မဲခေါင်၊ ဇန်နဝါရီ ၂၅
ရန်ကုန်တိုင်း၊ မြို့နယ်အချို့မှာ စစ်တပ်က အိမ်စီးကားတွေ အသုံးပြုပြီး လူငယ်အချို့ကို ဒီကနေ့ ဇန်နဝါရီ ၂၅ ရက် နေ့လယ်ပိုင်းက ဖမ်းဆီးမှုတွေ ပြုလုပ်ခဲ့တယ်လို့ ဒေသခံတွေက ပြောပါတယ်။
ကြည့်မြင်တိုင်မြို့နယ် ကမ်းနားလမ်း၊ စည်ပင်ရုံး အနီး အငှားယာဉ်ပေါ်မှ ဆင်းလာတဲ့ လူငယ် ၂ ဦးကို အိမ်စီးကား အသုံးပြုတဲ့ စစ်သားတွေက ဒူးထောက် ဖမ်းဆီးထားပြီး ဓာတ်ပုံရိုက်ကာ လက်ကိုင်ဖုန်းတွေ ကိုလည်း စစ်ဆေးနေတယ်လို့ မျက်မြင်တွေ့သူ တစ်ဦးက ပြောပါတယ်။
“ တစ်နာခွဲကျော်လောက်က ဖြစ်သွားတာ။ ကားတွေ လှည့်ပြီး ပြန်မောင်းခိုင်းတယ်။ စစ်သား ရဲနဲ့ ယာဉ်ထိန်း တွေလည်း ပါတယ်။ ကမ်းနားလမ်းနဲ့ ဟုမ်းလမ်းထောင့်မှာ အထုပ်တွေ့လို့ စစ်နေကြတာ။ ကလေး ၂ ယောက်ကတော့ တက္ကဆီပေါ်က ဆင်းလာတာနဲ့ ဖမ်းပြီး စစ်နေတာ။ ဘာမှ မဖြစ်ပါစေနဲ့ ဆုတောင်းရမှာပဲ” လို့ သူကပြောပါတယ်။
စစ်တပ်က အထုပ်မဲကို စစ်ဆေးပြီးနောက် နေ့လယ် ၂ နာရီကျော်မှာတော့ အဖွဲ့တွေ ခွဲကာ ပြန်ထွက်သွားတယ်လို့ ဒေသခံတွေက ပြောပါတယ်။
ဒါ့အပြင် နေ့လယ် ၁ နာရီကျော်က လှိုင်သာယာမြို့နယ် FMI အိမ်ယာဝန်းထဲ ဖွင့်လှစ်ထားတဲ့ ရိုးမဘဏ်မှာ ငွေလွှဲဖို့လာသူ တစ်ဦးကို စစ်တပ်က အိမ်စီးကား ၃ စီး၊ စစ်ကား ၃ စီးနဲ့ လာရောက် ဖမ်းဆီးကာ ပုသိမ်လမ်း အတိုင်း မောင်းထွက်သွားတယ်လို့ မျက်မြင်တွေ့သူ တစ်ဦးက ပြောပါတယ်။
လက်ရှိ ရန်ကုန်-ပုသိမ်လမ်းနဲ့ ကျန်စစ်သား လမ်းပေါ်မှာ ယူနီဖောင်းဝတ်နဲ့ အရပ်ဝတ် စစ်ကောင်စီတပ်ဖွဲ့ အင်အား အများအပြားနဲ့ စောင့်ကြည့်မှုတွေ လုပ်နေသလို မီးခွက်ဈေးထိပ်နဲ့ BOC လမ်းဆုံမှာလည်း စစ်သားအင်အား အများအပြား ရှိနေတယ်လို့ သူကပြောပါတယ်။
ဒီကနေ့ မနက် ၄ နာရီကျော်ကလည်း သာကေတမြို့နယ် (၆) ရပ်ကွက် အရှေ့ပိုင်း၊ ရပ်ကွက် အုပ်ချုပ်ရေးမှူးရုံး ပေါက်ကွဲမှု ဖြစ်ပွားခဲ့ရာ လူထိခိုက်မှု မရှိပေမယ့် ရုံးခေါင်မိုးတွေ ပွင့်ထွက်သွားတယ်လို့ ဒေသခံတွေက ပြောပါတယ်။
MK-005
ဓာတ်ပုံ – ပုံဟောင်း ဖြစ်ပါတယ်။