မဲခေါင်၊ မေ ၂
ရှမ်းပြည်အရှေ့ပိုင်း၊ တာချီလိတ်မြို့အတွင်း ဆိုင်ကယ်ခိုးယူမှုတွေမှာ တိုင်ကြားမှုတွေရှိနေပေမယ့် အမှုဖွင့်ပေးခြင်းမရှိဘူးလို့ ဒေသခံတွေက ပြောကြပါတယ်။
ဧပြီလအတွင်း ဆိုင်ကယ်ခိုးခံရတဲ့အတွက် သူခိုးကို ကိုယ်တိုင်ဖမ်းဆီးပြီး ရဲလက်အပ်ခဲ့ပေမယ့် အမှုဖွင့်လှစ်ပေးတာမရှိဘဲ သူခိုးနဲ့ ညှိနှိုင်းရန်သာ ပြောပြီး ပြန်လည်လွှတ်ပေးလိုက်တယ်လို့ ဆိုင်ကယ်ခိုးခံရသူတစ်ဦးက ပြောပါတယ်။
“ကျွန်တော်ဆိုင်ကယ် ဧပြီ(၁၅)ရက်နေ့က ခိုးခံရတယ် သူခိုးကို ကိုယ်တိုင်လိုက်ရှာပြီး ဟောင်လိတ်စခန်းကို အပ်ခဲ့တယ် နယ်ထိန်းခေါင်းဆောင် ရဲအုပ် ဇော်ဝင်းနိုင်က ခဏဖမ်းထားပြီး ညှိနှိုင်းဖို့ ပြန်လွှတ်ပေးလိုက်တယ် သူခိုးက ပြန်ရှာပေးမယ်ပြောပေးမယ် အခုထိပြန်မရသေးဘူး အမှုလဲ မဖွင့်ပေးဘူး” လို့ ဆိုင်ကယ်ခိုးခံရသူက ပြောပါတယ်။
ဧပြီ (၁၅) ရက်နေ့ ညနေပိုင်းက ပါဆတ်ရပ်ကွက် ဝက်သားဆိုင်အနီးမှာ ခိုးယူခံရတာဖြစ်ပြီး CCTV မှတ်တမ်းတွေက အစ ရဲကိုပေးခဲ့ပေမယ့် အရေးမယူ အမှုမဖွင့်လှစ်ဘဲ ခေတ္တခဏထိန်းသိမ်းထားပြီး ပြန်လွှတ်လိုက်တာလို့ ပြောပါတယ်။
တာချီလိတ်မြို့အတွင်း ဆိုင်ကယ်ခိုးခံရသူတွေက ရဲစခန်းတွေကို တိုင်ကြားခဲ့ပေမယ့် အရေးယူဆောင်ရွက်ခဲ့တာ တွေမရှိဘဲ ခိုးယူသူတွေက ရဲတပ်ဖွဲ့က သိနေပြီး သတင်းပေး အင်ဖေါ်မာ အဖြစ်ထားရှိသူတွေဖြစ်တယ်လို့ ဒေသခံတွေက ပြောပါတယ်။
ဆိုင်ကယ်ပျောက်လျှင် ကျောက်တောင်အနီးတဝိုက်က သားကြီးဆိုတဲ့ သတင်းပေးအင်ဖေါ်မာဆီ ရောင်းချကြတာဖြစ်ပြီး သူ့ကို ရဲတပ်ဖွဲ့နဲ့ စစ်ကောင်စီ (စရဖ)က အကာအကွယ်ပေးထားပြီး ဒေသတွင်း ဂိမ်းခုံနဲ့ တရားမဝင် လုပ်ငန်းတွေအတွက် သားကြီးက ဆပ်ကြေးကောက်ခံပေးနေတာဖြစ်တယ်လို့ သိရပါတယ်။
တာချီလိတ်မှာ ခိုးမှု၊ လုယက်မှုနဲ့ အနုကြမ်းစီးမှုတွေ ရှိနေပေမယ့် ရဲတပ်ဖွဲ့က ဖမ်းဆီးအရေးယူမှုတွေမရှိတဲ့အတွက် ဒေသခံတွေအနေနဲ့ စိုးရိမ်မှုတွေရှိနေတာဖြစ်ပါတယ်။
တာချီလိတ်ခရိုင်ရဲတပ်ဖွဲ့က ၂၀၂၃ ခုနှစ် ဇူလိုင်လအတွင်း ဆိုင်ကယ်သူခိုး (၉)ဦးကို ဆိုင်ကယ်(၁၉)စီးနဲ့အတူ ဖမ်းဆီးရမိတာနဲ့ အနုကြမ်းစီး ဆိုင်ကယ်လုယက်မှု တစ်ခု ဖမ်းဆီးရမိတယ်လို့ ထုတ်ပြန်ထားတာတွေ့ရပြီးနောက်ပိုင်း ခိုးမှု၊ လုယက်မှုတွေဖမ်းဆီးရမိတာတွေ ထုတ်ပြန်တာ မတွေ့ရပါဘူး။
MK-002