မဲခေါင်၊ နိုဝင်ဘာ ၂၉
တရုတ်ပြည်သူ့လွတ်မြောက်ရေးတပ်မတော် နေ့စဉ် သတင်းစာ PLA Daily မှာ နိုဝင်ဘာ ၂၆ ရက် တနင်္ဂနွေနေက တရုတ်အစိုးရအာဘော်အဖြစ် မြန်မာနိုင်ငံတစ်ဝန်း ပတ်သက်သူအားလုံး အပစ်အခတ်ရပ်စဲတာကို အလိုရှိကြောင်း တိုက်တွန်းတဲ့ အာဘော်ရေးသားဖော်ပြခဲ့ပါတယ်။
ပြီးခဲ့တဲ့တစ်လအတွင်း တရုတ်-မြန်မာနယ်စပ်ဒေသတစ်လျှောက် မြောက်ပိုင်းမဟာမိတ်ညီနောင် ၃ ဖွဲ့ဦးဆောင်တဲ့ တိုင်းရင်းသားလက်နက်ကိုင်အဖွဲ့တွေဟာ စစ်ကောင်စီ စခန်းပေါင်းများစွာကို တိုက်ခိုက်သိမ်းပိုက်နိုင်ခဲ့ပြီး မူဆယ်ခရိုင်မှာရှိတဲ့ တရုတ်နယ်စပ် ကုန်သွယ်ရေးဂိတ် ၅ ခုထဲက ၄ ခုမြောက် သိမ်းယူနိုင်မှုအဖြစ် မုန်းကိုး က ကျင်ဆန်းကွက် ဂိတ်ကိုပါ နိုဝင်ဘာ ၂၆ ရက်နေ့မှာ သိမ်းပိုက်အောင်နိုင်ခဲ့ပါတယ်။
ဒီဂိတ်ဟာ စက်မှုလယ်ယာစက်တွေ၊ လျှပ်စစ်အပိုပစ္စည်းတွေ၊ စိုက်ပျိုးရေး အသုံးအဆောင်ပစ္စည်းတွေ၊ လူသုံးကုန် ပစ္စည်းတွေနဲ့ တရုတ်စိုက်ပျိုးရေးထုတ်ကုန်တွေကို မြန်မာနိုင်ငံထဲ အဓိကတင်ပို့တဲ့ ဂိတ်ဖြစ်ပါတယ်။
စစ်ကောင်စီနဲ့ မဟာမိတ်ဖြစ်တဲ့ ကိုးကန့်ကိုယ်ပိုင်အုပ်ချုပ်ခွင့်ရဒေသ မြို့တော် လောက်ကိုင်အပါအဝင် ရှမ်းမြောက်ပိုင်း တရုတ်-မြန်မာနယ်စပ်က ပြည်သူတွေထောင်ပေါင်းများစွာ စစ်ဘေးရှောင်တွေအဖြစ် ဒုက္ခရောက်နေရပြီး တရုတ်နဲ့ နယ်စပ်ကုန်သွယ်မှုလုပ်ငန်းတွေအားလုံးနီးပါး ရပ်တန့်နေရလို့ နေပြည်တော် အခြေစိုက် စစ်ကောင်စီအပေါ် ဘဏ္ဍာရေးပိုင်းဆိုင်ရာ ဖိအားတွေ ရှိနေပါတယ်။
၁၀၅ မိုင်ကုန်သွယ်ရေးဇုန်မှာ တင်ပို့တဲ့ ကုန်ပစ္စည်းမျိုးစုံပါ ကုန်ကား ၂၅၈ စီအနက် အစီး ၁၂၀ မီးလောင်ပျက်ဆီးခဲ့ရမှုကို စစ်ကောင်စီ ဘက်က ရန်သူတွေလက်ချက်လို့ စွပ်စွဲထားပြီး MNDAA ပြောရေးဆိုခွင့်ရှိသူကတော့ စစ်ကောင်စီဘက်ကသာ လုပ်ခဲ့တာလို့ ပြန်လည် ရှင်းလင်းထားပါတယ်။
ဒါကြောင့် မြန်မာနိုင်ငံဘက်မှာ တည်ငြိမ်အေးချမ်းရေးကို လိုလား တဲ့အတွက် တိုင်းရင်းသားလက်နက်ကိုင်တွေရော စစ်ကောင်စီပါ စကားဝိုင်းထိုင်ဆွေးနွေးခြင်းနဲ့အဖြေရှာပြီး အပစ်အခတ်ရပ်စဲသင့်တယ်လို့ သတင်းစာ အယ်ဒီတာအာဘော်မှာ ရေးသားဖော်ပြခဲ့တာဖြစ်ပါတယ်။
လောက်ကိုင်မြို့အနီးတရုတ်ထဲ ဝင်ပြေးဖို့ရောက်လာတဲ့ စစ်ရှောင်တွေကို တရုတ်ရဲတပ်ဖွဲ့က မျက်ရည်ယိုဗုံးတွေ ပစ်ပြီးတားဆီးဖို့ ကြိုးစားတဲ့ ဗီဒီယိုဖိုင်တွေ လူမှုကွန်ရက်မှာ ပျံ့နှံ့လာနေခြင်းနဲ့ တရုတ်စစ်အင်အားတိုးမြှင့်ချထား ပြီး မြန်မာနယ်စပ်မှာ စစ်ရေးလေ့ကျင့်မှုလုပ်နေရခြင်းက အရေးပေါ်အခြေအနေကြုံလာရင် တပ်ရွှေ့လျှားနိုင်မှုကို စမ်းသပ်ဖို့၊ နယ်ခြားထိန်းချုပ်နိုင်ရေးစွမ်းရည်၊ ပစ်ခတ်တိုက်ခိုက်နိုင်စွမ်းစွမ်းရည်တွေကို စမ်းသပ်ပြင်ဆင်တဲ့ ရည်ရွယ်ချက်နဲ့ ဖော်ဆောင်နေတာဖြစ်တယ်လို့ ဆိုပါတယ်။
မြန်မာနိုင်ငံမှာ စစ်ကောင်စီထောက်ခံသူတွေဟာ တရုတ် သံရုံးရှေ့ နဲ့ မြို့တော်ခန်းမရှေ့သွားပြီး မြန်မာ့အရေးဝင်စွက်ဖက်မှုမလုပ်ဖို့ တရုတ်ကို ဆန့်ကျင်ဆန္ဒပြမှုတွေ လုပ်နေခြင်းဟာ မှားယွင်းတဲ့ အယူအဆဖြစ်လို့ တရုတ်ဆန့်ကျင်ရေးတွေကို မလုပ်သင့်ကြောင်းPLA Daily သတင်းစာက ဖော်ပြခဲ့တယ်လို့ VOA က ဖော်ပြသွား ပါတယ်။
Ref:VOA
MKF-001
#MeKongNews
#စစ်ကောင်စီ
#တရုတ်
#လောက်ကိုင်
#စစ်ရေး
