နယ်စပ်အငြင်းပွားဒေသတွင် အိန္ဒိယနှင့်တရုတ်တပ်ဖွဲ့များ ထပ်မံထိတွေ့မှုများဖြစ်ပွားနေပြီး နှစ်ဖက်စလုံးတွင် အထိအခိုက်များရှိနေကြောင်း အိန္ဒိယမီဒီယာများက ဖော်ပြသည်။
ပြီးခဲ့သည့် ၃ ရက်က အိန္ဒိယနိုင်ငံမြောက်ပိုင်း ဆစ်ကင်ပြည်နယ်တွင် တိုက်ပွဲများဖြစ်ပွားခဲ့သည်။
အငြင်းပွားနယ်မြေနောက်တခုတွင် လူသေဆုံးမှုများရှိခဲ့သည့် တိုက်ပွဲများဖြစ်ခဲ့ပြီးနောက်ပိုင်း နှစ်နိုင်ငံကြားတင်းမာမှုများမြင့်တက်နေသည်။
၂၀၂၀ ပြည့်နှစ်၊ ဇွန်တွင် လာဒါ့ဒေသရှိ ဂယ်လွမ်တောင်ကြား၌ နှစ်ဖက်တိုက်ပွဲများဖြစ်ပွားခဲ့ရာ အိန္ဒိယတပ်ဖွဲ့ဝင်အနည်းဆုံးအယောက် ၂၀ သေဆုံးခဲ့ပြီး တရုတ်နိုင်ငံက ထိခိုက်သေဆုံးမှုများအပေါ် တစုံတရာမှတ်ချက်ပြုခြင်းမရှိချေ။
ယခုနောက်ဆုံးဖြစ်ပွားခဲ့သည့် တိုက်ပွဲများသည် ဆစ်ကင်ရှိ နာကူလာဖြတ်လမ်းတွင် ဖြစ်ပွားခဲ့ခြင်းဖြစ်ပြီး ထိုပြည်နယ်သည် ဘူတန်နှင့်နီပေါနိုင်ငံတို့ကြားတွင် ညပ်နေသည့်နိုင်ငံဖြစ်သည်။
အိန္ဒိယနှင့်တရုတ်နိုင်ငံတို့တွင် ကမ္ဘာ့အရှည်ဆုံးနယ်စပ်ရှိပြီး တစ်ဖက်မှနယ်မြေအများအပြားကို ပိုင်ဆိုင်သည်ဟု အခြားတဖက်က ပြောလေ့ရှိသည်။
မြစ်များ၊ ကန်များနှင့် နှင်းတောင်များအပါအဝင် နယ်နိမိတ်ပြတ်ပြတ်သားသားသတ်မှတ်ထားနိုင်ခြင်းမရှိသည့် မိုင် ၂၁၀၀ ကျော်ရှည်သောနယ်စပ်သည် ရွှေ့လျားနေနိုင်ပြီး နေရာအများအပြားတွင် စစ်သားများထိတွေ့မှုဖြစ်ပွားလေ့ရှိသည်။
၁၉၆၂ ခုနှစ်တွင် တရုတ်-အိန္ဒိယစစ်ပွဲတကြိမ်သာဖြစ်ပွားဖူးပြီး အိန္ဒိယနိုင်ငံအကြီးအကျယ်ရှုံးနိမ့်ခဲ့သည်။