မဲခေါင်၊ မတ် ၂၁

ထိုင်းနိုင်ငံ လေဆိပ်ဌာန DOA ဟာ ပြည်တွင်းမှာ နောက်ထပ် လေယာဉ်ကွင်းသစ် ၇ ခု ထပ်မံတည်ဆောက်ပြီး ဘတ် ဘီလီယံ ၅၀ ကုန်ကျခံဖို့ စီမံကိန်းရေးဆွဲထားတယ်လို့ ထုတ်ပြန်ပါတယ်။

နာခွန်းပါသွန်၊ ဗျူယန်ခန်း၊ မက်ဒါဟန်၊ ကလာစင်၊ ဖျာယာအို၊ ဖက်သလန်းနဲ့ ဆာတွန်း (Nakhon Pathom, Bueng Khan, Mukdahan, Kalasin, Phayao, Phatthalung and Satun )ခရိုင်တွေမှာ လေယာဉ်ကွင်းသစ်တွေ တည်ဆောက် သွားမှာဖြစ်ပါတယ်။

ဒေသတွင်း ပြည်သူတွေသွားလာရေးပိုအဆင်ပြေဖို့၊ ထိုင်းနိုင်ငံသားတွေအပြင် ပြည်ပ နိုင်ငံခြားခရီးသွားလုပ်ငန်းတွေ ပိုဖွံ့ဖြိုးတိုးတက်လာစေဖို့ ရည်ရွယ်တာဖြစ်တယ်လို့ ထုတ်ပြန်ခဲ့တာ ဖြစ်ပါတယ်။

ဘတ်ဂျက်ငွေထဲက အများဆုံးအဖြစ် တစ်ဝက်ရှိတဲ့ ဘတ် ၂၅ ဘီလီယံကို ထိုင်းနိုင်ငံဗဟို နာခွန်းပါသွန်လေဆိပ် အတွက် အသုံးပြုသွားမှာဖြစ်ပြီး လေ့လာမှုလုပ်ငန်းစဉ်တွေ ပြီးစီးသွားပြီလို့ သိရပါတယ်။

ဘန်ကောက်နဲ့ ကီလိုမီတာ ၅၀ အကွာမှာရှိတဲ့ ဘန်လန်းနဲ့နာခွန်းချိုင်ဆရီနယ်ကြား မြေနေရာ ၃၅၀၀ ရိုင်ပေါ် ၄၅ မီတာအကျယ်၊ ၂၅၀၀ မီတာအရှည်ရှိတဲ့ လေယာဉ်ပြေးလမ်းပါ လေယာဉ်ကွင်းကို တည်ဆောက်သွားမှာလို့ ဆိုထားပါတယ်။

ဗျူယန်ခန်းလေဆိပ်အတွက် ဘတ်ဂျက် ဘတ် ၃ . ၁ ဘီလီယံ၊ မက်ဒါဟန်လေဆိပ်အတွက် ဘတ် ၅ ဘီလီယံ၊ တာတွန်းလေဆိပ်အတွက် ဘတ် ၄ . ၁ ဘီလီယံ၊ ကလာစင်၊ ဖျာယာအိုနဲ့ ဖက်သလန်း လေဆိပ်တွေအတွက် ဘတ် ၂ ဘီလီယံ လျာထားတယ်လို့ ဆိုပါတယ်။ ၂၀၂၆ ခုနှစ်မှာ လေယာဉ်ကွင်းတည်ဆောက်မှုလုပ်ငန်းအားလုံး စတင်မှာဖြစ်ကြောင်းနဲ့ ၂၀၂၈ ခုနှစ်မှာ စတင်ဖွင့်လှစ်အသုံးပြုနိုင်ဖို့ စီမံကိန်းချထားကြောင်း DOA က ထုတ်ပြန်ခဲ့ပါတယ်။

MKF-001

#Mekongnews

#ထိုင်းလေဆိပ်

Ref: thethaiger

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)