မဲခေါင်၊ ဧပြီ ၂၆

ရှမ်းပြည်အရှေ့ပိုင်း၊ တာချီလိတ်မြို့နဲ့ ထိုင်းနိုင်ငံမြောက်ပိုင်း မယ်ဆိုင်မြို့ကြား နယ်နိမိတ်အဖြစ် စီးဆင်းနေတဲ့ မယ်ဆိုင်ချောင်း ရေကြီးရေလျှံမှုကို ကြိုတင်ကာကွယ်နိုင်ရန်အတွက် အသိပေးစက် တပ်ဆင်နိုင်ရေး ထိုင်းနိုင်ငံက လာရောက်လေ့လာနေတယ်လို့ သိရပါတယ်။

နှစ်စဉ်လိုလို ရေကြီးရေလျှံမှုဖြစ်ပွားတတ်တဲ့ မယ်ဆိုင်ချောင်းရဲ့ မြန်မာနိုင်ငံဘက်ခြမ်းက ရပ်ကွက်၊ ကျေးရွာအုပ်စုနေရာတွေမှာ အလို အလျောက် ကြိုတင်အသိပေးစက်တွေ တပ်ဆင်ပေးထားခြင်းဖြင့် ကြိုတင်ကာကွယ်နိုင်မယ်လို့ ဆိုပါတယ်။

“ထိုင်းဘက်က နည်းပညာနဲ့စက်ကိရိယာတွေ ပံ့ပိုးပေးမယ်၊ မြန်မာဘက်က ထိန်းသိမ်းစောင့်ရှောက်ဖို့နဲ့ လိုအပ်တာတွေ ညှိနှိုင်းလုပ်ဆောင်သွားဖို့ ဆွေးနွေးကြတာပါ” လို့ ထိုင်းဘက်လေ့လာရေးအဖွဲ့ကို ကူညီပေးတဲ့ မြန်မာနိုင်ငံသားတစ်ဦးက မဲခေါင်ကို ပြောပါတယ်။

မယ်ဆိုင်ချောင်းဟာ မိုင်းဆတ်မြို့နယ်မှာ မြစ်ဖျားခံပြီး အနောက်က အရှေ့ကို ၃၈ မိုင် စီးဆင်းနေပြီး မိုင်းဖြတ်မြို့နယ်မှာ ဖြစ်ဖျားခံတဲ့ မယ်ဟုတ်ချောင်း ဟာ မြောက်ကတောင်ကို ၃၁ မိုင်နဲ့ လွယ်တော်ခမ်းအုပ်စု၊ ဖလဲတောင်ခြေမှာ မြစ်ဖျားခံတဲ့ မယ်ခေါင်ချောင်းဟာ ၃၅ မိုင်၊ တရုတ်နိုင်ငံမှာ ဖြစ်ဖျားခံပြီး မြန်မာ-လာအို နယ်နိမိတ်တစ်လျှောက် စီးဆင်းနေတဲ့ မဲခေါင်မြစ်က ၈၂ မိုင် အသီးသီး စီးဆင်းနေတယ်လို့ တာချီလိတ်မြို့နယ် ဒေသဆိုင်ရာ အချက်အလက်တွေအရ သိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)