မဲခေါင်၊ ဇန်နဝါရီ ၇
စစ်တပ်က စစ်အုပ်ချုပ်ရေး ကြေညာထားတဲ့ မြို့နယ် ၃၇ ခုက ပြည်သူတွေ မထိခိုက်စေဖို့ NUG အနေနဲ့ တာဝန်ရှိတယ်လို့ အမျိုးသား ညီညွတ်ရေး အစိုးရ၊ ပြည်ထောင်စု ဝန်ကြီးချုပ် မန်းဝင်းခိုင်သန်း က ဒီကနေ့ ပြုလုပ်တဲ့ ၅/၂၀၂၃ အစိုးရအဖွဲ့ အစည်းအဝေးမှာ သတိပေး ပြောကြားလိုက်ပါတယ်။
ပြီးခဲ့တဲ့ ဇန်နဝါရီ ၂ ရက်နေ့က စစ်ကောင်စီဘက် အာဏာသိမ်းမှု ၆ လ ထပ်တိုးတာနဲ့အတူ အပြောင်းအလဲတွေ လုပ်လာရာမှာ မြို့နယ် ၃၇ ခုကိုလည်း အုပ်ချုပ်ရေးနဲ့ တရားစီရင်ရေးဆိုင်ရာ စစ်အုပ်ချုပ်ရေး အာဏာကို ကျင့်သုံးဖို့ အမိန့်ထုတ်ခဲ့တဲ့အပေါ် သူက အခုလို သတိပေးလိုက်တာပါ။
“ ကျွန်တော်တို့ အစိုးရအနေနဲ့ စနစ်တကျ လေ့လာသုံးသပ်ဖို့ လိုမှာ ဖြစ်ပါတယ်။ သူတို့ဟာ ဘယ်လိုပုံစံတွေပဲ ပြောင်းပြောင်း သေချာတာက ကျွန်တော်တို့ ပြည်သူတွေကို ညှဉ်းပန်းနှိပ်စက် ဒုက္ခပေးဖို့ အစီအစဉ်တွေပဲ ဖြစ်မှာ သေချာတယ် ဆိုတာကတော့ အားလုံးသိပြီးသား ဖြစ်ပါတယ်။ ဒါကြောင့် ကျွန်တော်တို့ဟာ အစိုးရ တစ်ရပ် အနေနဲ့ ပြည်သူတွေ အထိအခိုက်နည်းနိုင်သမျှ နည်းအောင် ကြိုးစားရမယ့် တာဝန်အပြည့်ရှိပါတယ်” လို့ သူက ပြောပါတယ်။
စစ်အုပ်ချုပ်ရေး ကြေညာထားတဲ့ ၃၇ မြို့နယ်ဟာ ကြားကာလ အုပ်ချုပ်ရေးဆိုင်ရာ ကိစ္စတွေ စီမံရင်း မိမိတို့ရဲ့ စိုးမိုး ထိန်းချုပ်နယ်မြေတွေ အဖြစ် ဆောင်ရွက်နေတဲ့ မြို့နယ်တချို့ ပါဝင်သလို ချင်းတို့၊ ကရင်နီတို့မှ မြို့နယ်တွေမှာ ဆိုရင် ပြည်နယ်အလိုက် အုပ်ချုပ်ရေး စီမံခန့်ခွဲနေတဲ့ မြို့နယ်တွေ ဖြစ်တယ်လို့ ပြည်ထောင်စု ဝန်ကြီးချုပ်က ပြောပါတယ်။
ဒါကြောင့် ကြားကာလ ဒေသန္တရ အုပ်ချုပ်ရေး ဖော်ဆောင်မှု ဗဟိုကော်မတီမှာ Focal Department အဖြစ် ဆောင်ရွက်နေတဲ့ ပြည်ထဲရေးနှင့်လူဝင်မှုကြီးကြပ်ရေး ဝန်ကြီးဌာနနဲ့ ကာကွယ်ရေး ဝန်ကြီးဌာနတွေ အနေနဲ့ စနစ်တကျ သေချာတိုင်ပင် ဆွေးနွေးပြီး စီမံဆောင်ရွက်မှုတွေ အမြန်ဆုံး လုပ်ထားဖို့ လိုအပ်နေပြီလို့လည်း သူကဆိုပါတယ်။
“ စီမံဆောင်ရွက်မယ့် ပုံစံတွေကိုလည်း ကြားကာလ ဒေသန္တရ အုပ်ချုပ်ရေး ဖော်ဆောင်မှု ဗဟိုကော်မတီမှာ သေချာချပြ တိုင်ပင်ဆွေးနွေး ပေးမယ်ဆိုရင် လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန၊ ကျန်းမာရေး ဝန်ကြီးဌာန၊ ဆက်သွယ်ရေး၊ သတင်းအချက်အလက်နှင့် နည်းပညာ ဝန်ကြီးဌာနတို့လို ပြင်ဆင်ထားရမယ့် ဝန်ကြီးဌာနတွေ အနေနဲ့လည်း လိုအပ်တဲ့ ပြင်ဆင်မှုတွေ လုပ်ထားနိုင်မှာ ဖြစ်သလို ပညာရေးဝန်ကြီးဌာန၊ အမျိုးသမီး၊ လူငယ်နှင့် ကလေးသူငယ် ရေးရာဝန်ကြီးဌာနတို့လို ဌာနတွေ ကလည်း ကလေးသူငယ်တွေ၊ သက်ကြီးရွယ်အိုတွေ၊ အမျိုးသမီးတွေ အတွက် လိုအပ်တဲ့ ပြင်ဆင်မှုတွေ လုပ်ထားနိုင်မှာ ဖြစ်လို့ အားလုံးဝိုင်းဝန်း ကြိုးစား ဆောင်ရွက်ပေးကြဖို့ တိုက်တွန်းပါတယ်” လို့ ပြည်ထောင်စု ဝန်ကြီးချုပ် မန်းဝင်းခိုင်သန်းက ပြောပါတယ်။
အလားတူ နိုင်ငံတကာကို သွားလာ လှုပ်ရှားနိုင်တဲ့ ဝန်ကြီးတွေဟာ ကဏ္ဍ အသီးသီးကနေ လှုပ်ရှား ဆောင်ရွက်နေကြတာ ရှိသလို ပြည်တွင်းက ပြည်သူတွေနဲ့ ကိုယ်တိုင်ကိုယ်ကျ ထိတွေ့အားပေးနိုင်တဲ့ ဝန်ကြီးတွေ ကလည်း ပြည်တွင်းမှာ လှုပ်ရှားစီမံမှုတွေ ဆောင်ရွက်နေကြတာမို့ မိမိတို့ အစိုးရ အနေနဲ့. ဟန်ချက်ညီညီ လှုပ်ရှားဆောင်ရွက်နေကြတယ်လို့လည်း သူက ပြောပါတယ်။
နိုင်ငံတကာရဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ အားပေးမှုတွေက တော်လှန်ရေး အတွက် အရေးပါတာမို့ နိုင်ငံတကာနဲ့ ချိတ်ဆက်ပြီး ဘက်ပေါင်းစုံက အကူအညီတွေ အတွက် ဆောင်ရွက်နေတဲ့ ဝန်ကြီးဌာန တွေကိုလည်း ကျေးဇူးတင်ရှိတယ်လို့ ပြောပါတယ်။
စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာန အနေနဲ့ တော်လှန်ရေး ဘဏ္ဍာငွေ ရရှိနိုင်ရေး ကြိုးပမ်းနေတာ အားရစရာ ကောင်းပြီး စီမံဆောင်ရွက်လိုက်တဲ့ Project တိုင်း အောင်မြင်နေတာဟာ မိမိတို့အတွက် အင်အား ၂ ရပ်ကို ရရှိစေတယ်လို့ သူက ဆိုပါတယ်။
“ အမျိုးသား ညီညွတ်ရေး အစိုးရရဲ့ One year plan အောင်မြင်နိုင်ရေးအတွက် လိုအပ်တဲ့ ဘဏ္ဍာငွေတွေ ရရှိလို့ စိတ်အားတက်ရသလို တစ်ဖက်ကလည်း ဒီလို Project တွေ အောင်အောင်မြင်မြင် ဖြစ်နေတာကို ကြည့်ခြင်းအားဖြင့် ကျွန်တော်တို့ ပြည်သူတွေရဲ့ တော်လှန်ရေးအပေါ် ခံယူချက်၊ ယုံကြည်ချက်တွေဟာ တစ်စက်ကလေးမှ မလျော့သွားဘဲ ပါဝင်ပေးနေကြတာကို သိရတဲ့အတွက် အလွန်ပင် ဝမ်းမြောက်ဝမ်းသာ ဖြစ်ရပါတယ်” လို့ ပြည်ထောင်စု ဝန်ကြီးချုပ်က ပြောပါတယ်။
ပြည်သူတွေရဲ့ ယုံကြည်မှုတွေအတွက် မိမိတို့ အစိုးရအနေနဲ့ စစ်ကောင်စီကို ဖြိုဖျက်ဖို့ သန်မာသထက် သန်မာအောင် ကြိုးစားသွားမယ်လို့လည်း မန်းဝင်းခိုင်သန်းက ကတိပေး ပြောကြားထားပါတယ်။
MK-003
#MeKongNews
#စစ်အုပ်ချုပ်ရေး
#ပြည်ထောင်စုဝန်ကြီးချုပ်
#NUG
