မဲခေါင်၊ မေ ၂
ရှမ်းပြည်နယ်တောင်းပိုင်း မိုးနဲ၊ လင်းခေး၊ မိုင်းပန် ရှမ်းပြည်ပြန်လည်ထူထောင်ရေးကောင်စီ (RCSS/SSA) ထိန်းချုပ်မှု ဧရိယာအတွင်းကို ဧပြီ(၃၀)ရက်နေ့က စပြီး စစ်ကောင်စီတပ်သားနဲ့ ပျူစောထီးတွေပေါင်းပြီး ဒေသခံ တပ်ရင်းတွေဆီ စေလွှတ် အင်အားဖြည့်နေတာတွေ ရှိနေတယ်လို့ သိရပါတယ်။
တောင်ကြီးအခြေစိုက် အရှေ့ပိုင်းတိုင်းစစ်ဌာနချုပ်(ရပခ)မှာ ရွှေတောင်ရပ်ကွက်အုပ်ချုပ်ရေးမှူးက ခေါ်ယူစုဆောင်းပေးပြီး ပြီးခဲ့တဲ့ ဧပြီလ (၂၉)ရက်က ရက်တိုသင်တန်းပေးထားတဲ့ ပျူစောထီးတွေကို မိုးနဲမြို့ကို စေလွှတ်တာဖြစ်တယ်လို့ သိရပါတယ်။
မိုးနဲမြို့ပေါ်ကို စစ်ကောင်စီအင်အား (၆၀)လောက် အရပ်ကား(၃)စီးနဲ့ဝင်ရောက်လာပြီး မြို့ပေါ်တပ်ရင်းတွေမှာ နေရာချထားတာတွေရှိပြီး နမ့်စန်မြို့ပေါ်မှာလဲ ရောက်ရှိနေတယ်လို့သိရပါတယ်။
“ နမ့်စန်က ခလရ ၂၄၈ ၊ လင်ခေးအထွက် ခမရ ၅၁၈ နဲ့ အမြောက်တပ် ၃၆၃ တပ်တွေမှာ ပျူနဲ့ စစ်ကောင်စီ တပ်တွေ ရောက်လာတယ်၊ တောင်ကြီး(ရပခ)က နောက်ချန်တပ်တွေကို ရှေ့တန်းပို့ပြီး စစ်မှုထမ်းဟောင်းနဲ့ ပြည်သူ့စစ်တွေကို မြို့ထိန်းခိုင်းထားတယ်နဲ့တူတယ်” လို့ မိုးနဲဒေသခံတစ်ဦးက မဲခေါင်သတင်းဌာနကို ပြောပါတယ်။
လက်ရှိမှာ ရှမ်းပြည်ပြန်လည်ထူထောင်ရေးကောင်စီ (RCSS/SSA)ရဲ့ ထိန်းချုပ်မှု ဧရိယာအတွင်းက မိုင်းပန်၊ မိုးနဲ၊ လင်းခေး၊ မောက်မယ်မြို့နယ်တွေမှာ (RCSS/SSA) က တပ်သားသစ်သင်တန်းများပေးနေသလို RCSS ရဲ့ ဥက္ကဌ ကိုယ်တိုင်လည်း နယ်မြေအုပ်ချုပ်ရေးနဲ့ စိုးမိုးရေးအတွက် ဒေသခံရှမ်းလူထုနဲ့တွေ့ဆုံမှုတွေ ပြုလုပ်နေတာတွေလဲ ရှိပါတယ်။
စစ်ကောင်စီက ရှမ်းပြည်နယ်တောင်ပိုင်း ခိုလမ်မှာ အရှေ့အလယ်ပိုင်းတိုင်း စစ်ဌာနချုပ်(ရလခ)ကို အခြေစိုက်ထားပေမယ့် ဒေသအတွင်းမှာ (SSPP/SSA)နဲ့ (RCSS/SSA)တို့က လှုပ်ရှားနေတာဖြစ်ပြီး ရှမ်းတပ်တွေကလဲ အင်အားသစ်စုဆောင်းမှုတွေဆက်တိုက်လုပ်ဆောင်နေတာဖြစ်ပါတယ်။
MK-002
