မဲခေါင်၊ ဧပြီ ၂၄
ကယား(ကရင်နီ)ပြည်၊ ဖရူဆိုမြို့နယ် အနောက်ဘက်ခြမ်း တစ်နေရာမှာ စစ်ဘေးရှောင်တွေနဲ့ စာသင်ကျောင်းအတွက် အကူအညီ လိုအပ်နေတယ်လို့ ကူညီဆောင်ရွက်ပေးနတဲ့ အဖွဲ့အစည်း တာဝန်ရှိသူတွေက ပြောပါတယ်။
လက်ရှိမှာ ကရင်နီပြည် ကြားကာလ အုပ်ချုပ်ရေးကောင်စီက ထောက်ပံ့မှုတချို့ ပေးထားပေမယ့် မလုံလောက်တာကြောင့် ပြီးခဲ့တဲ့ ၃ လလောက်ကတည်းက အကူအညီတွေ လိုအပ်နေတာ ဖြစ်တယ်လို့ ဆိုပါတယ်။
Karenni Support Team(KNST)ရဲ့ တာဝန်ရှိသူ တစ်ဦးက “စစ်ရှောင်ရော ကျောင်းအတွက်ရော လိုနေတာ။ ရွာကတော့ များတယ်။ နီးတဲ့ရွာတွေတော့ ပေါင်းတက်ကြတယ်။ ရိက္ခာမရတာ ၂ လကျော်ပြီ” လို့ ပြောပါတယ်။
IEC အနေနဲ့ စာသင်ကျောင်း ၁၄ ကျောင်းအတွက် အဝတ်အထည် ၅၀ ခန့် ချပေးခဲ့ပေမယ့် ကျောင်းသားဦးရေ များတာကြောင့် တစ်ကျောင်းကို ၄ ထည်လောက်သာ ရရှိခဲ့တယ်လို့ စစ်ဘေးရှောင်တွေဆီက သိရပါတယ်။
ဒါ့အပြင် စစ်ဘေးရှောင်တွေ အနေနဲ့လည်း စစ်ကောင်စီတပ်ဘက်က မကြာခဏ စစ်ကြောင်းထိုးတာကြောင့် ရိက္ခာပြန်ယူဖို့ ခက်ခဲနေပြီး အကူအညီတွေ လိုအပ်နေတယ်လို့ ဆိုပါတယ်။
စစ်ဘေးရှောင် တစ်ဦးက “NGO တွေလည်း မလာတာကြာပြီ။ ကိုယ့်ကိုယ်ပဲ ဖြေရှင်းနေရတယ်။ ထမင်းမစားရတဲ့ ရက်တွေတောင် ရှိတယ်။ လုပ်စရာ အလုပ်အကိုင်လည်း မရှိဘူး” ပြောပါတယ်။
လက်ရှိ အကူအညီလိုအပ်နေတဲ့ နေရာမှာ ရွာပေါင်း ၃၀ ကျော်၊ စာင်ကျောင်း ၁၄ ကျောင်းနဲ့ ရိက္ခာပြတ်နေတဲ့ စစ်ဘေးရှောင် အယောက် ၅၀၀ ကျော် ရှိတယ်လို့ KNST တာဝန်ရှိသူတွေဆီက သိရပါတယ်။
IEC ရဲ့ အထွေထွေ အတွင်းရေးမှူး ၂ ဦးဗညားက ဖရူဆိုမြို့နယ် အနောက်ဘက်ခြမ်းက စစ်ဘေးရှောင်တွေကို ကိုယ်တိုင် စိုက်ပျိုးရေး လုပ်ကိုင်ဖို့အတွက် အားပေးပြီး စိုက်ပျိုးနိုင်အောင်လည်း ကူညီပေးနေတာတွေ ရှိတယ်လို့ ၂၀၂၃ ခုနှစ် နိုဝင်ဘာလတုန်းက သတင်းမီဒီယာတွေကို ပြောဆိုခဲ့ဖူးပါတယ်။
MK-014
