မဲခေါင်၊ နိုဝင်ဘာလ ၁၃
ရှမ်းပြည်နယ် မြောက်ပိုင်း၊ ကိုးကန့်ဒေသက လူ ၄ ဦးကို တရုတ်နိုင်ငံ၊ Zhe Jiang ပြည်နယ်၊ Wen Zhou မြို့နယ် ရဲစခန်းက အွန်လိုင်း ငွေလိမ် လုပ်ငန်းမှာ အရေးပါသူတွေ ဖြစ်တယ်ဆိုတာ စစ်ဆေးတွေ့ရှိလို့ နိုဝင်ဘာ ၁၂ ရက်နေ့ ရက်စွဲနဲ့ တရုတ်ဘက်က ဖမ်းဝရမ်း ထုတ်ထားပါတယ်။
ဖမ်းဝရမ်း ထုတ်ခံရသူတွေကတော့ ကိုးကန့် ခေါင်းဆောင်ဟောင်း Ming Xuechang ၊ ကိုးကန့်ဒေသ ပြည်သူ့စစ် ခေါင်းဆောင် Ming Guoping ၊ တရုတ်နိုင်ငံဘက်က Ming Julan နဲ့ ဝ ဒေသ ဇာတိဖွား Ming Zhenzhen တို့ ဖြစ်တယ်လို့ သိရပါတယ်။
“ ကျွန်မတို့ နေတဲ့ မြို့ရဲ့ အပေါ်ဘက်မြို့လေ။ အဲဒီက ရဲစခန်းက ထုတ်ထားတာ စာက။ ဒီဘက်က အလိမ်ခံရတဲ့ သူတွေ အများကြီး ရှိတယ်။ တက္ကသိုလ်ကျောင်းသူ၊ ကျောင်းသားတွေလည်း အများကြီး အလိမ်ခံရတယ်။ လစာ အများကြီး ရတယ်ဆိုပြီး လိမ်ခေါ် ခံရတာ” လို့ တရုတ်နိုင်ငံရောက် မြန်မာ အမျိုးသမီး တစ်ဦးက ပြောပါတယ်။
အခု ဖမ်း၀ရမ်း အထုတ်ခံရသူတွေဟာ ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသက အွန်လိုင်း လိမ်လည်မှု ရာဇ၀တ်ဂိုဏ်းရဲ့ အရေးပါတဲ့ ခေါင်းဆောင်တွေ ဖြစ်တယ်လို့ ဆိုပါတယ်။
Wen Zhou မြို့နယ် ရဲစခန်းက ထုတ်ပြန်တဲ့ ဖမ်း၀ရမ်းမှာတော့ အဲဒီ လူ ၄ ဦးဟာ အမှန်တကယ် အွန်လိုင်း ငွေလိမ်မှုတွေ ကျူးလွန်ကြောင်း အသေးစိတ် စစ်ဆေးတွေ့ရှိထားတာကြောင့် ဖမ်းဆီး အရေးယူမှာ ဖြစ်တယ်လို့ ဖော်ပြထားပါတယ်။
“ သူတို့အနေနဲ့ အသိတရားနဲ့ အပြစ်လာရောက် ဝန်ခံပြီး အဖမ်းခံရင် ပြစ်ဒဏ်လျှော့ပေါ့ပေးမယ်လို့ ပါတယ်” လို့ နယ်စပ်ဒေသခံ တစ်ဦးက ပြောပါတယ်။
ဖမ်းဝရမ်း ထုတ်ထားတဲ့ လူ ၄ ဦးကို သတင်း ပေးနိုင်သူ ဒါမှမဟုတ် ဖမ်းဆီးနိုင်ဖို့ ကူညီသူတွေကို တရုတ်ယွမ် တစ်သိန်းမှ ၅ သိန်းအထိ ဆုကြေးငွေ ချီးမြှင့်မှာဖြစ်ကြောင်း ထုတ်ပြန်စာမှာ ဖော်ပြထားပါတယ်။
ငွေလိမ် ဂိုဏ်းတွေ အနေနဲ့ တရုတ်နိုင်ငံသားတွေကို ပစ်မှတ်ထား လိမ်လည်ပြီး ကြီးမားတဲ့ ငွေကြေး ပမာဏတွေ လိမ်လည်ထားကြောင်း ထုတ်ပြန်စာမှာ ဖော်ပြထားပါတယ်။
CJ-008
#MekongNews
#ကိုးကန့်
#ငွေလိမ်ဂိုဏ်း
#ဖမ်း၀ရမ်း