မဲခေါင်၊ ဇန်နဝါရီ ၂၁
မကွေးတိုင်း၊ မြိုင်မြို့နယ်၊ ဗဟင်းကျေးရွာရှိ တိုက်နယ် ပြည်သူ့ဆေးရုံကို စစ်ကောင်စီတပ်က လေကြောင်းကနေ ဗုံးကြဲ တိုက်ခိုက်ခဲ့ရာ အသက် ၆၃ အရွယ် အမျိုးသမီး တစ်ဦး သေဆုံးခဲ့တယ်လို့ ဒေသခံတွေထံက သိရပါတယ်။
ဒီနေ့ ဇန်နဝါရီ ၂၁ ရက် နေ့လယ် ၁ နာရီခွဲ ဝန်းကျင်က စစ်တပ်က လေကြောင်းကနေ တိုက်ခိုက်ခဲ့တာကြောင့် ဆေးရုံထဲက မီးဖွား လူနာ အပါအဝင် အခြား လူနာ ၅၀ ကျော်ကို အရေးပေါ် ဘေးလွတ်ရာ ရွှေ့ပြောင်းပေးခဲ့ရပြီး ဆေးရုံ တစ်ခုလုံး နီးပါး ပျက်စီးသွားလို့ ယာယီ ပိတ်ထားခဲ့ရတယ်လို့ ဆိုပါတယ်။
“ခန့်မှန်း ၄၀ မမ လက်နက်ကြီးတွေနဲ့ ကြဲချခဲ့တယ်လို့ သိရပါတယ်။ ဆေးရုံ အနောက်ဘက်အိမ်က အသက် ၆၃ နှစ်အရွယ် အမျိုးသမီး တစ်ဦး မန်ကျည်းပင်အောက် ဝင်ခိုပုန်းရာကနေ လက်နက်ထိလို့ ခြေထောက်နှစ်ချောင်း ပြတ်ပြီး လက်အရိုးတွေ ထွက်သွားတာကြောင့် သေဆုံးတယ်လို့ သိရပါတယ်” လို့ မြိုင်မြို့နယ် နွေဦးတော်လှန်ရေး အဖွဲ့ဝင် တစ်ဦးက ပြောပါတယ်။
စစ်တပ်က လေကြောင်းကနေ နာရီဝက်ခန့် ပစ်ခတ်ခဲ့တာကြောင့် ဗဟင်းဆေးရုံ ပင်မဆောင်၊ ဓာတ်ခွဲခန်း၊ ရေစင်နဲ့ သံဃာဆောင်တို့ကို အချက် ၂၀ ဝန်းကျင် ထိမှန်ခဲ့ပြီး လူနာလာပို့တဲ့ ကားတစ်စီး ပျက်စီးသွားတယ်လို့ သိရပါတယ်။
ဗဟင်း တိုက်နယ်ဆေးရုံကို အမျိုးသား ညီညွတ်ရေး အစိုးရက ဖွင့်လှစ်ထားတာဖြစ်ပြီး တိုက်ပွဲတွေ မရှိဘဲ ဆေးရုံကို အတိအကျ ပစ်ခတ်သွားတာလို့ ဒေသခံ ကာကွယ်ရေးတပ်ဖွဲ့တွေက ပြောပါတယ်။
စစ်ကောင်စီဟာ အခုရက်ပိုင်း အတွင်း တိုက်ပွဲ မရှိတဲ့ ဒေသတွေမှာ လေကြောင်း တိုက်ခိုက်မှုတွေ ဆက်တိုက် လုပ်နေရာ ဇန်နဝါရီ ၁၉ ရက်နေ့မှာ ကောလင်းမြို့နယ် ကျောက်ပျဉ်သာရွာက ဘုန်းကြီးကျောင်းကို လေကြောင်းက တိုက်ခိုက်ခဲ့ပြီး ဇန်နဝါရီ ၁၈ ရက်နေ့က ကသာမြို့နယ်၊ မိုးတားလေးကျေးရွာကို လေယာဉ်နဲ့ ဗုံးကြဲခဲ့တာကြောင့် ဒေသခံ ၅ ဦးထက်မနည်း သေဆုံးခဲ့ပါတယ်။
MK-009