မဲခေါင်၊ ဇန်နဝါရီ ၂၃

ရန်ကုန်တိုင်း၊ ရွှေပြည်သာမြို့နယ် (၂၅) ရပ်ကွက်၊ ပြည်တော်သာလမ်းရှိ ရပ်ကွက်ရုံးမှာ ဧည့်စာရင်း လာတိုင်တဲ့ လူငယ် တစ်ဦးကို ရပ်ကွက်ရုံး စာရေးက သံတုတ်နဲ့ ရိုက်နှက်ခဲ့တယ်လို့ ဒေသခံတွေက ပြောပါတယ်။

ဇန်နဝါရီ ၂၂ ရက် ညနေ ၄ နာရီခွဲ ဝန်းကျင်က ဧည့်စာရင်း လာတိုင်တဲ့ လူငယ်ကိုဧ ည့်စာရင်း ရက်ကျော်တဲ့ ကိစ္စနဲ့ စကားများရာမှ ရုံးစာရေးက သံတုတ်နဲ့ ရိုက်ခဲ့တဲ့ အတွက် လူငယ်မှာ ခေါင်းကွဲသွားတယ်လို့ မျက်မြင်တွေ့သူ တစ်ဦးက ပြောပါတယ်။

“ ဧည့်စာရင်းတိုင်တာ ရက်ကျော်နေတော့ ရုံးဘက်က ပြောတယ်။ အဲ့ကနေစပြီး တစ်ယောက်တစ်ခွန်းနဲ့ စကားများပြီး ဖြစ်ကြတာ။ အရိုက်ခံရတဲ့ ကောင်လေးကလည်း ပြန်ပြောတော့ ရုံးစာရေးက သံတုတ်နဲ့ ရိုက်လိုက်တာ။ ကောင်လေးကတော့ ခေါင်းကွဲသွားတယ်” လို့ သူကပြောပါတယ်။

ရွှေပြည်သာမြို့နယ်မှာ စစ်တပ်နဲ့ ရပ်ကွက်အုပ်ချုပ်ရေးမှူးတွေ ပေါင်းပြီး ပြည်သူတွေကို နှိပ်စက်အနိုင်ကျင့်မှုတွေ နေ့စဉ် ဖြစ်ပွားနေပြီး လုယက်မှုတွေ ခိုးမှုတွေ နေ့စဉ် ဖြစ်နေပေမယ့် ဖမ်းဆီးတာတွေ မရှိဘူးလို့ ဒေသခံတွေက ပြောပါတယ်။

ဒါ့အပြင် ရပ်ကွက်အုပ်ချုပ်ရေးမှူးတွေကို စစ်ကောင်စီက သေနတ်တွေ ပေးထားပြီး ညတိုင်း မူးယစ် သောက်စားကာ သေနတ် ပစ်ဖောက်မှုတွေ လုပ်နေတယ်လို့ ဒေသခံ ပြည်သူတွေက ပြောပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)