မဲခေါင်၊ ဧပြီ ၂၅
ရှမ်းပြည်တောင်ပိုင်း၊ အင်းလေးဒေသတော်လှန်ရေးတပ်ဖွဲ့ဖြစ်တဲ့ အင်းလေးကာကွယ်ရေးတပ်ဖွဲ့အမှတ် ၁၀၀၉ IPDF က တပ်ဖွဲ့ဝင်တွေအတွက် ကျည်ကာဦးထုပ်နဲ့ ကျည်ကာ Vest တွေအတွက် ကမ်ပိန်းပြုလုပ်ကြောင်း ဒီနေ့ဧပြီ ၂၅ ရက်မှာ အဲ့ဒီ့တပ်ရင်းက တာဝန်ရှိသူတွေထံက သိရပါတယ်။
မြေပြင်တိုက်ပွဲတွေ ပြင်းထန်လာတာနဲ့အမျှ ရဲဘော်တွေ အထိခိုက်နည်းအောင် ရဲဘော်တွေကို ထိုက်သင့်သလောက် ကာကွယ်ပေးနိုင်ဖို့ ကျည်ကာဦးထုပ်(Helmet) တပ်ဆင်ပေးနိုင်ရန် ရည်ရွယ်ပြီး ကမ်ပိန်းပြုလုပ်ရတာလို့ ဆိုပါတယ်။
တိုက်ပွဲတွေမှာ ဦးခေါင်းနဲ့ ဝမ်းဗိုက်ပိုင်းထိခိုက်လို့ ကျဆုံးတာ၊ ပြင်းထန်ဒဏ်ရာတွေရတာကြောင့် ခေါင်းနဲ့ ဗိုက်ကိုကာကွယ်နိုင်ဖို့ လိုအပ်နေတဲ့ ကျည်ကာ ဦးထုပ် ကို အဓိက ထား ရန်ပုံငွေရှာဖွေရတာလို့ ၁၀၀၉ IPDF ရဲ့တပ်ရင်းမှူး အင်းဆားကူးက ပြောပါတယ်။
“ခု ဧပြီ ၁၃ ရက် က ဖြစ်တဲ့ ရဲဘော်တစ်ယောက်လဲ ခေါင်းထိလို့ နောက်စေ့ပွင့်ပြီး ကျသွားရတာ၊ ပြီးခဲ့တဲ့ ၂၀၂၃ ၊ ၁၂ ပိုင်း ၁၁ ရက်နေ့က ကျသွားတဲ့ရဲဘော်ကလည်း ခေါင်းထိပြီးတော့ ကျသွားတယ်ဆိုတော့ ကျနော့်ရဲဘော်တွေရှေ့တန်းမှာ ခေါင်းထိလို့ကျတာ၊ ဆေးရုံတက်ကုသနေရဆဲသူတွေလဲရှိနေတာကြောင့် ရှေ့မှာ တိုက်ပွဲပြင်းထန်လာတာနဲ့အမျှ ခေါင်းအဓိက မထိအောင် တပ်ရင်းအနေနဲ့ ဦးထုပ်ကမ်ပိန်းလုပ်ရတာပါ” လို့ မဲခေါင်ကိုပြောပါတယ်။
တိုက်ပွဲတွေအတွင်းမှာ ရဲဘော်တွေ ကျဆုံးရတာဟာ ခေါင်းနဲ့ဗိုက်ကို ထိလို့ ကျဆုံးရဖြစ်လို့ ဦးထုပ်နဲ့ ကျည်ကာ Vest တွေ ရဲဘော်တွေအတွက် ရစေချင်တာလို့ ယင်းတပ်ရင်းရဲ့ ဆေးမှူး CDM သူနာပြုဆရာမ မယ်ကြာချည်သန့်က မဲခေါင်ကို ပြောပါတယ်။
