မဲခေါင်၊ ဧပြီ ၂၁
အီတလီနိုင်ငံ ကာပရီမြို့မှာ ဧပြီ ၁၇ ရက်ကနေ ၁၉ ရက်အထိ ကျင်းပပြုလုပ်တဲ့ G7 အစည်းအဝေးအပြီး ပြည်သူကို ဒုက္ခပေးအကြမ်းဖက်နေတဲ့ မြန်မာစစ်ကောင်စီကို လေယာဉ်ဆီနဲ့ စစ်လက်နက် အသုံးအဆောင်တွေကို နိုင်ငံတကာက ပေးပို့နေမှု ရပ်တန့်သွားရေး တိုက်တွန်းထုတ်ပြန်သွားခဲ့ပါတယ်။
G7 နိုင်ငံခြားရေးဝန်ကြီးများ အစည်းအဝေးမှာ ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ယူကေ၊ အမေရိကန်နဲ့ အီးယူ အဆင့်မြင့် ကိုယ်စားလှယ်တွေ တက်ရောက်ခဲ့ကြတာဖြစ်ပြီး မြန်မာစစ်ကောင်စီဟာ အာဏာသိမ်းပြီး ကတည်းက အများပြည်သူနဲ့ဆိုင်တဲ့ အိမ်၊ စာသင်ကျောင်း၊ ဆေးရုံ၊ ဘုရားကျောင်းတွေကို မဆင်မခြင် လေကြောင်းတိုက်ခိုက်မှုတွေ လုပ်နေခဲ့တာဟာ ပိုဆိုးသထက်ဆိုးလာတယ်လို့ ဆိုပါတယ်။
ဒါကြောင့် နိုင်ငံအားလုံးက စစ်ကောစီအကြမ်းဖက်မှုကို ဆက်လက်ဖြစ်တည်ခွင့်မပေးဖို့ လေယာဉ်ဆီနဲ့ စစ်လက်နက်ပစ္စည်းတွေ လုံး၀ ရောင်းချမှုပိတ်ပင်ဖို့ ပူးပေါင်း တိုက်တွန်းကြေညာချက် ထုတ်ပြန်သွားတာဖြစ်ပါတယ်။
ဒီထုတ်ပြန်ချက်မှာ အာဆီယံရဲ့ မြန်မာ့အရေး အချက် ၅ ချက်ပါ ဘုံသဘောတူညီချက်၊ ကုလသမဂ္ဂရဲ့ မြန်မာ့အရေး လမ်းညွှန်ချက် ၂၆၆၉ ကို စစ်ကောင်စီ အမြန်ဆုံးလိုက်နာဖို့၊ မဖြစ်မနေ စစ်မှုထမ်းဥပဒေပြဌာန်းခြင်း ကို ဖျက်သိမ်းဖို့၊ နိုင်ငံရေးအကျဉ်းသားအားလုံး ပြန်လွှတ်ပေးပြီး ပြည်သူရွေးချယ်ထားတဲ့ ပြည်သူ့အစိုးရနဲ့ ဒီမိုကရေစီနိုင်ငံ ပြန်လည် အသက်သွင်း ထူထောင်ဖို့၊ လူသားချင်းစာနာနားလည်မှုဆိုင်ရာ အကူအညီတွေ ပေးနေမှုမှာ စစ်ကောင်စီက ပိတ်ဆို့ထားမှုတွေကို အမြန်ဆုံး ရပ်တန့်ဖို့၊ အကြမ်းဖက်မှု မှန်သမျှ အမြန်ဆုံး ရပ်တန့်ဖို့လည်း ထည့်သွင်း ထုတ်ပြန်သွားပါတယ်။
Ref: matichon
MKF-001