မဲခေါင်၊ ဧပြီ ၂၇
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ သာလေးကျေးရွာမှာ စစ်မှုထမ်း ဆင့်ခေါ်စာကြောင့် စစ်မှုထမ်း အကြုံးဝင်သူတွေရဲ့ မိသားစုဝင်တွေဟာ စိုးရိမ်ပူပန်နေရတယ်လို့ စုံစမ်း သိရပါတယ်။
ပြီးခဲ့တဲ့ ရက်သတ္တပတ်လောက်က ကျေးရွာတွင်းနေထိုင်ကြတဲ့ အသက် ၂၀ နဲ့ ၃၀ ကြားအရွယ် အမျိုးသား ၅ ဦးကို ကျေးရွာ အုပ်ချုပ်ရေးမှူးနဲ့ အထွေထွေအုပ်ချုပ်ရေး ဦးစီးဌာန (ထွေအုပ်) ဝန်ထမ်းတွေက စစ်မှုထမ်း ဆင့်ခေါ်စာ ပို့ခဲ့တာလို့ ဆိုပါတယ်။
စာပို့ခံရသူနဲ့ နီးစပ်သူ တစ်ဦးက “ဆင့်ခေါ်စာလား။ မဲနှိုက်ဖို့ ဖောင်တင်ရတာလားတော့ မသိသေးဘူး။ သူတို့ (စစ်ကောင်စီ)လည်း အသေးစိတ် မပြောသေးဘူး။ ရက်နီးမှ သိရမယ်လို့ ပြောတယ်။ လောလောဆယ် တစ်ရွာလုံး စိတ်ဆင်းရဲနေကြတယ်” လို့ ပြောပါတယ်။
ဖောင်ဖြည့်ရမယ့် စာရွက်မှာ အမည်၊ အုပ်အကိုင်၊ သွေးအုပ်စု၊ မှတ်ပုံတင်နံပါတ်၊ နိုင်ငံကူးလက်မှတ် (Passport) နံပါတ် စတာတွေ ပါဝင်ပြီး စာပို့ခံရတဲ့သူတွေဟာ ဆေးစစ်ချက်ယူရမယ်လို့ ရွာခံတွေဆီက သိရပါတယ်။
ရွာခံ တစ်ဦးက “နိုင်ငံခြား သွားတဲ့လူတွေလည်း ဖြည့်ရမယ်လို့ ပြောတယ်။ ဒီမှာဖြည့်ပြီးတဲ့လူတွေ အချိန်မီ ရွာကို ပြန်မရောက်ရင် ဝရမ်းပါမယ်လို့ ကြားတယ်” လို့ ပြောပါတယ်။
ဧပြီလ ၂၅ ရက်နေ့ နေ့လည် ၁၂ နာရီတုန်းကလည်း ထွေအုပ်စာရေးနဲ့ အုပ်ချုပ်ရေးမှူးက စစ်မှုထမ်း အကြုံးဝင်သူတွေကို ဖောင်ဖြည့်ရမယ့် စာရွက်တွေ တစ်အိမ်တက်ဆင်း လိုက်ဝေခဲ့တယ်လို့ ဆိုပါတယ်။
ဒါပေမယ့် ညနေ ၃ နာရီမှာတော့ အဲဒီ စာရွက်တွေကို အုပ်ချုပ်ရေးမှူးက လိုက်လံ သိမ်းဆည်းခဲ့ပြီး စာရွက်ပြန်သိမ်းရတဲ့ အကြောင်းအရင်းကိုတော့ မဲခေါင်သတင်း အနေနဲ့ စုံစမ်းနေဆဲ ဖြစ်ပါတယ်။
သာလေးကျေးရွာမှာ အုပ်ချုပ်ရေးမှူးရဲ့ တူတော်စပ်သူ ၂ ဦးနဲ့ မူးယစ်ဆေး သုံးစွဲသူ တစ်ဦးဟာ စစ်မှုထမ်းစာရင်း ပါဝင်တယ်လို့ သတင်းတွေ ထွက်ပေါ်နေပြီး ဆေးစစ်ရမယ့်ရက်ကိုတော့ မသိရသေးဘူးလို့ ရွာခံတွေက ပြောပါတယ်။
MK-014
