မဲခေါင်၊ သြဂုတ် ၁၇

ဘင်္ဂလားဒေ့ရှ် အစိုးရပိုင် ကုန်သွယ်ရေးဘဏ် ဆိုနာလီဟာ အမေရိကန်ရဲ့ ဖိအားပေးမှုကြောင့် မြန်မာ စစ်ကောင်စီ ထောက်တိုင် နိုင်ငံခြား ကုန်သွယ်မှုဘဏ်-MFTB နဲ့ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ်-MICB က အပ်ထားတဲ့ ဘဏ်စာရင်း ဒေါ်လာ ၁ ဒသမ ၂ သန်းကို သိမ်းဆည်းလိုက်ကြောင်း ဩဂုတ် ၁၇ ရက်နေ့မှာ ထုတ်ပြန်ပါတယ်။

ပြီးခဲ့တဲ့ ဇွန်လကတည်းက အမေရိကန်ဟာ စစ်ကောင်စီရဲ့ နိုင်ငံခြားငွေရရှိရာ အဓိက ဘဏ်အရင်းအမြစ် ၂ ခု ဖြစ်တဲ့ MFTB နဲ့ MICB ဘဏ် ၂ ခုကို ပိတ်ဆို့ အရေးယူ ခဲ့ပါတယ်။

ဩဂုတ် ၃ ရက်နေ့မှာတော့ မြို့တော်ဒါကာမှာ ရှိတဲ့ အမေရိကန် သံရုံးက ဆိုနာလီဘဏ်ကို စစ်ကောင်စီ ဘဏ် ၂ ခုအပေါ် ပိတ်ပင်ဖို့ အကြောင်းကြားစာ ပေးပို့ခဲ့တာကြောင့် ဒေါ်လာ ၁ ဒသမ ၂ သန်း အပ်ထားတဲ့ ဒီဘဏ် ၂ ခုရဲ့ ငွေစာရင်းကို သိမ်းဆည်း ပိတ်ပင်လိုက်တာလို့ ဆိုပါတယ်။

မိမိတို့ဘဏ်ကလည်း မြန်မာ ဘဏ် ၂ ခုမှာ ဒေါ်လာ ၂ သိန်းစီ အပ်နှံထားတာ ရှိကြောင်းနဲ့ ထပ်တိုး လုပ်ဆောင်ရမယ့် ကိစ္စတွေကို ဘင်္ဂလားဒေ့ရှ် ဗဟိုဘဏ်ရဲ့ လမ်းညွှန်ကြီးကြပ်မှုနဲ့ ဆက်လက် လုပ်ဆောင် သွားမယ်လို့ ဆိုတာလီဘဏ် မန်နေးဂျင်း ဒါရိုက်တာနဲ့ စီအီးအို ဖြစ်သူ မက်ဒ်အက်ဖ်ဇယ်ကာရင်က ပြောကြားပါတယ်။

MKF-001

#Mekongnews

#MFTB_MICB

#ဆိုနာလီဘဏ်

#ဘင်္ဂလားဒေ့ရှ်

Ref: thedailystar

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)