မဲခေါင်၊ မတ် ၁၈
ရှမ်းပြည်အရှေ့ပိုင်း၊ မိုင်းဆတ်၊ မိုင်းတုံ ခရိုင်တွေမှာ စစ်မှုထမ်းဖို့ ရပ်ကွက်အဆင့် လုပ်ဆောင်နေတာတွေဟာ ညီမျှမှုတွေမရှိဘူးလို့ ဒေသခံတွေက ဝေဖန်ပြောကြားနေတယ်လို့ သိရပါတယ်။
မိုင်းဆတ်မှာ မြို့ပေါ်ရပ်ကွက်တွေ ကို မခေါ်ပဲ မြို့ဆင်ခြေဖုံးက ကောင်းမှုတန်နဲ့ ဝိန်းနေကျေးရွာ တွေမှာပဲ တစ်ရွာ ၃ ဦး ခေါ်ဆောင်တာ၊ မိုင်းတုံမြို့ပေါ် မှာတော့ တစ်ရပ်ကွက်ကို ၅ ဦး သတ်မှတ်ပြီး မဲနှိုက်တာတွေပြုလုပ်နေသလို လုပ်ဆောင်ပုံခြင်းတွေလည်း မတူလို့ဒေသခံတွေက ဝေဖန် နေကြတယ်လို့ သိရပါတယ်။
ဥပဒေမှာ သားတစ်ယောက်ထဲ မိဘကို လုပ်ကြွေးနေရင် ကင်းလွတ်ခွင့်ရတယ်ပြောတယ်၊ စိုင်းဝင်း(မြို့မအုပ်ကြီး)က သားတစ်ယောက်ထဲရှိတာတွေပဲ ရွေးခေါ်တယ်၊ ပြီးတော့ နောင်ပါရင်လို အုပ်ထိန်းသူတွေနဲ့ညှိတာလဲ မရှိဘူး၊ ခုလဲ အစည်းအဝေးထပ်ခေါ်ပြီး အိမ်ထောာင်သည်တွေကအစအားလုံး စာရင်းတွေထည့်ပစ်တာ ၁၅၀ ကျော်ပြီ၊ သူ့သားကျတော့ ပြေးခိုင်းထားပြီ
လို့ မိုင်းတုံမြို့မရပ်ကွက်သူ တစ်ဦးက မဲခေါင်ကို ပြောပါတယ်။
မိုင်တုံမြို့တွင် နောင်ပါရင်၊ မြို့မရပ်ကွက်၊ ဝမ်မိုင်ရပ်ကွက် ၃ ရပ်ကွက်ရှိရာ နောင်ပါရင်အုပ်ကြီး စိုင်းမတ်ကတော့ မတ် ၁၆ ရက်မှာ ရပ်ကွက်က စစ်မှုထမ်းအကျုံးဝင်တဲ့ အသက်ကာလထဲက လူငယ်တွေ မိဘတွေကို ခေါ်ယူညှိနှိုင်းပြီး ၃ယောက်ကို မဲနှိုက်ကာ ပံ့ပိုးရေးဆိုပြီး တစ်အိမ်ကို ကျပ်ငွေ ၂ သောင်းကောက်ခံရန် သဘောတူကြတယ်လို့ ဒေသခံက ပြောပါတယ်။
မြို့မရပ်ကွက် အုပ်ချုပ်ရေးမှူးက မတ်လ ၁၆ ရက်မှာ အစည်းအဝေးခေါ်ပြီး ဘာမှမညှိနှိုင်းဘဲ မဲပေါက်တာ ၅ ယောက်ရှိတယ်၊ မဖြစ်မနေ လာရမယ်ပြောလို့ မိဘတွေနဲ့ စကားတွေများကြတယ်လို့ သိရပါတယ်။
မဲပေါက်တဲ့လူငယ်တွေလဲ မြို့ပေါ်မှာ မရှိကြတော့တာကို သူကိုယ်တိုင်ဖုန်းတွေ ဆက်ခေါ်နေတာ ရမရတော့ မသိဘူးလို့ ဒေသခံက ပြောပါတယ်။ မနေ့က မတ်လ ၁၇ ရက်မှာ အစည်းအဝေးထပ်ခေါ်ပြီး အိမ်ထောင်ရှိသူတွေပါ စာရင်းတွေယူတော့ ၁၅၀ ဦးလောက် ရှိသွားပြီလို့ ဆိုပါတယ်။
ဝမ်မိုင် အုပ်ကြီး စိုင်းပန်းကတော့ အရင်ထည့်ထားတဲ့ ပြည်သူ့စစ်တွေကို စစ်သားအဖြစ်ပြောင်းလဲဖို့ လုပ်ထားလို့ လတ်တလောပြဿနာကို ဖြေရှင်းထားပေမယ့် နောက်လာမယ့် အခေါက်တွေတော့ ဘယ်လိုလုပ်မယ်မသိသေးဘူးလို့ ဆိုသလို ဖာချယ်ရွာမှာဆိုရင် အကျုံးဝင်တဲ့လူငယ် လူရွယ်တွေ တစ်ယောက်မှ မရှိကြတော့ဘူးလို့ သိရပါတယ်။
မိုင်းဆတ်၊ မိုင်းတုံမြို့တွေမှာ ဒေသခံလားဟူ ပြည်သူ့စစ်အဖွဲ့တွေဆယ်ချီရှိနေတာဖြစ်လို့ အခြားအရပ်သား ပြည်သူတွေကိုပဲ စစ်မှုထမ်းဥပဒေအရ စာရင်းကောက်ခံတာ၊ မဲနှိုက်တာတွေ ပြုလုပ်နေတာလို့ သိရပါတယ်။
မြန်မာနိုင်ငံတစ်ဝှမ်း နွေဦးတော်လှန်ရေးကို လုပ်ဆောင်နေတဲ့ ၃ နှစ်ကျော်အတွင်းမှာ ရှမ်းအရှေ့မြို့တွေကတော့ လှုပ်ရှားမှု မရှိသလောက်ရှိနေခဲ့တာမှာ အခု ပြည်သူ့စစ်မှုထမ်းဥပဒေ စတင်လုပ်ဆောင်ချိန်မှာတော့ စစ်မှုမထမ်းချင်လို့ ထွက်ပြေးတိမ်းရှောင်သူတွေ များပြားလာနေတာ ဖြစ်တယ်လို့ သိရှိရပါတယ်။
MK-012