မဲခေါင်၊ မတ် ၂၄

အာဏာသိမ်းစစ်တပ် ထပ်ပိုင်းခေါင်းဆောင် အသိုင်းအဝိုင်းနဲ့ နီးစပ်တဲ့ ဦးမင်းတေဇညွန့်တင်ကို သန်လျင်မြို့နယ်ထဲမှာ ဒီနေ့နေ့လည် တစ်နာရီလောက်က Urban Owls မြို့ပြပြောက်ကျားအဖွဲ့က ရှင်းလင်းလိုက်ပါတယ်။

ဦးမင်းတေဇညွန့်တင်ဟာ စစ်တပ်အသိုင်းအဝိုင်းအတွက် ဒေါ်လာသန်းရာချီ ပြည်ပကို ရွှေ့ပြောင်းပေးနေတဲ့ သူလည်းဖြစ်တယ်လို့ နီးစပ်တဲ့ အသိုင်းအဝိုင်းကနေ သိရပါတယ်။

ရှင်းလင်းခဲ့တဲ့ အဖွဲ့တွေရဲ့ စုံစမ်းချက်တွေအရ သူဟာ စစ်ကောင်စီရဲ့ အာဏာသိမ်းမှုကို ပေါ်ပေါ်တင်တင်ထောက်ခံရုံသာမက စစ်ကောင်စီနဲ့ အကျိုးတူစီးပွားရေးများစွာကို လုပ်ကိုင်ဆောင်ရွက်နေသူဖြစ်ပါတယ်။

လက်ရှိမှာ ထားဝယ်အထူးစီးပွားရေးဇုန် ဥပဒေရေးရာကော်မတီဝင်တဦးဖြစ်ပြီး ပြည်သူလူထုအပေါ် နေ့စဉ်ရက်ဆက် တိုက်လေယာဉ်တွေနဲ့ ဗုံးကြဲနေတဲ့ စစ်ကောင်စီလေတပ်ကိုဦးစီးသူ စစ်တပ်ရဲ့ လေတပ်ချုပ်ဟောင်း ဗိုလ်ချုပ်ကြီးမြတ်ဟိန်း (လက်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဒုတိယဥက္ကဌ)နဲ့ အလွန်ရင်းနှီးသူဖြစ်ပါတယ်။

လေတပ်ချုပ်နဲ့ မိသားစုဝင်တွေအပါအဝင် စစ်ဗိုလ်ချုပ်တွေ၊ စစ်ကောင်စီနဲ့ဆက်စပ်နေသူတွေရဲ့ ပိုင်ဆိုင်မှုတွေကို ဒဏ်ခတ်ပိတ်ဆို့ထားတဲ့ ကြားကနေ သူတို့ ပိုင်ဆိုင်မှုတွေ၊ ငွေကြေးတွေကို ပြည်ပကို ပြောင်းရွှေ့ပေးနေသူဖြစ်ပါတယ်။

မဲခေါင်သတင်းဌာနရဲ့ စုံစမ်းသိရှိရတဲ့ အချက်အလက်တွေအရ ဦးမင်းတေဇညွန့်တင်ဟာ အာဏာသိမ်းစစ်ခေါင်းဆောင် မင်းအောင်လှိုင်ရဲ့ သားဖြစ်သူ အောင်ပြည်စုံ ပိုင်ဆိုင်တဲ့ ကုမ္ပဏီတွေမှာလည်း ရှေ့နေပိုင်းဆိုင်ရာကိစ္စရပ်တွေကို လုပ်ကိုင်ပေးနေသူဖြစ်တယ်လို့ သိရပါတယ်။

ဦးမင်းတေဇညွန့်တင်ကို ရှင်းလင်းခဲ့တဲ့ ရဲဘော်တွေဟာ ဘေးလွတ်ရာကို ရောက်ပြီးလို့ သိရပါတယ်။ ဒီနေ့နေ့လည်ပိုင်းက သန်လျင်တံတားကို ပိတ်ဆို့ကာ စစ်ဆေးမှုတွေပြုလုပ်တာဟာလည်း ဒီဖြစ်စဉ်ကြောင့် ဖြစ်တယ်လို့ မဲခေါင်သတင်းဌာနက စုံစမ်းသိရပါတယ်။

#MeKongNews

#UrbanOwls

#မင်းတေဇညွန့်တင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)