မဲခေါင်၊ ဇန်နဝါရီ ၆
စစ်အာဏာရှင်စနစ်ကို အမြစ်ပြတ် ချေမှုန်းဖို့ အတွက် တစ်ဖွဲ့တည်းက ဦးဆောင်နေလို့ မရဘူးလို့ KIO ဥက္ကဋ္ဌ ဗိုလ်ချုပ်ကြီးအင်ဘန်လ က သတိပေးလိုက်ပါတယ်။
ဖေဖော်ဝါရီလ ၅ ရက်မှာ ကျရာက်တဲ့ ကချင် လွတ်လပ်ရေး တပ်မတော်-KIA တည်ထောင်ခြင်း (၆၂) နှစ်ပြည့် နှစ်ပတ်လည် မိန့်ခွန်းမှာ ကေအိုင်အို ဥက္ကဋ္ဌ ဗိုလ်ချုပ်ကြီး အင်ဘန်လ က အခုလို သတိပေးလိုက်တာပါ။
စစ်အာဏာရှင်စနစ်ကို အမြစ်ပြတ် ချေမှုန်းဖို့ဆိုရင် အခွင့်အရေး တန်းတူဖြစ်ဖို့လိုတဲ့ အပြင် တစ်ဦးတည်း၊ တစ်ဖွဲ့တည်းကပဲ နိုင်ငံရေး ပြဿနာကို ဦးဆောင် ဖြေရှင်းနေလို့ မရဘူးလို့ သူကပြောပါတယ်။
“စစ်မှန်တဲ့ ပြည်ထောင်စုကို အခွင့်အရေး တန်းတူရရှိတဲ့ ပြည်နယ်တွေ၊ Federal Unit တွေနဲ့ ဖွဲ့စည်းထားရမယ်။ လူဦးရေများတဲ့ လူမျိုးဖြစ်ခြင်းကြောင့် အခွင့်အရေး အသာစီးယူလို့ မရပါ။ လူဦးရေများတာ ဖြစ်ပေမဲ့ ဗမာလူမျိုးတွေ အတွက် ပြည်နယ် သတ်မှတ်ပေးရမယ်။ တခြား ပြည်နယ်တွေနဲ့ ဖက်ဒရယ်ယူနစ် တွေထက်ပိုတဲ့ အခွင့်အရေးကို အသာစီး လုယူလို့ မရပါ။ ဒီ (တန်းတူရေး) နည်းလမ်းနဲ့သာ ပြည်တွင်းစစ်ကို ချုပ်ငြိမ်းနိုင်မယ်ဖြစ်ပြီး နိုင်ငံရေး ပြဿနာကို ဖြေရှင်းယူလို့ရမယ့် လမ်းကြောင်း ဖြစ်တယ်။ သို့သော် ပြဿနာကို ဖြေရှင်းတဲ့အခါ အဖွဲ့အစည်း တစ်ခုကိုသာ ရှေ့တန်းတင် ဦးဆောင်ခွင့်ပေးတာမျိုး မပြုလုပ်သင့်ပါ” လို့ ဗိုလ်ချုပ်ကြီးအင်ဘန်လက ပြောပါတယ်။
မြန်မာစစ်တပ်ဟာ တောင်တန်းဒေသမှာ နေထိုင်တဲ့ တိုင်းရင်းသား လူမျိုးတွေကို စစ်ရေး ရည်ရွယ်ချက်တွေနဲ့ တိုက်ခိုက် ချေမှုန်းနေပြီး အခြား တစ်ဖက်မှာတော့ “ငြိမ်းချမ်းရေး” လို့ ကြွေးကြော်ဝါဒဖြန့်ကာ သတ်ဖြတ် ချေမှုန်း ခံနေရတဲ့သူတွေကို ပြစ်မှုကျူးလွန်သူတွေ အဖြစ် နိုင်ငံတကာကို လိမ်လည် ဝါဒဖြန့်နေတယ်လို့လည်း သူက ဆိုပါတယ်။
ဒါကြောင့် ကေအိုင်အို အနေနဲ့ အမျိုးသားညီညွတ်ရေးအစိုးရ၊ ပြည်သူ့တော်လှန်ရေးအဖွဲ့တွေနဲ့ လက်တွဲ ပူးပေါင်းပြီး စစ်ကောင်စီကို တော်လှန်နေတဲ့ လုပ်ငန်းတွေမှာ အားစိုက် လုပ်ဆောင်နေတယ်လို့လည်း မိန့်ခွန်းမှာ ထည့်သွင်း ပြောကြားပါတယ်။
ဗမာလူမျိုးကြီးဝါဒနဲ့ အာဏာရှင်စနစ် အောက်မှာ နှစ်ပေါင်းများစွာ အမြစ်တွယ်ခဲ့တာ ဖြစ်တဲ့အတွက် လက်ရှိ တော်လှန်ရေးကို လုပ်ဆောင်နေတဲ့ အမျိုးသားညီညွတ်ရေးအစိုးရနဲ့ ပြည်သူ့တော်လှန်ရေးအဖွဲ့တွေက လက်တွေ့ လုပ်ငန်း ဖော်ဆောင်ပြသရမှာ ဖြစ်တယ်လို့လည်း ဗိုလ်ချုပ်ကြီး အင်ဘန်လက ဆိုပါတယ်။
လက်ရှိ အခြေအနေမှာ စစ်ကောင်စီကို ဘုံရန်သူအဖြစ် စစ်မျက်နှာဖွင့်ကာ ဝိုင်းဝန်း တော်လှန်နေကြပေမဲ့ လက်ဝါးကြီး အုပ်ချင်တဲ့ လူမျိုးကြီး စိတ်ဓါတ်တွေ လက်မလွတ်နိုင်သေးရင် အမျိုးသား တော်လှန်ရေးလည်း နှစ်ကြာရှည်လာနိုင်တယ်လို့ ကေအိုင်အို ဥက္ကဋ္ဌက သတိပေး ပြောကြားထားပါတယ်။
MK-003
#MeKongNews
#KIO
#ဗိုလ်ချုပ်ကြီးအင်ဘန်လ
#ဗမာလူမျိုးကြီးဝါဒ
