မဲခေါင်၊ မတ် ၁၂
ပြီးခဲ့တဲ့လပိုင်းအတွင်း ပင်လယ်နက်ဒေသမှာ အင်အားကြီးစိုးထားနိုင်ခဲ့တဲ့ ရုရှားရေတပ် စစ်သင်္ဘောအုပ်စုကို ယူကရိန်းဘက်က ပြိုလဲလုနီးပါအခြေအနေရောက်တဲ့အထိ တိုက်ခိုက်ဖျက်ဆီးနိုင်ခဲ့လို့ ရုရှားသမ္မတပူတင်ဟာ ရေတပ်ချုပ် နီကိုလိုင်ယက်ဗ်မီနော့ဗ်ကို ထုတ်ပယ်လိုက်ပြီး မြောက်ပိုင်းတိုင်းရေတပ် တပ်ချုပ် အလက်ဇန္ဒား မွိုင်ဆိဗ်ကို အစားထိုးခန့်အပ်လိုက်ကြောင်း သိရှိရပါတယ်။
ဒီသတင်းကို စိန့်ပီတာစဘာ့ဂ်အခြေစိုက် ပုဂ္ဂလိက သတင်းအေဂျင်စီ Fontanka သတင်းဌာနက ဖော်ပြခဲ့တာဖြစ် ပြီး ၂၀၀၉ ခုနှစ်ကတည်းက ရေတပ်တပ်ချုပ်တာဝန်ယူခဲ့တဲ့ ယက်ဗ်မီနော့ဗ်ကို ဘာကြောင့် မွိုင်ဆိဗ်နဲ့ အစားထိုး ခဲ့သလဲဆိုတာကိုလည်း အကြောင်းပြချက် ဖော်ပြခြင်းမရှိဘဲ တင်ပြသွားတာဖြစ်ပါတယ်။
ဖြစ်နိုင်ခြေအရှိဆုံးအဖြစ် သုံးသပ်မှုတွေမှာတော့ ပြီးခဲ့တဲ့ လပိုင်းအတွင်း ယူကရိန်းဘက်က ပင်လယ်ဒရုန်းတွေ၊ ကာမီကာဇီဒရုန်းနဲ့ ဒုံးကျည်တွေသုံးပြီး ၂၀၁၄ ခုနှစ်ကတည်းက ရုရှားကျူးကျော်သိမ်းပိုက်သွားတဲ့ ခရိုင်းမီးယား ကမ်းခြေအခြေစိုက် ရုရှားစစ်သင်္ဘောပေါင်းများစွာကို ဖျက်ဆီးတိုက်ခိုက်နိုင်ခဲ့လို့ ရေတပ်ချုပ်နေရာ အစားထိုးမှု ဖြစ်မယ်လို့ ဖော်ပြပါရှိပါတယ်။
ဖေဖော်ဝါရီလလယ်ပိုင်းက ယူကရိန်းရဲ့ လေကြောင်းတိုက်ခိုက်မှုကြောင့် ရုရှား ကမ်းတက်စစ်သင်္ဘောကြီး ပေါက်ကွဲနစ်မြုပ်ခဲ့ရသလို ဒီတစ်ပတ်အတွင်းမှာလည်း ပင်လယ်ဒရုန်းကြောင့် ရုရှားဆီတန်ဂါသင်္ဘော မီးလောင် ပေါက်ကွဲခဲ့ရပါသေးတယ်။
ဆီဖြည့်သင်္ဘော ဆာဂျီကိုတော့ဗ်ဟာ ယူကရိန်းရဲ့ ဂျက်စကီးပါဝါသုံး ပင်လယ်ဒရုန်း ထိမှန်လို့ တစ်စစီ ပျက်စီးပေါက်ကွဲသွားခဲ့တာဖြစ်ပြီး သင်္ဘောတန်ကြေးက ပေါင် ၅၁ သန်းအထိ တန်ကြောင်း သိရှိရပါတယ်။ ခရိုင်းမီးယားရဲ့ ဖီအိုဒိုးရှား ဆိပ်ကမ်းမှာ ဆီတင်သင်္ဘော ပေါက်ကွဲသွားလို့ ပူတင် အားအထားဆုံး ပင်လယ်ဖြတ် Kerch တံတားကြီးကိုလည်း ရုရှားဘက်က ပိတ်ထားလိုက်ပါတယ်။
ပြီးခဲ့တဲ့ ဖေဖော်ဝါရီ ဒုတိယ အပတ်တုန်းကလည်း ပူတင်အတွက် ဗယ်လင်တိုင်းနေ့လက်ဆောင်လို့ သမုတ်ပြီး ယူကရိန်းရဲ့ ကာမီကာဇီ ဒရုန်းတွေကနေ ရုရှားရဲ့ ပေါင် သန်း ၁၇၀ တန် ဆီဆာကူနီကော့ဗ် ကမ်းတက် သင်္ဘောကြီးကို ဖောက်ခွဲဖျက်ဆီး နိုင်ခဲ့တာကြောင့် ပင်လယ်နက်ထဲ မကြုံစဖူး သင်္ဘောများစွာ ပျက်ဆီးဆုံးရှုံးခဲ့တဲ့အတွက် ပူတင်ဟာ ရေတပ် တပ်ချုပ်ကို ရာထူးကထုတ်ပယ်ပြီး တပ်ချုပ်သစ် အစားထိုးလိုက်တာဖြစ်တယ်လို့ ဆိုပါတယ်။
Ref:Thesun
MKF-001
