မဲခေါင်၊ ဇွန် ၄
ရှမ်းပြည်နယ် တောင်ပိုင်း၊ ဖယ်ခုံမြို့နယ်မှာ လက်နက်မပါပဲ ထွက်ပြေးလာတဲ့ လွိုင်လင်လေး အခြေစိုက် ခမရ(၅၃၀)မှ စစ်ကောင်စီတပ်သား ၃ ဦးကို ဖယ်ခုံအခြေစိုက် ပြည်သူ့ကာကွယ်ရေးတပ်မတော် အမှတ် (၁၀၀၆) တပ်ရင်းက ဖမ်းဆီးပြီး ကောင်းမွန်စွာထိန်းသိမ်း ထားတယ်လို့ ၁၀၀၆ တပ်ရင်းကနေ သိရပါတယ်။
ထွက်ပြေးလာသူတွေဟာ အာဏာသိမ်းစစ်တပ်ထံကနေ ထွက်ခွါချင်တာကြာပြီဖြစ်ပြီး အခွင့်သာတာနဲ့ ထွက်ပြေးလာတာလို့ ၁၀၀၆တပ်ရင်း ပြောရေးဆိုခွင့်ရှိသူ မခွာညိုက မဲခေါင်သတင်းဌာနကိုပြောပါတယ်။
“သူ့တို့ မနေချင်တာကြာပါပြီ။ ပြေးဖို့ အခွင့်သာတာ စောင့်ရင်း ပြေးလာခဲ့ကြတာပါ။ ၃ယောက်ပါ။ လွတ်လပ်ချင်တဲ့စိတ်ဆန္ဒရှိလို့ ပြေးလာတာ။မအလစစ်တပ်ကိုပြန်မပို့ရင်ရပါပြီ ပြည်သူ့ရင်ခွင်မှာပဲ ခိုလှုံချင်ပါတယ်လို့တော့ ပြောပါတယ်” လို့ သူက မဲခေါင်ကိုပြောပါတယ်။
လက်နက်မဲ့ ထွက်ပြေးလာတဲ့ သူတို့ ၃ ဦးကို မနေ့ ဇွန်လ၊ ၃ ရက် မနက် ၁၁း၀၀နာရီအချိန်မှာ Pekhon PDF (၁၀၀၆ တပ်ရင်း)က ဖယ်ခုံမြို့နယ်၊ ရွှေဆန်းကျေးရွာအနီးမှာ ဖမ်းမိခဲ့တာလို့ သိရပါတယ်။
လက်နက်မဲ့ ထွက်ပြေးလာတဲ့ စစ်ကောင်စီ တပ်သား ၃ ဦးလုံးဟာ ဒေသကွပ်ကဲမှု စစ်ဌာနချုပ် (လွိုင်ကော်) လက်အောက်ခံ၊ လွိုင်လင်လေး အခြေစိုက် အမှတ် (၅၃၀) ခြေမြန်တပ်ရင်းက ဖြစ်တယ်လို့ အမျိုးသား ညီညွတ်ရေးအစိုးရ(NUG)၊ ကာကွယ်ရေး ဝန်ကြီးဌာန (MOD) ရဲ့ ထုတ်ပြန်ချက်အရသိရပါတယ်။
လက်ရှိမှာ သူတို့ကို ဂျီနီဗာကွန်ဗင်းရှင်းနဲ့အညီ စစ်သုံ့ပန်းတွေကို ဆက်ဆံရမယ့်အတိုင်း ကောင်းမွန်စွာထားရှိပြီး စစ်ဆေးမေးမြန်တာတွေကို လုပ်ဆောင်နေတယ်လို့ မခွါညိုကဆက်ပြောပါတယ်။
“ဂျီနီဗာကွန်းဗင်းရှင်း နဲ့အညီပဲ ဆောင်ရွက်သွားမှာပါ။ ကောင်းမွန်စွာ ထားရှိပါတယ်။ အနာတရ ဖြစ်အောင် လုပ်တာမျိုးမရှိပါဘူး။ သူတို့လည်း ကောင်းမွန်စွာ နေပါတယ်။ ကျန်ရှိနေတဲ့ သူတွေလည်း ကျွန်မတို့က ဂျီနီဗာကွန်ဗင်းရှင်းအရ လုံခြုံ ကောင်းမွန်စွာ ထားရှိတာမလို့ အမြန် CDMလုပ်၊ လက်နက်ချ အလင်းဝင် ကြဖို့ ပြောချင်ပါတယ်” သူက ပြောပါတယ်။
စစ်ကောင်စီတပ်က ရှမ်းပြည်နယ်(တောင်ပိုင်း) နှင့် ကရင်နီ (ကယား) ပြည်နယ်တို့ကို နေ့စဉ်ရက်ဆက် လေကြောင်း တိုက်ခိုက်တာ၊ လက်နက်ကြီးပစ်တာ အပြင် အင်အားအလုံးအရင်းနဲ့ ထိုးစစ်ဆင်တိုက်ခိုက်ပေမယ့် နှစ်ဖက်စလုံး ထိခိုက်ကျဆုံးမှုများစွာ ရှိနေပါတယ်။
စစ်ကောင်စီတပ်ဟာ နိုင်ငံအဝန်း စစ်မျက်နှာများစွာ ဖွင့်ထားရပြီး လက်ရှိအခြေအနေတွင် နယ်မြေများကို ထိန်းချုပ်နိုင်စွမ်း မရှိတော့တဲ့အပြင် စစ်ကောင်စီ တပ်သားတွေဟာ ရှေ့တန်း စစ်မျက်နှာများတွင် ထိခိုက် ကျဆုံးမှု များတာ၊ အနားမရတာ၊ နောက်တန်း ဌာနချုပ်များတွင်ပါ လုံခြုံမှုမရှိတာ စတာတွေကြောင့် တိုက်လို ခိုက်လိုစိတ် လျော့နည်းလာပြီး တပ်စွန့်ခွာ ထွက်ပြေးမှုများလည်း တနေ့ထက် တနေ့များလာတယ်လို့ ကာကွယ်ရေး ဝန်ကြီးဌာန (MOD)က သူတို့ရဲ့ ထုတ်ပြန်ချက်မှာ ဖော်ပြထားပါတယ်။
#MeKongNews
#NUG
#MOD
#CDM
#၁၀၀၆တပ်ရင်း
#စစ်ကောင်စီ