စစ်ကောင်စီ ပြုလုပ်ဖို့ပြင်ဆင်နေတဲ့ ရွေးကောက်ပွဲအတွက် သန်းခေါင်စာရင်း ကောက်ယူတဲ့ ပုံစံနဲ့ လဝက၊ ထွေအုပ်၊ ကျောင်းဆရာ ဆရာမတွေ၊ အုပ်ချုပ်ရေးမှူးတွေနဲ့ စတင် ကောက်ခံမှာဖြစ်ပြီး သန်းခေါင်စာရင်းနဲ့ မှတ်ပုံတင် မိတ္တူ ပေးရမှာဖြစ်တယ်လို့ ရွှေပြည်သာမြို့နယ်မှာ နေထိုင်သူတစ်ဦးက ပြောပါတယ်။
(၂၄) ရပ်ကွက် ဇီးကုန်းမှာ ၄ ရက်နေ့ ည ၇ နာရီကျော်လောက်က ရပ်ကွက်ထဲ လိုက်အော်နေတာ။ အဆောင်နေတဲ့ သူတွေက မှတ်ပုံတင် မိတ္တူ ပေးရမယ်။ အိမ်ရှင်တွေကတော့ သန်းခေါင်စာရင်း မိတ္တူ ပေးရမယ်။ လူများတဲ့နေရာတွေ စောပြီး ကောက်တယ်လို့ ပြောတယ်။ အခြား မြို့နယ်တွေမှာတော့ ၉ ရက်နေ့မှ စကောက်မယ်ကြားတယ်
လို့ ရွှေပြည်သာ ဇီးကုန်းရပ်ကွက်နေ ပြည်သူ တစ်ဦးက ပြောပါတယ်။
စစ်ကောင်စီက ရွေးကောက်ပွဲ အတွက် လူဦးရေ စာရင်း ကောက်ယူမှုကို ရန်ကုန်တိုင်း အတွင်း ဇန်နဝါရီ ၉ ရက်နေ့မှ စတင်ဖို့ ပြင်ဆင်ထားပြီး လူဦးရေများတဲ့ မြို့နယ်တွေမှာတော့ ၆ ရက်နေ့မှ စတင်ကာ ကြိုတင်ကောက်ယူမှာဖြစ်တယ်လို့ ရပ်ကွက်အုပ်ချုပ်ရေးမှူးတစ်ဦးက ပြောပါတယ်။
ပြည်သူတွေ အသိအမှတ် မပြုဘူးဆိုတာ သိပါတယ်။ စစ်တပ်က ခိုင်းလို့ လုပ်နေရတဲ့ သူတွေလည်း အများကြီး။ အလုပ်က ထွက်ရင်လည်း မိသားစုကို ဒုက္ခပေးကြမှာ။ သူတို့ ခိုင်းသမျှတော့ လုပ်ပေးနေရဦးမှာပါ။ ကျောင်းဆရာမ တွေလည်း မလုပ်ချင်ပေမယ့် ခိုင်းတော့ လုပ်နေရတာ။ လုံခြုံရေးတော့ ပါမယ်ပြောတယ်
လို့ သူပြောပါတယ်။
စစ်ကောင်စီက ပြုလုပ်မယ့် အမည်ခံ ရွေးကောက်ပွဲကို ပြည်သူလူထုက အသိအမှတ် မပြုဘဲ တရားမဝင် ရွေးကောက်ပွဲ အဖြစ် နိုင်ငံအနှံ့အပြားမှာ ဆန္ဒဖော်ထုတ်မှုတွေ ပြုလုပ်နေကြပါတယ်။