ဒီဇင်ဘာ ၂၈ ရက် ညနေ ၅ နာရီမှာ အင်အား ၅၀ ပါ စစ်‌ကောင်စီ ခြေလျင် စစ်ကြောင်းကို မိုင်း ၂ လုံး ဖောက်ခွဲပြီး လက်နက်ငယ်တွေနဲ့ ၁၀ မိနစ်ခန့် ပစ်ခတ် တိုက်ခိုက်ခဲ့တာလို့ ဒေသခံ ကာကွယ်ရေးတပ်တွေက ထုတ်ပြန်ထားပါတယ်။

အဲဒီ တိုက်ခိုက်မှုမှာ စစ်ကောင်စီတပ်သား ၆ ဦးသေဆုံးပြီး ၃ ဦး ဒဏ်ရာရကာ ဒေသခံ ပြည်သူ့ကာကွယ်ရေးတပ်ဖွဲ့ဘက်မှ အထိခိုက်မရှိ ပြန်လည် ဆုတ်ခွာနိုင်ခဲ့တယ်လို့ သိရပါတယ်။

တိုက်ခိုက်ခံရပြီးနောက် စစ်ကောင်စီတပ်က ရမ်းသန်း ပစ်ခတ်မှုတွေ ပြုလုပ်ခဲ့ပြီး ဒီဇင်ဘာ ၂၉ ရက် မနက်ပိုင်းမှာ ဝဲရစ်ကျေးရွာထဲသို့ ဝင်ရောက်ကာ ရှာဖွေ လုယက်မှုတွေ ပြုလုပ်ခဲ့တယ်လို့ သိရပါတယ်။

ဒါ့အပြင် မနေ့က ညနေ ၄ နာရီမှာ ထားဝယ်-ပုလော ကားလမ်းမပေါ်ရှိ ဘုတ်တောင်မှာ ခြေလျင် ထွက်လာတဲ့ စစ်ကောင်စီတပ်ဖွဲ့ မိုင်းဆွဲ တိုက်ခိုက်ခံရပြီး ထိခိုက် သေဆုံးမှု အခြေနေကိုတော့ ဒေသခံ ကာကွယ်ရေးတပ်တွေ ဘက်က ထုတ်ပြန်ထားတာ မရှိသေးပါဘူး။

မိုင်းဆွဲ တိုက်ခိုက် ခံရတဲ့ စစ်ကောင်စီတပ်ဟာ ဥယျာဉ်ခြံတွေဘက်ကို ရမ်းသန်း ပစ်ခတ်မှုတွေ ပြုလုပ်ခဲ့ပေမယ့် ဒေသခံကာကွယ်ရေးတပ်တွေ အထိခိုက်မရှိ ဆုတ်ခွာနိုင်ခဲ့တယ်လို့ သိရပါတယ်။

အဲဒီ တိုက်ခိုက်မှုတွေကို သရက်ချောင်းမြို့နယ် ပြည်သူ့ကာကွယ်ရေးအဖွဲ့-ပကဖ အဖွဲ့ဝင်တွေဖြစ်တဲ့ ဒေါင်းမင်း စစ်ဆင်ရေးအဖွဲ့TYC-PDF ၊ ပုတီးတစ်လုံး ပြောက်ကျားတပ်ဖွဲ့နဲ့ မဟာမိတ်ဖြစ်တဲ့ အဖြူရောင် ရိန်းဂျား အဖွဲ့တို့ ပူးပေါင်း လုပ်ဆောင်ခဲ့တာလို့ သိရပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)