မဲခေါင်၊ မတ် ၁၁
ဆိုက်ဘာလိမ်လည်မှုတွေ များလွန်းလာတာကြောင့် ထိုင်းဗဟိုဘဏ်ဟာ နိုင်ငံအတွင်းက ဘဏ်တွေအားလုံး မိုဘိုင်းဘဏ်အကောင့်မူဝါဒသစ်တွေ ချမှတ်ပေးပြီး အကောင့်ပိုင်ရှင်တွေဟာ ငွေပမာဏများများလွှဲရင် ဇီ၀စကင်န်ဖတ်မှုတွေ မဖြစ်မနေ လုပ်ရတော့ပါမယ်။
လက်ဗွေ၊ မျက်နှာ၊ မျက်ကြည်လွှာ အစရှိတဲ့ ဇီ၀ထောက်ခံချက် စကင်န်ဖတ်မှု (biometric scans) တွေကို မိုဘိုင်းဘဏ်အကောင့်အားလုံးမှာ အကောင့်ဖွင့်ကတည်းက ထည့်သွင်းပြီး ငွေလွှဲ၊ ငွေချေး၊ ငွေလက်ခံမှုတိုင်း ဒီသတ်မှတ် စကင်န်ဖတ်မှုတွေလုပ်မှအောင်မြင်မယ့် စနစ်သစ်ကို မိတ်ဆက်လုပ်ဆောင်တော့မယ်လို့ ထိုင်းဗဟိုဘဏ်အုပ်ချုပ်ရေးမှူး ဆီသာပတ်ဆူတီဝပ်တနာရူးပတ်က မတ်လ ၉ ရက်နေ့မှာ အတည်ပြုထုတ်ပြန် ခဲ့ပါတယ်။
ဒါကြောင့် လက်ရှိကတည်းက မိုဘိုင်းဘဏ်အကောင့်ရှိပြီးသားသူတွေဟာ သတ်မှတ်ထားတဲ့ အဆင့်မြှင့်တင်မှု (updated) တွေကို လုပ်ဆောင်ထားရမှာဖြစ်ပြီး Device တစ်ခု (ဖုန်း၊ Tablet ၊ ကွန်ပျူတာ စသဖြင့်) မှာ မိုဘိုင်းဘဏ်အကောင့် တစ်ကောင့်သာဖွင့်ခွင့်ရှိခြင်း၊ တခြားသူနာမည်နဲ့ အကောင့်ခွဲတွေလုပ်ခြင်းတွေကို ကန့်သတ်တဲ့ စည်းမျဉ်းလည်း ချမှတ်တော့မှာဖြစ်ကြောင်း၊ နိုင်ငံတစ်ဝန်းအစိုးရဘဏ်တွေအပြင် ပုဂ္ဂလိကဘဏ်အားလုံး ဒီ စီးမျဉ်းသစ်၊ စနစ်သစ်၊ နည်းပညာသစ်ကို ဇွန်လမှာ မဖြစ်မနေစတင်ကျင့်သုံးရမယ်လို့ ရူးပတ်က ထုတ်ပြန်ခဲ့တယ်။
ထိုင်းဗဟိုဘဏ်က သူတို့မိုဘိုင်းဘဏ်အကောင့်တွေမှာ ဘတ် ၅၀၀၀၀ နဲ့အထက် ဒစ်ဂျစ်တယ်ငွေကြေးလွှဲပြောင်းမှုလုပ်ရင်၊ တစ်နေ့ ဘတ် ၂ သိန်းနဲ့အထက်ငွေလွှဲရင်၊ တစ်ခါချေးငွေလွှဲ ဘတ် ၅၀၀၀၀ နဲ့အထက်ရှိရင် မျက်နှာ စကင်န်ဖတ်မှုကို အောင်မြင်စွာသုံးနိုင်မှ ထုတ်ပေးဖို့ စီစဉ်ထားကြောင်း၊ အစပိုင်းသုံးစွဲသူတွေ အခက်အခဲရှိနိုင်ပေမယ့် မိုဘိုင်းဘဏ်စာရင်တွေကနေ ငွေကြေးလိမ်လည်မှုတွေဟာ ဘတ် ၅၀၀၀၀ ဝန်းကျင်ကနေ လိမ်လည်မှုများလို့ ဒီစနစ်ဟာနောက်ပိုင်း သုံးစွဲသူတွေအတွက် အလိမ်ခံရမှုပပျောက်သွားနိုင်မယ်လို့ ရူးပတ်က တိုက်တွန်းပြော ကြားခဲ့ပါတယ်။
စည်းမျဉ်းသစ်မှာ လူမှုကွန်ရက်ပလက်ဖောင်းတွေကနေ ငွေလွှဲအတည်ပြုမှု၊ SMS မက်ဆေ့ချ်၊ အီးမေးလ် စတဲ့ ကြားခံလင့်ခ်တွေကနေ အတည်ပြုမှုတွေကိုလည်း ဖျက်သိမ်းပိတ်ပင်ဖို့ ဆန္ဒရှိနေကြောင်း သိရပါတယ်။
ထိုင်းနိုင်ငံ မှာ ၂၀၂၂ မတ်လကနေ ဒီဇင်ဘာလအကြား ဒစ်ဂျစ်တယ်ငွေကြေးသုံးဘဏ်အကောင့်တွေကနေ အွန်လိုင်းရှောပင် ကိစ္စတွေက ငွေကြေးလိမ်လည်မှု ၅၀၀၀၀၊ ငွေလွှဲခြင်းကနေ လိမ်လည်မှု ၂၀၀၀၀၊ ငွေချေးယူမှုကနေ အမှု ၁၈၀၀၀ နဲ့ Call Center ကနေ လိမ်လည်မှု ၁၃၀၀၀ အထိရှိခဲ့ပြီး အကောင့်ခွဲ၊ အကောင့်တုတွေကနေ လိမ်လည်မှု ၅၈၀၀၀ ကနေ ငွေကြေးဘတ် ၅ ဒဿမ ၅ ဘီလီယံအထိ လိမ်လည်ခံရမှုဖြစ်ပွားခဲ့ပါတယ်။
MKF – 001
Ref: bangkokpos