ်ဘက်၊ အရပ်ဘက် ထိပ်တန်း ပုဂ္ဂိုလ်တွေဟာ မြန်မာနိုင်ငံဘက်ခြမ်း မြ၀တီမြို့က ကာစီနိုလုပ်ငန်း အနည်းဆုံး ၁၇ ခုမှာ စီးပွားရေးပါတနာအဖြစ် ပါဝင်ထားတယ်လို့ ပြောပါတယ်။
ဒီကာစီနိုလုပ်ငန်းအားလုံးဟာ ကျားဖြန့်လုပ်ငန်းတွေနဲ့ ကွန်ရက်ဆက်နွယ်နေတာ ဖြစ်ပြီး ခုထိ အင်တာနက်နဲ့ မိုဘိုင်းဖုန်းဆစ်ဂနယ်တွေကို ဒုစရိုက်လုပ်ငန်းတွေမှာ ဆက်ပေးသုံးထားဆဲဖြစ်တယ်လို့ ဆိုပါတယ်။
ဒီပတ်သက်မှုတွေကြောင့်ပဲ မြ၀တီဘက်က ကျားဖြန့်လုပ်ငန်းတွေ တိုက်ဖျက်ရေးမှာ အစိုးရဘက်က တာဝန်ပျက်ကွက်နေတာဖြစ်တယ်လို့ ပြင်းပြင်းထန်ထန်ဝေဖန်သွားပါတယ်။
ရမ်ဆီမန်ရုမ်းရဲ့ ပြောဆိုမှုမှာ လက်ရှိအစိုးရနဲ့အနီးစပ်ဆုံးရှိတဲ့ ရဲချုပ်ဟောင်းတစ်ဦးဟာ Myawaddy Complex ပိုင်ရှင်ဖြစ်ကြောင်း၊ နောက် မြ၀တီကာစီနိုရုံဖြစ်တဲ့ Sky Complex ကိုလဲ ထိုင်း ဒုရဲမှူးဟောင်းက ပိုင်ဆိုင်ထား ကြောင်း၊ Eastern Complexကို ကျားဖြန့်ဒုစရိုက်သမားအဖွဲ့က ပိုင်ဆိုင်ကြောင်း၊ နောက် ကာစီနိုတစ်ခုကို ထိုင်း ကာကွယ်ရေးဝန်ကြီးဌာန အမြဲတမ်းအတွင်းဝန်ဟောင်းက ပိုင်ဆိုင်ထားတယ်လို့ ဆိုပါတယ်။
ဒါကြောင့်ပဲ ထိုင်းအစိုးရဟာ မြ၀တီ က ကျားဖြန့်လုပ်ငန်းတွေကို တိုက်ဖျက်ဖို့အရေး တာဝန်ပျက်ကွက်နေတာဖြစ်တယ်လို့ ပါရှိခဲ့ပါတယ်။
မြန်မာနယ်စပ်ဘက်က ကျားဖြန့်လုပ်ငန်းတွေဟာ ထိုင်းနိုင်ငံနဲ့ ကမ္ဘာတစ်လွှားနိုင်ငံတွေကို ဆိုးရွားစွာ နစ်နာ ထိခိုက်စေရာမှာ ၂၀၂၀ ပြည့်နှစ်က ထိုင်းနိုင်ငံသားတွေဆီ လိမ်လည် ခေါ်ဆိုတဲ့ Scam Calls ၁ . ၇ သန်းကျော် သာရှိခဲ့ရာက ၂၀၂၂ ခုနှစ်မှာ ၁၀ ဆတိုးပြီး ၁၇ သန်းအထိ ခေါ်ဆိုလိမ်လည်ခံရမှုမှာ ထိုင်းဝန်ကြီးဌာနတစ်ခုရဲ့ တစ်နှစ်စာ ဘတ်ဂျက်လောက်ရှိတဲ့ ဘတ် သန်း ၅၀ ဘီလီယံအထိ လိမ်လည်ခံယူခဲ့ရတယ်လို့ ရမ်းဆီမန်ရုမ်းက ဆက်လက်တင်ပြသွားပါတယ်။
ထိုင်းအစိုးရအနေနဲ့ တရုတ်နဲ့ မြန်မာစစ်ကောင်စီ ပူးပေါင်းတိုက်ဖျက်သလို ကျားဖြန့်လုပ်ငန်းတွေကို အားစိုက်တိုက်ဖျက်သွားသင့်တယ်လို့ပါ ရမ်ဆီမန်ရုမ်းက ဝေဖန်တိုက်တွန်းသွားပါတယ်။
Ref: bangkokpost
MKF-001