မဲခေါင်၊ မတ် ၂၉
ရှမ်းပြည်နယ် တောင်ပိုင်း၊ ပင်လောင်းမြို့နယ် စစ်ဘေးရှောင် စခန်းတွေမှာ စစ်ဘေးရှောင် ပြည်သူ အများအပြား ဖျားနာနေလို့ ကုသရေးနဲ့ ဆေးဝါး အကူအညီတွေ လိုအပ်နေတယ်လို့ ကူညီနေသူတွေက ပြောပါတယ်။
ပင်လောင်းမြို့နယ်မှာ စစ်ဘေးရှောင် ပြည်သူတွေ ခိုလှုံနေတဲ့ စခန်းပေါင်း ၂၀ နီးပါးရှိပြီး စခန်းတိုင်းမှာ ဖျားနာသူ ၂၀ နဲ့ အထက်ရှိတယ်လို့ ဆိုပါတယ်။
“အဓိက အအေးမိ နှာစေးတွေ များတယ်။ ရာသီဥတုက အေးလိုက် ပူလိုက် မိုးရွာလိုက် ဆိုတော့ အသက်ကြီးတဲ့ လူနဲ့ ကလေးက များတော့ တုပ်ကွေးတွေက ပိုများပါတယ်။ ပြီးတော့ သွေးတိုးနဲ့ ဆီးချိုတွေလည်း နည်းနည်းရှိတယ်။ ကျွန်တော်တို့ ကတော့ ကွင်းဆင်းပြီး လိုက်ကုပေးနေပေမယ့် လိုအပ်ချက်တွေက အများကြီး ရှိနေသေးတယ်” လို့ စစ်ဘေးရှောင် တွေကို ကျန်းမာရေး စောင့်ရှောက်မှု ကူညီနေတဲ့ ပအိုဝ်းဒေသ ကျန်းမာရေး လုပ်ငန်း ဖော်ဆောင်မှု ကော်မတီ PHWC အဖွဲ့ တည်ထောင်သူ ခွန်စည်သူ က ပြောပါတယ်။
PHWC အဖွဲ့ အနေနဲ့ ကူညီနေပေမယ့်လည်း လူဦးရေကများပြီး အဖွဲ့အနေနဲ့ အမြဲတမ်းနေထိုင် စောင့်ရှောက်မှု မပေးနိုင်လို့ လိုအပ်မှုတွေ ရှိနေတယ်လို့ သူကပြောပါတယ်။
“အခုက ပင်လောင်းမှာ ထိုင်ပြီး ကူနိုင်အောင် ကြိုးစားနေတယ်။ ဆေးဝါးတွေလည်း အများကြီး လိုအပ်နေသေးလို့ ဆက်ရှာနေတယ်” လို့ သူကပြောပါတယ်။
စစ်ဘေးရှောင် စခန်း တစ်ခုမှာ လူ ၃၀၀ ခန့်ရှိနေပြီး အစုလိုက် နေထိုင်ရလို့ တုပ်ကွေးရောဂါ လျှင်မြန်စွာ ကူးစက်ကာ အသက်ကြီးသူတွေ၊ ကလေးတွေနဲ့ ကိုယ်ခံအား နည်းသူတွေ ပြင်းပြင်းထန်ထန် ခံစားရနိုင်တယ်လို့ သူကပြောပါတယ်။
စစ်ဘေးရှောင်တွေထဲက ဖျားနာ ချောင်းဆိုးတာတွေကို ကျန်းမာရေး အဖွဲ့အစည်းတွေက ကုသပေးနေပြီး ကျန်းမာရေး ဆိုးရွားတဲ့ လူတွေကိုတော့ ပင်လောင်းဆေးရုံ ပို့ဆောင် ကုသမှု ခံယူနိုင်အောင် စီစဉ်ပေး နေတယ်လို့လည်း စစ်လေးရှောင် ကူညီနေသူ ပင်လောင်းမြို့ခံ တစ်ဦးက ပြောပါတယ်။
“ဆေးဝါး အကူအညီတွေ လိုအပ်တယ်။ အခုက ဆေးလည်း သိတဲ့ အတိုင်းပဲ ဝယ်ရတာ ဈေးကြီးတော့ ကုန်ကျစရိတ်က များလာတယ်” လို့ သူကပြောပါတယ်။
ဒါ့အပြင် ပင်လောင်းမြို့နယ် တောင်ဘက်ပိုင်းဟာ ရေရှားပါးတဲ့ ဒေသ ဖြစ်တာကြောင့် စစ်ဘေးရှောင်တွေ သောက်ရေ၊ သုံးရေ လုံလောက်မှု မရှိဘူးလို့လည်း ပင်လောင်းမြို့ခံ တစ်ဦးက ပြောပါတယ်။
ပင်လောင်းမြို့နယ် တောင်ဘက်စွန်းဒေသမှာ ဖေဖော်ဝါရီ လကုန်ပိုင်းက စပြီး တော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲတွေ ဖြစ်ပွားလို့ ဒေသခံ ၅,၀၀၀ ကျော်ဟာ ပင်လောင်းမြို့နယ် အတွင်းပိုင်းမှာ ထွက်ပြေး တိမ်းရှောင် နေရတာ ဖြစ်ပါတယ်။
CJ-002
#MeKongNews
#ပင်လောင်းမြို့နယ် #စစ်ဘေးရှောင် #PHWC-အဖွဲ့