မဲခေါင်၊ ဖေဖော်ဝါရီ ၂
ထိုင်းနိုင်ငံ အလယ်ပိုင်းလော့ဘူရီမြို့မှာ မျောက်ကောင်ရေ ၃၅၀၀ ကျော် မြို့ပေါ်တက် သောင်းကျန်းနေလို့ နိုင်ငံခြားခရီးသွားတွေ၊ ဒေသခံတွေ ထွက်ပြေးရသလို နေအိမ်ဆိုင်ခန်း ပြောင်းရွှေ့ရသူတွေပါ များသထက် များလာရပြီဖြစ်ပါတယ်။
လော့ဘူရီမြို့ဟာ အရင်ကတည်းက နိုင်ငံခြားခရီးသွားတွေ အများအပြားလာရောက်လည်ပတ်ကြပြီး မြို့ပေါ်မှာ ကောင်ရေများစွာရှိတဲ့ မျောက်တွေကို အစာကြွေးခြင်း၊ ဓာတ်ပုံရိုက်ခြင်းနဲ့ စည်ကားခဲ့တဲ့ မြို့ဖြစ်ပါတယ်။
အရင် အချိန်က မျောက်တွေနဲ့ လူသားတွေ သဟဇာတဖြစ်စွာ ယှဉ်တွဲနေထိုင်နိုင်ခဲ့ပေမယ့် ကိုဗစ်လောဒေါင်း ကာလ တွေနောက်ပိုင်းမှာ မျောက်တွေဟာ အရင်လိုမဟုတ်တော့ဘဲ ရန်လိုမှုတွေတိုးလာသလို မျိုးပွားမှုလည်း တိုးပွား လွန်းလာတာကြောင့် လက်ရှိ မြို့ပေါ်က တိုက်ခေါင်မိုးတွေပေါ်၊ စျေးဆိုင်တွေထဲ၊ လူနေအိမ် တံခါးပေါက်တွေကို ကျော်ဝင်တာမျိုး၊ ရန်ပြုတာ၊ လုယက်တာ၊ ဖြတ်သွားဖြတ်လာကားတွေပေါ် တက်သောင်းကျန်းသလို ဖျက်လို ဖျက်ဆီးလုပ်တာတွေပါ လုပ်ဆောင်နေလို့ အခက်တွေ့နေရကြောင်း Guardian သတင်းက ရေးသားဖော်ပြသွား ပါတယ်။
အရင်က နိုင်ငံခြားခရီးသွားတွေများပြားပြီး ကြွေးမွေးကြတဲ့ အစာရေစာလုံလောက်လို့ လူသားတွေနဲ့မျောက်တွေ အကြား ပြဿနာမရှိခဲ့ပေမယ့် လော့ဒေါင်းကာလအတွင်း မျောက်အုပ်ကြီးဟာ အစာရေစာ ရှားပါးခြင်း၊ ငတ်မွတ် လာခြင်းကြောင့် ဗီဇ ပြောင်းလဲသွားပြီး ဒီကနေ အကောင် ၃၅၀၀ ကျော်မြို့ထဲ နှောင့်ယှက်နေတဲ့ ဘေးကို ထိုင်း တာဝန်ရှိသူတွေ မဖြေရှင်းနိုင်သေးဘဲ ဖြစ်နေရတာဖြစ်ပါတယ်။
ဒေသခံ ကယ်လ်ဂျီယာအမည်ရ ထိုင်းအမျိုးသားက မျောက်တွေကို လူအများက သကြားပါတဲ့ အချိုဓာတ် အစား အစာတွေကျွေးကြောင်း၊ ဒီအစားအစာတွေဟာ မျောက်တွေကိုပိုပြီး တက်ကြွသွေးဆူအောင် လှုံ့ဆော်သလို တစ်နှစ် ၂ သားပေါက်တဲ့အထိ မျိုးပွားနှုန်းမြင့်တက်လာစေတယ်လို့ ဆိုပါတယ်။
အရင် တိရစ္ဆာန်ထိန်းသိမ်းရေးအဖွဲ့တွေက ဒီမျောက်တွေကို အစာနဲ့လှောင်အိမ်ထဲဝင်အောင် တစ်နေ့အကောင် ၅၀၀ လောက်ဖမ်းစေပြီး မျိုးမပွားစေတဲ့ ပိုးသတ်ဆေးတွေဖြန်းကြောင်း၊ ဒါပေမဲ့ အခုမျောက်တွေဟာ ဂိုဏ်းတွေလိုဖွဲ့ပြီး မျောက်ဖမ်း၊ ပိုးသတ်ဆေးဖြန်းသူ တွေကို အသေမှတ်ထားလို့ တစ်နေ့ အကောင် ၂၀ ဖမ်းမိဖို့တောင် မလွယ်တော့ကြောင်း စျေးဆိုင်ဖွင့်သူတွေ၊ ရင်းနှီးမြှုပ်နှံသူတွေပါ မျောက်ရန်ကြောင့် ဒီမြို့ကနေ ထွက်ခွာနေကြတယ်လို့ ရှင်းလင်းပြောကြားသွားပါတယ်။
Ref:The Guardian
MKF-001
#MeKongNews
#မျောက်
#လော့ဘူရီ
#သောင်းကျန်း
#အကောင်ရေ