မဲခေါင်၊ ဧပြီ ၂၄

ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ သာလေးကျေးရွာအုပ်စု၊ အိုးကုန်းကျေးရွာမှာ အုပ်ချုပ်ရေးမှူးရဲ့ တူ ၂ ဦးနဲ့ မူးယစ်ဆေးသုံးစွဲသူ တစ်ဦးတို့ စစ်မှုထမ်း ပါဝင်လာတယ်လို့ နီးစပ်သူတွေက ပြောပါတယ်။

စစ်မှုထမ်း ဆင့်ခေါ်ရေးအဖွဲ့က အုပ်ချုပ်ရေးမှူး ဦးစိုးရွှေ(ခေါ်) ဌေးရွှေဆီကို ပြီးခဲ့တစ်ပတ်ကတည်းက ဆင့်ခေါ်စာ ပို့လာပြီး ၃ ဦးလုံးဟာ ဧပြီလ မကုန်ခင် ဆေးစစ်ရမယ်လို့ ဆိုပါတယ်။

ပုဂ္ဂိုလ်ရေးအရ နီးစပ်သူတစ်ဦးက “အုပ်ကြီး အကွက်ရွှေ့တယ်လို့ ပြောတာပဲ။ သူ့တူအရင်းတော့ သူဘယ်ထည့်မလဲ။ သူ့တူ ၂ ယောက်ထဲက တစ်ယောက်က ဝတယ်ဆိုတော့ အလေးချိန်များပြီး ပြန်ပို့ခံရမယ်ပေါ့။ ဆေးသမားကလည်း ဆေးစစ် မအောင်လောက်ဘူးပေါ့။ ဘယ်လိုလာမလဲတော့ မသိသေးဘူး” လို့ ပြောပါတယ်။

အုပ်ချုပ်ရေးမှူး တူဖြစ်တဲ့ ညီအကို ၂ ဦးဟာ အသက် ၂၈ နှစ်အရွယ်နဲ့ ၂၀ ဝန်းကျင် အရွယ်တွေ ဖြစ်ပြီး ငွေကြေးချမ်းသာသူတွေ ဖြစ်တယ်လို့ ရွာခံတွေဆီက သိရပါတယ်။

ဒါ့အပြင် အသက် ၃၃ နှစ်အရွယ် မူးယစ်ဆေးသုံးစွဲသူဟာလည်း ဆေးကြောင်ပြီး အသိစိတ် ကင်းလွတ်နေသူ ဖြစ်တယ်လို့ ဆိုပါတယ်။

အိုးကုန်းရွာခံ တစ်ဦးက “ဆေးသမားကတော့ အရင်က သူ့အိမ်က အလုပ်သမား။ နောက်ပိုင်းတော့ မလုပ်တော့ဘူးလား ဘာလား မသိဘူး။ သူ့အမေကတော့ သူ့အကို အုပ်ကြီး ဖြစ်ပြီး အားမကိုးရဘူး၊ သူ့သား ၂ ယောက်ကို အရင်ထည့်တယ်ဆိုပြီး ဒေါသတွေ ထွက်နေတယ်။ မောင်နှမချင်း သေခန်းတောင် ပြတ်နိုင်တယ်” လို့ ပြောပါတယ်။

နှစ်သစ်ကူး သင်္ကြန်ကာလရှေ့ပိုင်းကလည်း သာလေးကျေးရွာအုပ်စု၊ ရွာကြီးရှေ့ ကျေးရွာမှာနေထိုင်တဲ့ အမျိုးသား ၃ ဦးဟာ သူတို့ဆန္ဒအလျောက် စစ်မှုထမ်းဖို့ စာရင်းပေးခဲ့ပေမယ့် အသက် ၄၀ ကျော်နေတာကြောင့် စစ်မှုထမ်းအဖွဲ့က ပြန်ပို့ခဲ့ပါတယ်။

အင်းလေးဒေသ၊ ကေလာကျေးရွာအုပ်စုမှာတော့ ပြီးခဲ့တဲ့ မတ်လကတည်း စစ်မှုထမ်းဖို့အတွက် ၃ ဦး မဲနှိုက် ရွေးချယ်ခဲ့ပြီး လက်ရှိမှာ စစ်သင်တန်း တက်ရောက်နေပြီလို့ ဒေသခံတွေဆီက စုံစမ်းသိရပါတယ်။

MK-014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)