မဲခေါင် ၊ ဩဂုတ် ၂
တအာင်းအမျိုးသားလွတ်မြောက်ရေးတပ်မတော် TNLA အနေနဲ့ ဖမ်းဆီးခံထားရတဲ့ သူတို့ရဲ့ တပ်ဖွဲ့ဝင်တွေကို ပြန်လွှတ်ပေးဖို့ စစ်ကောင်စီထံ တောင်းဆိုထားတာမရှိဘူးလို့ TNLA ပြောရေးဆိုခွင့်ရှိသူ ဒုတိယဗိုလ်မှူးကြီး တာပန်လ ကပြောပါတယ်။
“ ကျွန်တော်တို့အနေနဲ့က တောင်းဆိုထားတာမျိုးတွေ မရှိပါဘူး။ ဒါပေမယ့် ဒီနေ့ထုတ်ပြန်ချက်ထဲမှာတော့ ကျွန်တော်တို့ လူစာရင်းတွေ ပါလာတာမျိုးကို တွေ့ရှိရပါတယ်” လို့ သူကပြောပါတယ်။
ဒါ့အပြင် အခုလို ဖမ်းဆီးခံထားရတဲ့ TNLA တပ်ဖွဲ့ဝင်တွေကို စစ်ကောင်စီက ပြန်လွတ်ပေးပေမယ့် နွေဦးတော်လှန်ရေး အပေါ် ထားရှိတဲ့ TNLA ရဲ့ သဘောထားက ပြောင်းလဲမှုရှိမှာမဟုတ်ဘူးလို့လည်း ဒု-ဗိုလ်မှူးကြီး တာပန်လ က ပြောပါတယ်။
စစ်ကောင်စီက အခုလိုမျိုး ဖမ်းဆီးခံထားရတဲ့ မြောက်ပိုင်းမဟာမိတ်တပ်ဖွဲ့ဝင်တွေကို ပြန်လွတ်ပေးတာတွေဟာ သဘောရိုးနဲ့ မဟုတ်ဘဲ ထွက်ပေါက်ရှာတာဖြစ်နိုင်တယ်လို့လည်း ဒု-ဗိုလ်မှူးကြီးတာပန်လက သုံးသပ်ပါတယ်။
“ သူ့ထွက်ပေါက်ရှာတဲ့အနေနဲ့ ပြုလုပ်တာဖြစ်နိုင်တယ်။ သဘောရိုးနဲ့တော့ ဖြစ်ပုံမရပါဘူး” လို့ သူက ပြောပါတယ်။
စစ်ကောင်စီက တိုင်းရင်းသား တော်လှန်ရေးလက်နက်ကိုင်တပ်ဖွဲ့ဝင် ၂၂ ဦးကို ပြစ်ဒဏ်မှ လွတ်ငြိမ်းခွင့်ပြုလိုက်တယ်လို့ ဩဂုတ်လ ၁ ရက်နေ့မှာ ကြေညာခဲ့တာဖြစ်ပြီး အဲ့ဒီ ၂၂ ဦးထဲမှာ MNDAA ကိုးကန့်တပ်ဖွဲ့ဝင် ၂ ဦး ၊ ရှမ်းပြည်တိုးတက်ရေးပါတီ SSPP တပ်ဖွဲ့ဝင် ၃ ဦး ၊ ရခိုင့်တပ်တော် AA တပ်ဖွဲ့ဝင် ၁ ဦး နဲ့ တအာင်းအမျိုးသားလွတ်မြောက်ရေးတပ်မတော် TNLA တပ်ဖွဲ့ဝင် ၁၆ ဦး ပါဝင်ပါတယ်။
စစ်ကောင်စီက အခုလို့ လွတ်ငြိမ်းခွင့်ပြုတာဟာ မြောက်ပိုင်းမဟာမိတ်အဖွဲ့နဲ့ ရင်ဆိုင်ရမယ့် စစ်မျက်နှာကို လျှော့ချချင်တဲ့ သဘောဖြစ်တယ်လို့ ရှမ်းပြည်နယ်အရေး လေ့လာနေသူတစ်ဦးက ပြောပါတယ်။
“အဓိကကတော့ နွေဦးတော်လှန်ရေးအဖွဲ့တွေနဲ့ တပြိုင်နက် တချိန်တည်း ညီနောင်အဖွဲ့တွေကိုပါ စကစ က စစ်ကောင်းကောင်းတိုက်နိုင်တဲ့ အခြေအနေ မဟုတ်တာကြောင့် အဲ့ဒီဘက်ကို စစ်ရပ်ထားချင်တဲ့ လုပ်ရပ်တစ်ခုအနေနဲ့ ဒီလိုလွှတ်ပေးတာလို့ မြင်လို့ရပါတယ်” လို့ သူကပြောပါတယ်။
စစ်ကောင်စီဟာ ဒီကနေ့မှာ ဝါဆိုလပြည့်နေ့ ဓမ္မစကြာအခါတော်နေ့ အထိမ်းအမှတ်အနေနဲ့ ဖမ်းဆီးခံရတဲ့သူတွေကို ပြစ်ဒဏ်လွတ်ငြိမ်းပေးတယ်ဆိုပေမယ့် နိုင်ငံရေး အကျဉ်းသားတွေ အနည်းငယ်သာပါဝင်ပါတယ်။
CJ-002
#MeKongNews
#TNLA
#စစ်ကောင်စီ
#ပြစ်ဒဏ်လွတ်ငြိမ်း
#နွေဦးတော်လှန်ရေး
