မဲခေါင်၊ ဇန်နဝါရီ ၃၁
ဇန်နဝါရီ ၄ ရက်နေ့ ညသန်းခေါင်းကျော်က ဖြစ်ပွားခဲ့တဲ့ ထိုင်ဝမ်မင်းသမီးဆီကနေ ဘတ် ၂၇၀၀၀ အကျပ်ကိုင် ခြိမ်းခြောက်တောင်းခံခဲ့မှုနဲ့ပတ်သက်လို့ ဘန်ကောက်မြို့ပြရဲဗျူရိုက ဇန်နဝါရီ ၃၀ ရက်နေ့မှာ ထုတ်ပြန်ချက် တစ်စောင်ထုတ်ခဲ့ပြီး ပါဝင်ပတ်သက်ခဲ့တယ်လို့ ယူဆရတဲ့ ရဲအရာရှိ ၇ ဦးကို ရာထူးကရပ်စဲပြီး အပြစ်ပေါ်လွင်ခဲ့ရင် ရာဇဝတ်မှုနဲ့ပါအရေးယူသွားမယ်လို့ တော်ဝင်ထိုင်းရဲတပ်ဖွဲ့က အတည်ပြုပါတယ်။
အသက် ၃၂ နှစ်ရှိ ထိုင်ဝမ်နာမည်ကြီးမင်းသမီး ချာလီနီအန်ကို ဇန်နဝါရီ ၄ ရက် ဒေသစံတော်ချိန် နံနက် ၁ နာရီမှာ ဘန်ကောက် ဟွေ့ခွမ်စစ်ဆေးရေးဂိတ်ဖြတ်လာစဉ် တာဝန်ကျရဲ ၇ ဦးက အရက်အလွန်အကျူးသောက်လာတယ်ဆိုပြီး ဦးစွဲစွပ်စွဲကာ ငွေကြေးတောင်းခံတာ ဖြစ်ပါတယ်။
Grab ကားပေါ်မှာ သူငယ်ချင်းတွေနဲ့အတူလာတဲ့ ချာလီနီအန်က အရက်မသောက်ထားကြောင်း ငြင်းဆိုတော့ ဗီဇာသက်တမ်းကုန်နေပြီလို့အကြောင်းပြပြီး ရဲစခန်းကိုခေါ်ကာ ၂ နာရီကြာ မဟုတ်တမ်းတရားတွေစွပ်စွဲပြီး ဘတ်ငွေ ၂၇၀၀၀ ကို ခြိမ်းခြောက်ရယူခဲ့တယ်လို့ မင်းသမီးက သူ့အင်စတာဂရမ်မှာ ဒီဖြစ်စဉ်ကို ဗီဒီယိုနဲ့တကွ တင်ခဲ့ပါတယ်။
ဒါ့အပြင် ထိုင်းရဲတွေကို ဆဲရေးပြီး နောက်ဘန်ကောက်ကို ဘယ်တော့မှ ပြန်မလာတော့ဘူးလို့ ရေးတင်ခဲ့ပါတယ်။
ဒီဖြစ်စဉ်မှာ အကျပ်ကိုင်တဲ့ရဲတွေက ချာလဇီနီအန်ရဲ့ အင်စတာဂရမ်က ပို့စ်တွေ၊ ဗီဒီယိုတွေကို ပြန်ဖျက်ဖို့ ခြိမ်းခြောက်ခဲ့သလို Grab တက္ကဆီသမား အသက် ၄၀ အရွယ် ဗစ်ချာရတ် ဆိုသူကိုလည်း မင်းသမီးနဲ့အဖွဲ့ဟာ အရက်အမူးလွန်နေတာဖြစ်ကြောင်း လိမ်လည်ထွက်ဆို မှတ်တမ်းယူခဲ့ပါတယ်။
ဒါကြောင့် ဘန်ကောက်မြို့တော်ရဲဗျူရိုကို ဒီအမှုကိုင်တွယ်စစ်ဆေးဖို့ ထိုင်း စသုံးလုံး အကြီးအကဲ ကစ်တီပရာပက်စ်က အမိန့်ပေးခဲ့ပြီး အဲဒီနောက်မှာ ရဲ ၇ ယောက်ကို တာဝန်ရပ်စဲကာ ပြစ်မှုကျူးလွန်ခဲ့ရင် ရဲအရာရှိမကလို့ ဘယ်သူပဲဖြစ်ဖြစ် ရာဇဝတ်မှုနဲ့ အရေးယူခံရမယ်လို့ စာထုတ်ပြီး သတင်းစာရှင်းလင်းပွဲ လုပ်သွားခဲ့တာဖြစ်ပါတယ်။
ထိုင်းနိုင်ငံဟာ ၂၀၂၂ ခုနှစ်က နိုင်ငံခြားခရီးသွား စံချိန်တင် ၁၂ သန်းဝန်းကျင်ရှိခဲ့ပြီး ဒီလုပ်ငန်းကနေ နိုင်ငံဝင်ငွေ များစွာရရှိစေဖို့ ဆက်လက်စီမံကိန်းရေးဆွဲလုပ်ဆောင်နေရာမှာ နာမည်ကြီးမင်းသမီးတစ်ဦးအပေါ် အကျပ်ကိုင် ငွေညှစ်ခဲ့တဲ့ ရဲတွေကြောင့် နိုင်ငံခရီးသွားလုပ်ငန်းပုံရိပ် ထိခိုက်ပျက်စီးရသလို ထိုင်းရဲတပ်ဖွဲ့ရဲ့ အကျင့်ပျက်ခြစားမှုတွေဟာလည်း ကမ္ဘာသိဖြစ်သွားခဲ့လို့ သိက္ခာ အထူးကျဆင်းခဲ့ရပါတယ်လို့ ထိုင်းမီဒီယာတွေက ဆိုပါတယ်။
MKF – 001
# MeKongNews
Ref:Khaosod
