မဲခေါင်၊ ဧပြီ 9
တရုတ်စစ်သင်္ဘောနဲ့ တိုက်လေယာဉ်တွေ ထိုင်ဝမ်ပိုင်နက်ထဲ ဖြတ်ကျော်ဝင်ရောက်ခဲ့ပြီးနောက် တရုတ်က ဧပြီ ၈ ရက်နေ့ကစပြီး ထိုင်ဝမ်ရေလက်ကြားမှာ စစ်ရေးလေ့ကျင့်မှု ၃ ရက်တာ လုပ်ဆောင်သွားမယ်လို့ ထုတ်ပြန်ကြေညာသွားခဲ့ပါတယ်။
ထိုင်ဝမ်သမ္မတ ဆိုင်အင်းဝမ်ကို အမေရိကန်အောက်လွှတ်တော် ဥက္ကဠ မက္ကာသီနဲ့တွေ့ဆုံခဲ့ရင် တိုက်ခိုက်ရလိမ့်မယ်လို့ တရုတ်ဘက်က အစောပိုင်းကတည်းက သတိပေး ခဲ့ပေမယ့် ဆိုင်အင်းဝမ်က မက္ကာသီနဲ့တွေ့ဆုံခဲ့သလို ဧပြီ ၈ ရက်နေ့မှာလည်း အမေရိကန်အောက်လွှတ်တော်နိုင်ငံခြားရေး ကော်မတီဥက္ကဌ မိုက်ကယ်မက်ပေါလ်ဦးဆောင်တဲ့ နိုင်ငံရေးကိုယ်စားလှယ်တွေနဲ့ ထပ်တွေ့ဆုံသွားဦးမှာဖြစ်ပါ တယ်။
ဒါကြောင့် တရုတ်ပြည်သူ့လွတ်မြောက်ရေးတပ်မတော် အရှေ့ပိုင်းတိုင်းစစ်ဌာနချုပ်က ဧပြီ ၈ ရက်နေ့မှာ တိုက်ခိုက်ရေးအသင့်အနေအထား စစ်ရေးလေ့ကျင့်မှုတွေကို အစီအစဉ်အတိုင်း ထိုင်ဝမ်ရေလက်ကြား မြောက် ဘက်၊ တောင်ဘက်နဲ့ အရှေ့ဘက်တွေမှာ ၃ ရက်တာ လေ့ကျင့်ပြင်ဆင်သွားမယ်လို့ ထုတ်ပြန်ကြေညာခဲ့ပါတယ်။
ထိုင်ဝမ်အစိုးရက ချက်ချင်းထုတ်ပြန်ချက်မထုတ်သေးပေမယ့် ပြီးခဲ့တဲ့ ၂၄ နာရီအတွင်း မူမမှန်တဲ့ ပုံစံနဲ့ တရုတ် လေယာဉ် ၄ စီး လေပိုင်နက်ထဲ ဝင်လာကြောင်း၊ ရေလက်ကြားမှာ တရုတ် လေယာဉ်တင်သင်္ဘောနဲ့ တခြား သင်္ဘောတွေလည်း ဝင်ရောက်လာတာတွေ့ရကြောင်း ထုတ်ပြန်ထားပါတယ်။
ထိုင်ဝမ်ကို ၂၀၀၈ ခုနှစ်ကနေ ၂၀၁၆ ခုနှစ်အထိ သမ္မတအဖြစ် အုပ်ချုပ်ခဲ့တဲ့ ကူမင်တန်ခေါင်းဆောင်ဟောင်း မာယင်းဂျူက တရုတ်ပြည်ကို ၁၂ ရက်ကြာ အလည်အပတ်ခရီးသွားပြီး ဧပြီ ၇ ရက်နေ့မှာ ထိုင်ဝမ်လေဆိပ်ကို ပြန်ရောက်လာစဉ် မီဒီယာတွေ့ဆုံမှုမှာ “ ကျွန်တော်တို့နိုင်ငံ စီမံခန့်ခွဲသူတွေဟာ ထိုင်ဝမ်ကို အန္တရာယ် ဆီတွန်းပို့နေသလိုဖြစ်နေတယ်။ နိုင်ငံအနာဂတ်အတွက် ရွေးချယ်စရာက ငြိမ်းချမ်းရေးနဲ့ စစ်ပွဲထဲက တစ်ခုခုကိုပဲ ရွေးရတော့မယ်”လို့ ပြောသွားခဲ့ပါတယ်။
မာယင်းဂျူဟာ ၁၉၄၉ ခုနှစ်က မော်စီတုန်းခေါင်းဆောင်တဲ့ တရုတ်ကွန်မြူနစ်တပ်ကို ပြည်တွင်းစစ်ပွဲမှာ ရှုံးခဲ့ရပြီး နောက် တရုတ်ပြည်ကို အလည်အပတ်သွားတဲ့ ပထမဆုံးသော ထိုင်ဝမ် သမ္မတဟောင်းဖြစ်လာပါတယ်။ ဒါပေမဲ့ သမ္မတရာထူးယူထားချိန်အတွင်း တရုတ်ကို သွားရောက်လည်ပတ်တဲ့ ထိုင်ဝမ်သမ္မတ ယနေ့အထိ မရှိသေးဘူးလို့ လည်း သိရပါတယ်။
MKF-001
#Mekongnews
#တရုတ်
#ထိုင်ဝမ်
#စစ်ရေးတင်းမာ
Ref: asiaone
