မဲခေါင်၊ ဧပြီ ၂၆
ရှမ်းပြည်တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံနဲ့ ပင်းတယမြို့နယ်အတွင်း စစ်မှုထမ်းဥပဒေကြောင့် လာရောက် တာဝန်ထမ်းဆောင်မယ့် တပ်ဖွဲ့ဝင် အသစ်တွေ ၈၀ ရာခိုင်နှုန်းခန့် တိုးလာတယ်လို့ DPLF တာဝန်ရှိသူတွေက ပြောပါတယ်။
ဧပြီလအတွင်း ဓနုဒေသမှာ စစ်မှုထမ်း ဥပဒေကြောင့် DPLF အပါအဝင် ရွာငံ PDF, အမျိုးသားညီညွတ်ရေး အစိုးရ NUG လက်အောက်ခံ ၁၀၀၃ တပ်ရင်းနဲ့ ဒေသတွင်း ကာကွယ်ရေးတပ်ဖွဲ့တွေမှာလည်း တပ်ဖွဲ့ဝင်အရေအတွက် ၂ ဆကျော် တိုးလာတယ်လို့ ဆိုပါတယ်။
DPLF ဥက္ကဌ ဦးထွန်းထွန်းနိုင်က “ကျွန်တော်တို့နဲ့ နီးစပ်ရာ၊ ဆက်စပ်ရာရော၊ page တွေရောမှာ အချိန်မရွေးဆက်သွယ်ဖို့ ကျွန်တော်တို့ အချိန်ပြည့်လက်ခံနေတယ်ပေါ့နော်၊ လူဦးရေ အကန့်အသတ်လည်း မရှိဘူး၊ ဒါပေမဲ့ လာတဲ့လူလည်း လူငယ်ပဲ ဖြစ်တယ်ဆိုတော့ အသက်အကန့်အသတ်ကတော့ သူတို့လည်း သိပြီးသားလေနော်၊ ဒါပေမဲ့ တကယ်လို့ စစ်မှုထမ်းချည်းချည်းလည်း မဟုတ်ဘူးပေါ့၊ တကယ်လို့ သူတို့ရဲ့ ၀ါသနာပါရာ၊ ပညာတတ်တွေ ပါလာရင်လည်း သူတို့ရဲ့ သူတို့လုပ်နိုင်တဲ့ အပိုင်းမှာလည်း ကျွန်တော်တို့အများကြီး ပြင်ဆင်ထားတယ်။ စစ်မှုထမ်းချည်းချည်း မဟုတ်ဘူးပေါ့ဗျာ၊ ဘက်ပေါင်းစုံကနေ ကျွန်တော်တို့နဲ့အတူတူ ပူးပေါင်းပြီးလုပ်လို့ရတယ်လို့ အဲ့ဒါလေးတော့ မှာချင်တယ်ဗျ” လို့ ပြောပါတယ်။
အသစ်ရောက်လာတဲ့ တပ်ဖွဲ့ဝင်တွေဟာ တပ်ဖွဲ့ဝင်ဟောင်းတွေနဲ့ ပုဂ္ဂိုလ်ရေးအရ နီးစပ်သူတွေ၊ လူမှုကွန်ယက် စာမျက်နှာ (Facebook) ပေချ့်မှတဆင့် လာရောက်ဆက်သွယ်သူတွေ ဖြစ်ပြီး ဓနုဒေသခံ တင်မကဘဲ တခြားဒေသက တခြားတိုင်းရင်းသားတွေလည်း ပါဝင်တယ်လို့ အဖွဲ့တာဝန်ရှိသူတွေဆီက သိရပါတယ်။
လတ်တလောမှာတော့ DPLF ဆီဝင်ရောက်လာသူ အဆမတန် များနေတာကြောင့် ကိုယ်ရေးရာဇဝင်အကျဉ်း အသေးစိတ် စီစစ်ပြီး ဖြည်းဖြည်းချင်း လက်ခံပေးနေတယ်လို့ ဆိုပါတယ်။
DPLF ဆီလာရောက် တာဝန်ထမ်းဆောင်မယ့်သူတွေ အနေနဲ့ စိတ်ပိုင်းဆိုင်ရာ ဆုံးဖြတ်ချက် ခိုင်မာဖို့ လိုအပ်ပြီး ထွက်ပြေးတဲ့ သူတွေကိုလည်း ထိထိရောက်ရောက် အရေးယူမှုတွေ ရှိတယ်လို့ ဦးထွန်းထွန်းနိုင်က ဆက်ပြောပါတယ်။
“အရင်က ၅ ယောက်ပြေးတာ မိလို့ ချုပ်ပေါက်က တစ်ရက်၊ အချုပ်ချတာက တစ်လပေါ့နော်။ အဲလိုမျိုး အရေးယူပါတယ်။ အခု နောက်ပိုင်းတော့ မပြေးကြတော့ပါဘူး”
DPLF ဆီရောက်လာသူတိုင်းဟာ ရှေ့တန်းထွက်ရမှာ မဟုတ်ဘဲ အုပ်ချုပ်ရေး၊ တရားစီရင်ရေး၊ ဥပဒေပြုရေး၊ နည်းပညာ၊ ကျန်းမာရေး စတဲ့ ကဏ္ဍတွေမှာ ကျွမ်းကျင်မှုအလိုက် တာဝန်ထမ်းဆောင်နိုင်တယ်လို့ ဆိုပါတယ်။
အခု ဧပြီလအတွင်း ဓနုဒေသမှာ ပျူစောထီး၊ အုပ်ချုပ်ရေးမှူးနဲ့ ရာအိမ်မှူးတွေက စစ်မှုထမ်းဖို့ ဒေသခံတွေကို ဖိအားပေးနေပြီး စစ်မှုထမ်း ဥပဒေ အကောင်အထည် ဖော်နေသူတိုင်းကို ထိထိရောက်ရောက် အရေးယူသွားမယ်လို့ DPLF တပ်ဖွဲ့နဲ့ ဓနု PDF ၁၀၀၃ တပ်ရင်းတို့ရဲ့ တာဝန်ရှိသူတွေက ပြောဆိုထားပါတယ်။
MK-014