မဲခေါင်၊ မတ် ၇
ထိုင်းနိုင်ငံ ဆူရတ်ဌာနီခရိုင်၊ ခိုဖန်ဂန်ရွားက အုန်းခြံထဲမှာရှိတဲ့ နေအိမ်တစ်လုံးကို မတ် ၆ ရက် မနက်ပိုင်းမှာ ထိုင်းလူဝင်မှုကြီးကြပ်ရေးအဖွဲ့၊ ဒေသတွင်းရဲတပ်ဖွဲ့တွေ ပူးပေါင်းပြီး ဝင်ရောက် စစ်ဆေးခဲ့ရာမှာ တရားမဝင် နေ့ကလေးထိန်းကျောင်းဖွင့်လှစ်ထားတာ တွေ့ရှိရလို့ ဖွင့်လှစ်ထားတဲ့ အမေရိကန်အမျိုးသမီးနဲ့ ကလေးထိန်း ပြည်ပသူ ၃ ယောက်၊ အိမ်အကူလုပ်သားဖြစ်တဲ့ မြန်မာနိုင်ငံသား ၄ ယောက် ဖမ်းဆီးခံခဲ့ရကြောင်း သိရှိရပါတယ်။
အုန်းခြံထဲမှာ အုတ်တံတိုင်းခတ်ထားတဲ့ အိမ်ဝန်းကို အမေရိကန်အမျိုးသမီးက ငှားရမ်းပြီး တရားမဝင် နေ့ကလေးထိန်းကျောင်းဖွင့်လှစ်ထားတာဖြစ်ကြောင်း၊ ဝင်ရောက် စီးနင်းဖမ်းဆီးစဉ် အသက် ၃ နှစ်ကနေ ၅ နှစ်ကြား ကလေးငယ် အယောက် ၂၀ ကို စာသင်းနေသူတချို့၊ ကစားနေသူတချို့နဲ့အတူ တွေ့ရတယ်လို့ ဆိုပါတယ်။
ကလေးထိန်းအဖြစ်အလုပ်လုပ်နေတဲ့ ယူကရိန်းသူတစ်ဦးနဲ့ အစ္စရေးသူ ၂ ဦးအဖြစ် အိမ်အကူလုပ်သားလုပ်နေတဲ့ မြန်မာနိုင်ငံသား ၄ ယောက်ကိုပါ တရားမဝင် အလုပ်လုပ်ကိုင်မှုနဲ့ ဖမ်းဆီးအရေးယူဖို့ စီစဉ်နေတယ်လို့ ထိုင်းရဲ တပ်ဖွဲ့က ထုတ်ပြန်သွားပါတယ်။
ဝင်ရောက်စီးနင်းမှုမှာ စားပွဲ၊ ကုလားထိုင်၊ ကစားစရာတွေနဲ့ သင်ထောက်ကူပစ္စည်းတွေ၊ ကလေး စားသောက် ဖွယ်ရာတွေကိုလည်း တွေ့ရှိခဲ့ရတယ်လို့ ထိုင်းရဲတပ်ဖွဲ့က ကြေညာခဲ့ပါတယ်။
ဒီနေ့ကလေးထိန်းကျောင်း ထူထောင်ထားသူ အမေရိကန်သူဟာ အသက် ၄၀ အရွယ် မစ္စဂျနီဖာဆိုသူဖြစ်ပြီး ဒီကလေးထိန်းကျောင်းအတွက် ဖွင့်လှစ်ပိုင်ခွင့် လျှောက်ထားမှု မကျလာသေးတာဖြစ်တယ်လို့ ထွက်ဆိုသွားပါတယ်။
ကျန်ကလေးထိန်း နိုင်ငံခြားသူ ၃ ဦးဟာ အလုပ်လုပ်ခွင့်ပါမစ်မပါဘဲ တရားမဝင်အလုပ်လုပ်တာကြောင့် စွဲချက်တင်ခံရတာမှာဖြစ်ပြီး မြန်မာ အိမ်အကူလုပ်သားအမျိုးသမီး ၄ ယောက်စလုံးဟာ အထောက်အထားမဲ့ ရွှေ့ပြောင်းခိုလှုံလာသူတွေဖြစ်တယ်လို့ ထိုင်းရဲတပ်ဖွဲ့က ထုတ်ပြန်ခဲ့ပါတယ်။
Ref: bangkokpost
MKF-001
