မဲခေါင်၊ ဇွန် ၁၃
ထိုင်း-ကရင်နီ နယ်စပ် BP-14 ရဲစခန်းနဲ့ စစ်ကောင်စီ တပ်စခန်းတွေကို ကရင်နီ တော်လှန်ရေးတပ်ဖွဲ့တွေ ဒီမနက်ကစပြီး တိုက်ခိုက် သိမ်းပိုက်နေတယ်လို့ ဒေသခံတွေဆီက သိရပါတယ်။
ကရင်နီ ပြည်နယ်၊ ထိုင်း-ကရင်နီ နယ်စပ်၊ မယ်စဲ့မြို့နယ်မှာ ဒီကနေ့ ဇွန်လ ၁၃ ရက်နေ့ မနက် အစောပိုင်း ကတည်းက ကရင်နီ တော်လှန်ရေး အင်အားစုတွေ ပူးပေါင်း တိုက်ခိုက်ရာ စစ်ကောင်စီတပ်စခန်း ၂ ခုကို သိမ်းပိုက်နိုင်ခဲ့ပြီလို့ ဒေသခံတွေကပြောပါတယ်။
“စခန်း ၂ ခုပါသွားပြီ။ အခု မယ်စဲ့ရဲစခန်း အဝိုင်းခံထားရတယ်။ လေယာဉ်တွေလည်း တစ်စီးပြီး တစ်စီး လာတယ်။ တောင်လှဘက်ကိုလည်း သွားတယ်။ အခုထိ ကြဲတော့ မကြဲသေးဘူး။ ဝဲနေတုန်း” လို့ မယ်စဲ့မြို့နေ လူငယ်တစ်ဦးက မဲခေါင်သတင်းဌာနကို ပြောပါတယ်။
ဒီနေ့ မနက် ၅ နာရီက စပြီး KNDF၊ KNPP တို့ ဦးဆောင်ပြီး အခြား PDF တပ်ဖွဲ့ဝင်များ နဲ့အတူ တိုက်ခိုက်ခဲ့ရာ စစ်ကောင်စီရဲ့ နယ်စပ်အမှတ် BP-14 စခန်းနဲ့ တောင်လှစခန်းတို့ကို ဆက်တိုက်သိမ်းနိုင်ခဲ့ပြီး လက်ရှိ မယ်စဲ့မြို့နယ် ရဲစခန်းကို အင်အား အလုံးအရင်းနဲ့ ဝင်စီးနေတယ်လို့ သိရပါတယ်။
စစ်ကောင်စီ ဝါဒဖြန့် သတင်းချန်နယ်တွေမှာလည်း တောင်လှစခန်းကို ဒရုန်းနဲ့စတင် တိုက်ခိုက်ခံရပြီး စခန်းသိမ်းခံလိုက်ရတယ် ဆိုတာကို ဖော်ပြထားတာ တွေ့ရပါတယ်။
လက်ရှိ ထိုင်းနယ်စပ်နဲ့ တောင်လှစခန်းဘက်ကို ရဟတ်ယာဉ်တွေနဲ့ ကင်းပတ်နေတာကြောင့် ဒေသခံ၊ ပြည်သူတွေ အနေနဲ့ လေကြောင်းသုံး တိုက်ခိုက် ခံရမှာကို စိုးရိမ်နေကြပါတယ်။
မယ်စဲ့မြို့နယ်ဟာ ကလလတ နယ်ခြားစောင့်တပ် အုပ်ချူပ်တဲ့ ဒေသဖြစ်ြပ်ီး စစ်အာဏာသိမ်းပြီးနောက် ကရင်နီပြည် အခြားမြို့နယ် တွေကနေ စစ်ရှောင်လာတဲ့ စစ်ရှောင် တစ်ထောင်ကျော် လာရောက် ခိုလှုံနေထိုင်လျက်ရှိတဲ့ ဒေသလည်း ဖြစ်ပါတယ်။
CJ-001
#MeKongNews
#PDF
#KNDF
#KNPP
#မယ်စဲ့
#ထိုင်းမြန်မာနယ်စပ်
