မဲခေါင်၊ မတ် ၈
ထိုင်ဝမ်က ကိုယ်ပိုင်အုပ်ချုပ်ခွင့်ရ နိုင်ငံအဖြစ် ရပ်တည်နေချိန် တရုတ်က သူတို့ပိုင်နယ်မြေလို့ တစ်လျှောက်လုံး သတ်မှတ် ခြိမ်းခြောက်နေတဲ့ အနေအထားမှာ ဒီလပိုင်းထဲ တရုတ်သင်္ဘော ၂ စီးက ထိုင်ဝမ် အစွန်အဖျားဒေသ ကျွန်းတွေကို ပေးတဲ့ ရေအောက် အင်တာနက် ကေဘယ်ကြိုးတွေကို ဖြတ်တောက်သွားကြောင်း APnews က ဖော်ပြသွားခဲ့ပါတယ်။
ကျွန်းနိုင်ငံငယ်လေး ဖြစ်တာကြောင့် ရေအောက် အင်တာနက် ကေဘယ်လိုင်းကို အားထားပြီး အလုပ်အားလုံး လည်ပတ်နေရတဲ့ ထိုင်ဝမ်ရဲ့ အစွန်အဖျားက ကျွန်းတွေဟာ တရုတ် ကုန်းမကြီးနဲ့ နီးကပ်စွာ တည်ရှိနေချိန် တရုတ် သင်္ဘောတွေက အင်တာနက် ကေဘယ်ကို ဖြတ်တောက်သွားလို့ စီးပွားရေး၊ လူမှုရေး အားလုံး ဒုက္ခရောက် နေရပြီ ဖြစ်ပါတယ်။
ထိုင်ဝမ်ရဲ့ အကြီးဆုံး အင်တာနက် ထောက်ပံ့ပေးတဲ့ ချောင်ဟွာ တယ်လီကွန်း ကုမ္ပဏီက သူတို့ လူဦးရေ ၁၄,၀၀၀ နေထိုင်တဲ့ ထိုင်ဝမ် အစွန်အဖျားက မတ်ဆုကျွန်းကို ပေးထားတဲ့ ပင်လယ် ရေအောက် အင်တာနက် ကေဘယ်ကြိုး ၂ ချောင်းကို ဖေဖော်ဝါရီ ၂ ရက်နေ့က တရုတ်ငါးဖမ်းသင်္ဘော တစ်စီးက ဖြတ်တောက်သွားပြီး တရုတ်ဘက် မောင်းဝင်သွားကြောင်း၊ နောက် ၆ ရက်အကြာမှာ တရုတ်ကုန်တင်သင်္ဘော တစ်စီးက ကျန်ရှိနေ သေးတဲ့ ကေဘယ်တစ်ခုကို ဖြတ်သွားလို့ အင်တာနက်တွေ ဒီကျွန်းပေါ် မရနိုင်တော့ဘူးလို့ ထုတ်ပြန်ခဲ့ပါတယ်။
ဒါကြောင့် လက်ရှိမှာ အကန့်အသတ်ရှိလွန်းတဲ့ မိုက်ခရိုဝေ့ဗ် ရေဒီယို ထုတ်လွှင့်မှုစနစ် ကြားခံသုံးပြီး စာတစ်ကြောင်းပို့ဖို့ နာရီနဲ့ချီ စောင့်ဆိုင်းရတဲ့ စနစ်ကို ဒေသတွင်း ကျွန်းသူကျွန်းသားတွေ သုံးနေရပြီး ဈေးရောင်းတာ၊ ဆေးခန်းကြိုတင်တုံကင်ယူတာ၊ နိုင်ငံခြား ခရီးသွား လုပ်ငန်းတွေ ကြိုတင် လက်မှတ် စီစဉ်တာ၊ မိသားစုချင်း ဆက်သွယ်တာတွေမှာ အားလုံး ကမောက်ကမ ဖြစ်နေရပါတယ်။
တရုတ် အစိုးရဟာ ယူကရိန်းကို ရုရှား ကျူကျော်မှု စတင်ပြီးနောက်ပိုင်း ထိုင်ဝမ်ပိုင်နက်တွေထဲ အစဉ်အမြဲ ဆိုသလို တိုက်လေယာဉ်တွေ၊ စစ်သင်္ဘောတွေ စေလွှတ်ပြီး ခြိမ်းခြောက်မှုတွေ မြှင့်တင် လုပ်ဆောင်နေတဲ့ အတွက် ထိုင်ဝမ်ကို စစ်တိုက်ပြီး သိမ်းပိုက်ဖို့ ပိုနီးစပ်လာကြောင်း နိုင်ငံရေး သုတေသီတွေက သုံးသပ် နေကြပါတယ်။
ယူကရိန်းကို ရုရှား စတင်ကျူးကျော်တော့လည်း အင်တာနက် နည်းပညာ သုံးမရအောင် ဦးဆုံး ဗျူဟာချမှတ်ပြီး တိုက်ခိုက်ဖျက်ဆီးခဲ့တဲ့ ပုံစံအတိုင်း တရုတ်ကလည်း ထိုင်ဝမ်ကို အင်တာနက် ဖြတ်တောက်မှုတွေ စတင်လာတာ ဖြစ်မယ်လို့ ယူဆနေသူတွေလည်း အများအပြား ရှိပါတယ်။
Ref: apnews
MKF-001