မဲခေါင်၊ ဧပြီ ၁၇
ထိုင်းသင်္ကြန် ဆုန်ကရန်ပွဲတော်ရက် ဧပြီ ၁၁ ရက်ကနေ ၁၆ ရက်အတွင်း ယာဉ်မတော်တဆမှုတွေကြောင့် စုစုပေါင်း သေဆုံးသူ ၂၃၂ ဦးရှိခဲ့ကာ ဒဏ်ရာ ရရှိသူပေါင်း ၁၇,၇၇၅ ဦး ရှိခဲ့တယ်လို့ ထိုင်းနိုင်ငံ ပြည်သူ့ကျန်းမာရေး ဝန်ကြီးဌာန အထွေထွေ အတွင်းရေးမှူး ဒေါက်တာအိုပက်စ်က ထုတ်ပြန်သွားပါတယ်။
၄ နှစ်အတွင်း ပထမဆုံး အကြိမ် ကျင်းပခွင့်ပြန်ရတဲ့ ဆုန်ကရန်ပွဲတော ်ဖြစ်တာကြောင့် လမ်းပိတ်ဆို့မှုတွေဖြစ်ပြီး ယာဉ်မတော်တဆမှု များစွာလည်း ရှိခဲ့ရာက ဒဏ်ရာ ပြင်းပြင်းထန်ထန် ရသူတွေရဲ့ ၉၁ ရာခိုင်နှုန်းဟာ ယာဉ်မောင်း ခါးပတ်ပတ်ဖို့ ပျက်ကွက်ရာက ဒီလို ဒဏ်ရာတွေ ရခဲ့တာဖြစ်တယ်လို့လည်း ဆိုတယ်။
နောက်ဆုံး ကျင်းပခဲ့တဲ့ ဆုန်ကရန်ပွဲတော် ကာလကထက် ဒဏ်ရာရရှိနှုန်း ၁၉ ဒသမ ၂၆ ရာခိုင်နှုန်း မြင့်တက်ခဲ့ပြီး သေဆုံးနှုန်းကတော့ ၂၆ ဒသမ ၈၁ ရာခိုင်နှုန်း ကျဆင်းခဲ့တယ်လို့ ဒေါက်တာ အိုပက်စ်က ပတ္တယားသတင်းမှာ ရှင်းလင်း ပြောကြားခဲ့ပါတယ်။
ဒဏ်ရာရသူတွေထဲမှာ ၃,၈၁၄ ဦးက ဆေးရုံတက်ခဲ့ရပြီး ဒီနှုန်းဟာ ၈၁ ဒသမ ၈၄ ရာခိုင်နှုန်းအထိ မြင့်တက်ခဲ့ တာကြောင့် ယာဉ်မောင်းခါးပတ် ဝတ်ဆင်ထားရေးဟာ အထူး အရေးပါတယ်လို့ ဒေါက်တာအိုပက်စ် က သင်ခန်းစာပေး ပြောကြားခဲ့ပါတယ်။
သေဆုံးနှုန်း အများဆုံးက နာခွန်းရက်ချာဆီမာမှာ ဖြစ်ပြီး ၁၂ ဦးသေဆုံးကာ ချင်းရိုင်က ၉ ယောက်၊ ပသမ်သာနီ ခရိုင် က ၈ ဦးနဲ့ အစဉ်လိုက် ရပ်တည်ခဲ့ပါတယ်။
ဒဏ်ရာရရှိမှု အများဆုံး ခရိုင်တွေက ချင်းမိုင် ၈၁၁ ယောက်၊ နာခွန်းရတ်ချာဆီမာ ၇၅၂ ယောက် နဲ့ ခွန်ကန်း ၆၆၅ ယောက်တို့ဖြစ်ကြောင်း သိရှိရပါတယ်။
ဧပြီ ၁၆ နဲ့ ၁၇ ရက်နေ့တွေဟာ ပွဲတော်ခရီးက အိမ်ပြန်သူတွေများလို့ ယာဉ်ကျောပိတ်ဆို့မှုနဲ့ ယာဉ်မတော်တဆမှုတွေ ပိုအဖြစ် များနိုင်လို့ ယာဉ်မောင်းတွေ ခါးပတ်ပတ်တာ မပျက်ကွက်ကြဖို့လည်း ဒေါက်တာ အိုပက်စ်က သတိပေးပြောကြား ခဲ့ပါတယ်။
MKF-001
#MeKongNews