မဲခေါင်၊ ဒီဇင်ဘာ ၆

ယူနက်စ်ကိုက ထိုင်းနိုင်ငံရဲ့ သင်္ကြန်ပွဲတော်ကို မမြင်နိုင်တဲ့ ရှေးဟောင်းအမွေ အနှစ်အဖြစ် သတ်မှတ်ကြောင်း ဒီနေ့ ဒီဇင်ဘာ ၆ ရက် နေ့လယ်ပိုင်းမှာ အတည်ပြုကြေညာသွားပါတယ်။

ထိုင်းနိုင်ငံသင်္ကြန် ဆုန်ကရန်ဟာ ဟိန္ဒူ၊ ဗုဒ္ဓဘာသာနဲ့ ထိုင်းရှေးဟောင်း ရိုးရာအမွေအနှစ်တွေကိုပေါင်းစပ် ကျင်းပတာဖြစ်ပြီး အခုလို ယူနက်စ်ကို အသိအမှတ်ပြု ရှေးဟောင်းအမွေအနှစ်ဖြစ်လာတာကြောင့် ဒီဇင်ဘာ ၇ ရက်နေ့မှာ ဘန်ကောက်မြို့ထဲ ဂုဏ်ယူဖွယ် အခမ်းအနားပွဲလမ်းတွေကျင်းပသွားမယ်လို့လည်း ဆိုပါတယ်။

ထိုင်းနိုင်ငံရဲ့ နှစ်ကူးသင်္ကြန်ဆုန်ကရန်ပွဲတော်ကို ရိုးရာအားဖြင့် ဧပြီ ၁၃ ရက်ကနေ ၁၅ ရက်အထိ ကျင်းပလေ့ရှိပြီး အညစ်အကြေးသန့်စင်ခြင်း၊ ဆေးကြောခြင်းနိမိတ်ပုံအရ ကျင်းပတာဖြစ်ပါတယ်။

ထိုင်းရိုးရာအစားအစာတွေ လှူဒါန်းမှု၊ ဂီတပွဲတော်တွေနဲ့ ပျော်ရွှင်စွာနွှဲပျော်မှုတွေအပြင် သက်ကြီးရွယ်အိုတွေကို လေးစားသမှု ကန်တော့ခြင်း၊ ဘုန်းတော်ကြီးတွေကို လှူဖွယ်ပစ္စည်းတွေ ဆက်ကပ်ခြင်းတွေ လုပ်ကြပါတယ်။

ရှေးဟောင်း ဟိန္ဒူယာဉ်ကျေးမှုမှာတော့ ဆုန်ကရန်သင်္ကြန်ပွဲဆိုတာ ရိတ်သိမ်းရာသီနဲ့နှစ်ကူးချိန်မှာ ကျင်းပကြတာဖြစ်ပြီး ၁၁ ရာစုမှာ အခု ထိုင်းနိုင်ငံပိုင်အစိတ်အပိုင်းတွေထဲပါတဲ့ ခမာအင်ပါယာမှာ မွေးစားပြီး ကျင်းပရင်းက ရိုးရာ အမွေအနှစ်ဖြစ်လာခဲ့တာဖြစ်ပါတယ်။

ထိုင်းပြက္ခဒိန်မှာ ၅ လပိုင်း ပထမလဆန်းနေ့ကို နှစ်သစ်အဖြစ် သတ်မှတ်ပြီး ဒီရက်ဟာ ပုံမှန်အားဖြင့် ဧပြီ ၁၃ ရက်နေ့ဖြစ်ကြောင်း၊ အခု ယူနက်စ်ကိုရဲ့ ရှေးဟောင်းအမွေအနှစ် အဖြစ်သတ်မှတ်ခံရလို့ ၂၀၂၄ ထိုင်းဆုန်ကရန်သင်္ကြန်ပွဲကို ဧပြီ တစ်လလုံးကျင်းပသွားမယ်လို့ ထိုင်းအစိုးရက ထုတ်ပြန်ကြေညာခဲ့ပါတယ်။

Ref: nationthailand
MKF-001

#MeKongNews

#ဆုန်ကရန်

#ထိုင်းသင်္ကြန်

#ယူနက်စကို

#ကျင်းပ

#တစ်လလုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)