“လေယာဉ်ကလဲ တအားလာ ပစ်ခတ်ဗုံးကြဲ၊ ရဲဘော်တွေလဲ ခေါင်းနဲ့ဗိုက်အများဆုံးထိ၊ ကျဆုံးတာအပြင် ခုလဲ ဆေးရုံမှာကုသဆဲရဲဘော်တွေလည်းရှိနေသေးတယ်၊ လိုတာတော့ အများကြီးပဲ၊ လောလောဆယ်တော့ ဦးထုပ်ကို ဦးစားပေးလိုက်တာပါ၊ အမှန်တော့ ပြီးခဲ့တဲ့နှစ်ကုန်ကတဲက ဝယ်ပေးချင်နေတာ၊ ရဲဘော်သစ်က များလာတော့ သေနတ်နဲ့ကျည်လိုအပ်ချက်များလာလို့ အဲဖက်ကိုဖြည့်ဆည်းရင်း နောက်ထပ်ရဲဘော်တွေကျရတာ၊ ခုတော့မကြည့်ရက်တော့ဘူး၊ ဦးထုပ်ကို ဦးစားပေးရန်ပုံငွေရှာရတာပါ၊ ကျမတို့မှာ ပြည်သူက အဓိကပါ” လို့ သူက မဲခေါင်ကို ပြောပါတယ်။
ပြီးခဲ့တဲ့ ဧပြီ ၁၃တိုက်ပွဲအတွင်း ၁၀၀၉ IPDF က ရဲဘော် ၂ ဦးကျဆုံးသလို တပ်ရင်းမှူးတွင်လည်း ပေါင်ထိမှန်ဒဏ်ရာရရှိခဲ့တာအပြင်အခြား ရဲဘော်အချို့လဲ ထိခိုက်မှုတွေရှိနေခဲ့တယ်လို့ သိရပါတယ်။
အင်းလေး ၁၀၀၉ IPDF တပ်ရင်းဟာ အင်းလေးဒေသ၊ ညောင်ရွှေမြို့နယ်တစ်ခုလုံးကို ကိုယ်စားပြုတဲ့ ကာကွယ်ရေးတပ်ဖြစ်လို့ အဝေးရောက် အင်းသူအင်းသားတွေ၊ ပြည်ပနိုင်ငံခြားရောက် အင်းသူအင်းသားတွေနဲ့ အင်းသားမဟုတ်ပေမယ့် အင်းသူ/အင်းသား၊ အင်းလေးကိုချစ်တဲ့ မိဘပြည်သူ အလှူရှင်တွေ ပါဝင်ကူညီပေးကြဖို့ အင်းလေးသို့အပြန်၊ 1009 ipdf စတဲ့ ထောက်ပို့အဖွဲ့ရဲ့ အွန်လိုင်းစာမျက်နှာတွေကတဆင့်ဆက်သွယ် ကူညီထောက်ပံ့ပေးကြဖို့ နှိုးဆော်ထားပါတယ်။
ကမ်ပိန်းကာလကို ဧပြီလ ၂၅ ရက် ကနေ ဇွန်လ ၁၅ ရက်အထိ သတ်မှတ်ထားပြီး ဦးထုပ် ၁ လုံးကို ကျပ်ငွေ ၄သိန်းခွဲနဲ့ အလုံး ၁၀၀ စာဖြစ်တယ်လို့သိရပါတယ်။
လက်ရှိမှာ အင်းလေးပြည်သူ့ကာကွယ်ရေးတပ်ဖွဲ့ 1009 IPDF ဟာ မိုးဗြဲ၊ ဖယ်ခုံ၊ နောင်ဝိုးနဲ့ အင်းလေးဒေသ ညောင်လေးပင် တကြောမှာ မဟာမိတ်တပ်ရင်းတွေနဲ့အတူ တိုက်ပွဲဝင်နေကာ အင်းလေးဒေသကို ထိုးဖောက်တိုက်ပွဲဝင်နေတယ်လို့ သိရပါတယ်။
MK-012