မဲခေါင်၊ သြဂုတ် ၁၇

အာဆီယံ အလှည်ကျ ဥက္ကဌ အဖြစ် မြန်မာနိုင်ငံဟာ ၂၀၂၆ ခုနှစ်မှာ အလှည့်ကျမှာ ဖြစ်ပေမယ့် အာဏာသိမ်း စစ်ကောင်စီဟာ ဥက္ကဌ နေရာကို စွန့်လွှတ်ဖို့ ဆုံးဖြတ်ထားကြောင်း ထိုင်း BPS မီဒီယာက ဩဂုတ် ၁၅ ရက်နေ့မှာ ဖော်ပြပါတယ်။

မြန်မာနိုင်ငံမှာ အာဏာသိမ်းပြီးနောက် စစ်ကောင်စီကို အသိအမှတ်ပြု လက်ခံခြင်း မရှိတဲ့ အာဆီယံ အဖွဲ့ဝင် နိုင်ငံ အများအပြားရှိနေပြီး စစ်ကောင်စီကို ၂၀၂၆ ခုနှစ်မှာ အာဆီယံ အလှည့်ကျ ဥက္ကဌ ရာထူးပေးခဲ့ရင် အာဆီယံ အတွင်း အကွဲအပြဲများစွာ ရှိလာမှာဖြစ်တယ်လို့ ဆိုပါတယ်။

ဒါ့အပြင် စစ်ကောင်စီဘက်က တစ်နိုင်ငံလုံး အုံကြွတော်လှန် နေမှုကြောင့် ဥက္ကဌအဖြစ် ကြိုတင် ပြင်ဆင်မှုတွေ လုပ်နိုင်ဖို့ အလက်အခဲ ရှိနေတာကြောင့် စွန့်လွှတ်ဖို့ ဆုံးဖြတ်လိုက်တာ ဖြစ်တယ်လို့ အမည် မဖော်ပြတဲ့ သံတမန် တစ်ဦးက အခိုင်အမာဆိုကြောင်း သတင်းမှာ ဖော်ပြပါတယ်။

မြန်မာစစ်ကောင်စီဘက်က အာဆီယံ အလှည့်ကျ ဥက္ကဌ ရာထူးနဲ့ ပတ်သက်လို့ ၂၀၂၇ ခုနှစ်အထိ ပါဝင်ပတ်သက်ဖို့ မရှိကြောင်း ဆုံးဖြတ်ထားပြီး သူတို့ တာဝန်မယူတဲ့ ၂၀၂၆ ခုနှစ် ဥက္ကဌ အလှည့်ကို ဖိလစ်ပိုင်က ရယူသွားမယ်လို့ ဒီသံတမန်က ဖွင့်ဟထားပါတယ်။ ဒီအကြောင်း စစ်ကောင်စီ ဘက်ကရော ဖိလစ်ပိုင် ဘက်ကပါ တစ်စုံတစ်ရာ တုံ့ပြန်ခြင်း၊ အသိအမှတ်ပြုခြင်း၊ ဝန်ခံခြင်း မရှိသေးပါဘူး။

မြန်မာ စစ်ကောင်စီဟာ ၂၀၀၆ ခုနှစ်ကလည်း အာဆီယံ အလှည့်ကျ ဥက္ကဌ နေရာကို စွန့်လွှတ်ခဲ့ဖူးပြီး အခုလည်း အုပ်ချုပ်မှု ယန္တရားဟာ ၂၀၂၇ ခုနှစ် အထိ အသင့်အနေအထား မရောက်နိုင်သေးတာ ကြိုသိတဲ့ အတွက် အာဆီယံ အလှည့်ကျ ဥက္ကဌ တာဝန်ကို စွန့်လွှတ်ဖို့ ဆုံးဖြတ်ထားတာ ဖြစ်နိုင်ပါတယ်။

လက်ရှိ အာဆီယံ အလှည့်ကျ ဥက္ကဌ ရာထူးကို အင်ဒိုနီးရှားက ရယူထားပြီး နောက်နှစ်မှာ လာအို၊ ၂၀၂၅ ခုနှစ်မှာ မလေးရှားတို့က လွှဲပြောင်း ဆက်ခံမှာ ဖြစ်ပါတယ်။

MKF-001

#Mekongnews

#အာဆီယံ

#စစ်ကောင်စီ

#ဖိလစ်ပိုင်

Ref: thediplomat

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)