မဲခေါင်၊ ဧပြီ ၂၄
ဧပြီ ၂၂ ရက်နေ့မှာ ထိုင်း-မြန်မာ နယ်စပ်၊ တာ့ခ်ခရိုင် ကျန်းမာရေးဝန်ကြီးဌာန အကြီးအကဲ ဒေါက်တာ ချွန်နန်ဆရီ ကရူးဟာ တာဝန်ရှိသူတွေနဲ့ မဲဆောက်တကျောက ဆေးရုံတွေကို လိုက်လံကြည့်ရှုစစ်ဆေးပြီးနောက် အခြေအနေ တွေကို ကြိုသိ၊ ကြိုပြင်ဆင်ထားခဲ့လို့ လိုအပ်ချက်မရှိ ကုသပေးနိုင်ခဲ့ကြောင်း မီဒီယာတွေကို ရှင်းလင်းပြောကြား သွားပါတယ်။
ဧပြီ ၂၀ ရက်ကနေစပြီး မြ၀တီမြို့တိုက်ပွဲကြောင့် မဲဆောက်ကို ရောက်လာတဲ့ ဒဏ်ရာရသူပေါင်း ၁၁၃ ယောက် ရှိခဲ့ကာ မဲဆောက်ဆေးရုံကြီးမှာ အများအပြားကို ကုသပေးခဲ့သလို ဒေသတွင်း တခြားဆေးရုံများစွာကိုလည်း ပို့ဆောင်ကုသမှုတွေ လုပ်ပေးနိုင်ခဲ့တယ်လို့ ဆိုပါတယ်။
အသေးစားဒဏ်ရာရသူတွေများလို့ အများစုက ဆေးရုံးတွေကနေ ပြန်ဆင်းသွားကြပြီဖြစ်ပြီး မဲဆောက်ဆေးရုံကြီးဟာ ဖြစ်လာနိုင်တဲ့ အခြေအနေတွေကို ကြိုတင်သိရှိပြင်ဆင်ထား နိုင်လို့ ဆရာဝန်၊ သူနာပြု၊ ဆေးပစ္စည်း အားလုံး လိုလေသေးမရှိ ကောင်းမွန်စွာ ကိုင်တွယ်ဖြေရှင်းနေနိုင်ဆဲလို့ ဒေါက်တာ ချွန်နန်ဆရီကရူးက ပြောကြားသွားပါတယ်။
မဲဆောက်ဆေးရုံကြီးမှာသာ လက်ခံကုသနေတာမဟုတ်ဘဲ စစ်ရှောင်ဒုက္ခသည်စခန်းတွေအထိပါ ကွင်းဆင်းကူညီ တဲ့ ဆေးအဖွဲ့လည်း စေလွှတ်ခဲ့ပြီး လူစုလူဝေးမှာ ကူးစက်ရောဂါတွေ မပျံနှံ့ဖို့လည်း စီစဉ်ကြပ်မတ်ပေးခဲ့တယ်လို့ ဆိုပါတယ်။
မဲဆောက်ဆေးရုံကြီးမှာ ဧပြီ ၂၀ ရက်နေ့ညက တစ်ပြိုင်တည်း ၂၂ ယောက် ဒဏ်ရာတွေနဲ့ ရောက်ရှိ လာပေမယ့် ပုံမှန်အစီအစဉ်တွေအတိုင်း ကိုင်တွယ်ကုသပေးနိုင်ခဲ့လို့ သိရပါတယ်။
၄၁ ယောက်က ခွဲစိတ်ကုသမှု ခံယူခဲ့ရ ပေမယ့် မဲဆောက်ဆေးရုံကြီးဟာ လက်ရှိ ပုံမှန် နေ့စဉ် ဖျားနာ၊ ဒဏ်ရာရ လူနာတွေကို အခက်အခဲမရှိ ဆက်လက် ကုသပေးနေနိုင်ဆဲဖြစ်တယ်လို့ ချွန်နန်ဆရီကရူးက ရှင်းလင်းပြောကြားသွားပါတယ်။
Ref: amarintv
MKF -001
