မဲခေါင်၊ စက်တင်ဘာ ၂၈

ထိုင်းနိုင်ငံ ဒုရဲချုပ် ၄ ယောက်ထဲက ကနဦး ရဲချုပ်ဖြစ်ဖို့ တစ်ပြေးနေခဲ့တဲ့ ဆူရာချာတီ (ချစ်စနိုးအမည် Big Joke) က သူ့မှာ သတင်းအချက်အလက်တွေ အခိုင်အမာရှိကြောင်းနဲ့ ဒါတွေကိုသာ ဖွင့်ချခဲ့ရင် ထိုင်းအမျိုးသားရဲတပ်ဖွဲ့တစ်ခုလုံးတစ်ယောက်မှ အပြစ်လွတ်မှာမဟုတ်ဘူးလို့ ထုတ်ဖော်ပြောဆိုသွားပါတယ်။

ဆူရာချာတီရဲ့ ဘန်ကောက်နေအိမ်ကို ပြီးခဲ့တဲ့ရက်ပိုင်းက ဝန်ကြီးချုပ်စေခိုင်းမှုအရ ဝရမ်းနဲ့စီးနင်းရှာဖွေခွင့်ပြုပြီး ဝင်ရောက်စီးနင်းခဲ့ရာမှာ တပည့် ရဲအရာရှိ ၈ ဦးဖမ်းဆီးခံရပြီး စစ်ဆေးမေးမြန်းခံနေရလို့ ဒေါသထွက်နေဖွယ်ရှိသလို စက်တင်ဘာ ၂၇ ရက်နေ့က ရဲချုပ်ရွေးချယ်ပွဲမှာ တစ်ပြေးနေခဲ့တဲ့ သူမဟုတ်ဘဲ ဒုတိယရဲမင်းကြီးချုပ် တော်ဆက်ခ်ဆက်ခ်ဗီမိုကို ၁၀ မဲ ၁ မဲနဲ့ ရွေးချယ်တင်မြှောက်လိုက်တာကြောင့် ပိုပြီး ပေါက်ကွဲသွားဖွယ်ရှိပါတယ်။

ဒီဖြစ်စဉ်တွေအပြီး ဆူရာချာတီက “ကျုပ်မှာ သတင်းအချက်အလက်တွေ၊ သက်သေတွေမှ အများကြီး။ ဒါတွေသာ ထုတ်ဖော်လိုက်ရင် တော်ဝင်ထိုင်းရဲတပ်ဖွဲ့တစ်ခုလုံးက တစ်ယောက်မကျန် ပြဿနာတွေ တက်ကုန် မယ်။ ဒါပေမဲ့ ကျုပ်လက်စားမချေချင်ပါဘူး။ ကျုပ်က ဒါတွေမဖွင့်ချချင်တာ ကိုယ့်ရဲတပ်ဖွဲ့တစ်ခုလုံးကို ဆက်ပြီး ကာကွယ်ပေးနေချင်တုန်းပဲမို့ပါ” လို့ Channel 9 ရုပ်သံမှာ ပြောကြားသွားတာဖြစ်ပါတယ်။

ဆူရာချာတီရဲ့ ဘန်ကောက်နေအိမ်ဝန်းထဲမှာ ရှိတဲ့ အိမ် ၅ လုံးမှာ ၂ လုံးက သူ့တပည့်ရဲအရာရှိတွေနေထိုင်ပြီး ကျန် ၃ လုံးက အွန်လိုင်းလောင်းကစားမှုနဲ့ ဖမ်းခံရတဲ့သူတွေနေဖို့ ငှားရမ်းထားတာဖြစ်ကြောင်း၊ သူ့တပည့်တွေကို ယုံကြည်ပေမယ့် အပြစ်ရှိခဲ့ရင်တော့ မတတ်နိုင်ကြောင်း၊ သူကတော့ နေအိမ်ထဲ စစ်ဆေးခံခဲ့ရမှာ ဘာပြစ်မှုမှ ကျူးလွန်ထားတာမတွေ့ရှိလို့ အပြစ်ကင်းပြီး နိုင်ငံရေးအရှုပ်အထွေးမှာ သိက္ခာကျစေဖို့ လုပ်ခံရတာပဲလို့လည်း ရှင်းလင်းပြောကြားခဲ့ပါသေးတယ်။

Ref: bangkokpost
MKF-001

#MeKongNews

#ဒုရဲချုပ်

#ဆူရာချာတီ

#ထိုင်းရဲ

#ရဲချုပ်

#အချက်အလက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)