မြောက်ပိုင်းက တရုတ်နိုင်ငံသားတွေ အမြန်ရှောင်တိမ်းဖို့ တရုတ်သံရုံး သတိပေး
မဲခေါင်၊ နိုဝင်ဘာ ၂၅
အရှေ့တောင်အာရှအိမ်နီးချင်းနိုင်ငံတွေကို ပို့ဆောင်မယ့် ကုန်ပစ္စည်းတွေပါ ကုန်ကား အစီး ၁၂၀ မူဆယ်မှာ မီးလောင်ပျက်ဆီးခဲ့ပြီးနောက် တရုတ်ပြည်သူ့လွတ်မြောက်ရေးတပ်မတော်ရဲ့ စစ်သည်တွေဟာ မြန်မာနယ်စပ်မှာ နိုဝင်ဘာ ၂၅ ရက်ကစလို့ စစ်ရေးလေ့ကျင့်မှုတွေ စတင်ပြုလုပ်နေပါတယ်။
တချိန်တည်းမှာပဲ ရန်ကုန်မှာရှိတဲ့ တရုတ်သံရုံးကလည်း လောက်ကိုင်၊ ကိုးကန့်ဒေသတွေပါတဲ့ မြန်မာပြည်မြောက်ပိုင်းကနေ တရုတ်နိုင်ငံသားတွေ အမြန်ဆုံး ရှောင်တိမ်း ဖို့ သတိပေးကြေညာချက် ထုတ်ပြန်ခဲ့ပါတယ်။
ဒီကုန်ကားတွေ မီးလောင်ပျက်ဆီးရတာဟာ စစ်ကောင်စီဘက်က ပစ်ခတ်တိုက်ခိုက်မှုကြောင့် ဖြစ်တယ်လို့ ဒေသဆိုင်ရာ တော်လှန်ရေးအင်အားစုတွေက ထုတ်ပြန်ပေမယ့် စစ်ကောင်စီ ပြောရေးဆိုခွင့်ရှိသူ ဇော်မင်းထွန်းက တော်လှန်ရေးအင်အားစုတွေရဲ့ ဒရုန်းတွေနဲ့ ဗုံးကျဲတိုက်ခိုက်မှုကြောင့်ဖြစ်တယ်လို့ နိုဝင်ဘာ ၂၄ ရက်နေ့မှာ ထုတ်ပြန်ခဲ့ပါတယ်။
တရုတ်မီဒီယာ CGTN က နိုဝင်ဘာ ၂၄ ရက်နေ့မှာပဲ မြန်မာပြည်မြောက်ပိုင်းက တရုတ်နိုင်ငံသားတွေ အမြန်ဆုံး ရှောင်တိမ်းထွက်ခွာဖို့ သတိပေးချက် ထုတ်ပြန်အပြီး နိုဝင်ဘာ ၂၅ ရက်နေ့မှာပဲ တရုတ်ပြည်သူလွတ်မြောက်ရေး တပ်မတော် တပ်မဟာ ၅ ခုထဲက တစ်ခုဖြစ်တဲ့ Southern Theatre Command က WeChat ကနေ လျှင်မြန်စွာ တိမ်းရှောင်မှု၊ နယ်နိမိတ်တံဆိပ်ခတ်ခြင်းနဲ့ ပစ်ခတ်တိုက်ခိုက်မှုစွမ်းရည်တွေကို စမ်းသပ်လေ့ကျင့်မှုတွေ မြန်မာ နယ်စပ်တစ်လျှောက် စတင်ပြုလုပ်ပြီလို့ ထုတ်ပြန်သွားတာဖြစ်ပါတယ်။
လူမှုကွန်ရက် WeChat ကနေ ထုတ်ပြန်တာဖြစ်ပေမယ့် ချိန်သားကိုက်မှု၊ ရက်ချိန်းနဲ့ စစ်သည်အင်အား ဘယ် လောက်ပါဝင် စစ်ရေးလေ့ကျင့်မယ်ဆိုတာကိုတော့ အတိအကျထုတ်ပြန်ခြင်းမရှိခဲ့ပါဘူး။ Thestraittimes ရဲ့ ဖော်ပြမှုမှာ မြန်မာစစ်ကောင်စီဟာ ၂၀၂၁ ခုနှစ် စစ်အာဏာသိမ်းပြီးနောက်ပိုင်း မြန်မာပြည်မြောက်ပိုင်းနဲ့ အရှေ့ မြောက်ပိုင်းဒေသတွေမှာ အကြီးမားဆုံး တွန်းလှန်မှုအဖြစ် မဟာမိတ်တပ်တွေရဲ့ တိုက်ခိုက်မှုကြောင့် နယ်မြေ ဆုံးရှုံးမှုများစွာဖြစ်ပေါ်နေပြီး စစ်စခန်းများစွာ သိမ်းပိုက်ခံနေရကြောင်း ဖော်ပြခဲ့ပါတယ်။ ကုလသမဂ္ဂကလည်း မြန်မာပြည်မြောက်ပိုင်းတိုက်ပွဲတွေကြောင့် နေရပ်စွန့်ခွာတိမ်းရှောင်နေရတဲ့ ပြည်သူ ၂ သန်းကျော် ထပ်တိုးလာ တယ်လို့ ဖော်ပြခဲ့ပါတယ်။
Ref: straitstimes
MKF-001
#MeKongNews
#တရုတ်
#မူဆယ်
#တိုက်ခိုက်
#စစ်ရေး
#လေ့ကျင့်
