မဲခေါင်၊ ဇန်နဝါရီ ၁၈
တစ်ခါ ခြင်္သေ့ ဖြစ်ဖူးရင် အမြဲတမ်း ခြင်္သေ့ ဖြစ်ရမယ်ဆိုပြီး လူမိုက်အဖြစ် ဝိဂြိုလ်ပြုခံရသူ ကြံ့ခိုင်ရေးပါတီ ဥက္ကဋ္ဌ ဦးခင်ရီက ပါတီဝင်ဟောင်းတွေကို တောင်ကြီးမှာ အတင်းခေါ်ယူ တွေ့ဆုံခဲ့တယ်လို့ သတင်းရင်းမြစ်တွေထံက သိရပါတယ်။
တောင်ကြီးမြို့ရှိ ရှမ်းပြည်နယ်ပါတီ ရုံးခန်းမမှာ ဇန်နဝါရီလ ၁၆ ရက်က လူမှုရေးအသင်းအဖွဲ့တွေ၊ ဘာသာရေး အသင်းအဖွဲ့တွေ၊ ရှမ်းတောင် ပါတီ တာဝန်ရှိသူတွေ အပြင် နှုတ်ထွက်ထားတဲ့ ပါတီဝင်ဟောင်းတွေကိုပါ အတင်း ခေါ်ယူ တွေ့ဆုံခဲ့တာ ဖြစ်တယ်လို့ ဆိုပါတယ်။
“ ဖိတ်စာနဲ့ လာဖိတ်တာ ဆိုပေမယ့် မတက်မနေရ ပုံစံမျိုးကို ပြောသွားတာ။ နှုတ်ထွက်ထားတဲ့ ပါတီ အမာခံဟောင်း တချို့ ဆိုရင် သူကိုယ်တိုင် ဖုန်းဆက်ခေါ်တာ။ တစ်ခါ ခြင်္သေ့ဖြစ်ဖူးရင် အမြဲတမ်း ခြင်္သေ့ ဖြစ်ရမယ်ဆိုပြီး ပြောပြောပြီး ခေါ်တာပေါ့။ ဆွေးနွေးပွဲ မိန့်ခွန်းမှာပါ ထည့်ပြောသွားသေးတယ်” လို့ သတင်းရင်းမြစ်တစ်ဦးက ပြောပါတယ်။
အဲဒီဆွေးနွေးပွဲမှာ ဦးခင်ရီက ၂၀၂၀ ရွေးကောက်ပွဲ ကာလမှာ ဖြစ်ပေါ်ခဲ့တဲ့ ကိစ္စတွေ၊ ရက် ၉၀ စီမံချက်မှာ ပါဝင်တဲ့ တန်းတူရည်တူ ဆက်ဆံရေး ကိစ္စရပ်တွေ၊ လူငယ်၊ အမျိုးသမီး၊ မီဒီယာ၊ နိုင်ငံတကာ စတဲ့ ရပ်ဝန်း ၈ ခု အချက်အလက်တွေနဲ့ လာမယ့် ရွေးကောက်ပွဲ အောင်မြင်ရေး အတွက် လုပ်ဆောင်ရမယ့် ကိစ္စရပ်တွေကို ပြောဆို ဆွေးနွေးခဲ့တယ်လို့ သိရပါတယ်။
ဒါ့အပြင် ပါတီတွင်း စည်းလုံးညီညွတ်မှုရှိဖို့၊ တစ်ယောက်ရရင် တစ်ယောက်၊ တစ်အိမ်ရရင် တစ်အိမ် ရသမျှ စည်းရုံးပြီး ပါတီ အောင်နိုင်ရေး အတွက် စည်းရုံးရေး လုပ်ငန်းတွေ တိုးချဲ့ဆောင်ရွက်ဖို့ ခိုင်းစေခဲ့တယ်လို့ သိရပါတယ်။
ပြီးခဲ့တဲ့ ဇန်နဝါရီလ ၁၅ ရက်ကလည်း အဲဒီရုံးခန်းမမှာ ပအိုဝ်း၊ ရှမ်း၊ ကိုးကန့်၊ အင်း၊ တောင်ရိုး၊ ပလောင်၊ ယင်းကြား၊ မုန်းဝန်းစတဲ့ တိုင်းရင်းသား စာပေယဉ်ကျေးမှု အဖွဲ့ ၈ ဖွဲ့ကို ခေါ်ယူတွေ့ဆုံကာ ရွေးကောက်ပွဲ အောင်မြင်စွာ ကျင်းပနိုင်ဖို့ အတွက် စည်းလုံးညီညွတ်စွာနဲ့ ဝိုင်းဝန်းဆောင်ရွက်ကြဖို့ ပြောဆိုခဲ့တယ်လို့ သိရပါတယ်။
MK-008