မဲခေါင်၊ ဇွန် ၈
ရှမ်းပြည်နယ်မြောက်ပိုင်း ၊ သီပေါမြို့နယ် နမ့်လန်မြို့မှာ စစ်ကောင်စီတပ်သားတွေက ဇွန်လ ၇ ရက်နေ့ မနက်ပိုင်းမှာ မြို့ထဲဝင်လာပြီး အကြောင်းမဲ့ သေနတ်ပစ်ဖောက်ခဲ့တာကြောင့် စာသင်ကျောင်းနဲ့ ဈေးတွေ ပိတ်လိုက်ရတယ်လို့ ဒေသခံတစ်ဦးက ပြောပါတယ်။
စစ်ကောင်စီ တပ်နယ်မှူး သက်ဦးလွင်ဆိုသူက နမ့်လန်အခြေစိုက် တပ်ရင်းကနေ ကားနဲ့ မြို့ထဲဝင်လာပြီး ကုန်းညောင်ရပ်၊ ငြိမ်းချမ်းရပ်နဲ့ ကောင်းလန်းရပ်တွေနဲ့ သေနတ်ပစ်ဖောက်သွားလို့ ဒေသခံတွေ စိုးရိမ်နေတယ်လို့ ဆိုပါတယ်။
“အဲ့အချိန်က ကျွန်တော်က မြို့ထဲမှာ မရှိဘူး ။ အပြင်ရောက်နေတာ ပြန်ရောက်တော့ ကလေးတွေလည်းကျောင်းကနေ ပြန်ရောက်နေတယ်။ ဆိုင်တွေကလည်းပိတ်၊ အိမ်တွေကလည်း တံခါးတွေပိတ်ထားတယ်ဆိုတော့ ဘာများဖြစ်တာလဲလို့ မိန်းမကို မေးတော့ မနက်က တပ်ရင်းမှူး သက်လွင်ဦးဆိုတဲ့ကောင်က မြို့ထဲကို ကားနဲ့ ဝင်လာပြီး ကားပေါ်ကနေ သေနတ်လိုက်ဖောက်နေလို့ အကုန်လန့်ဖြန့်ပြီး ပိတ်လိုက်ကြတာလို့တော့ ပြောတယ်။ ကျွန်တော်လည်း သေချာမသိဘူး” လို့သူကပြောပါတယ်။
အခုလို အကြောင်းမဲ့ သေနတ်ပစ်ဖောက်တာကြောင့် မြို့ခံတွေက ကြောက်လန့်နေကြပြီး ကလေးငယ်တွေကို ကျောင်းပြန်တတ်ခိုင်းဖို့ စိုးရိမ်နေကြတယ်လို့ သူကပြောပါတယ်။
စစ်တပ်အာဏာသိမ်းပြီးနောက်ပိုင်း နမ့်လန်မြို့မှာ ရာဇဝတ်ဂိုဏ်းတွေပေါများလာပြီး အမည်အသိပြည်သူ့စစ်အဖွဲ့တွေလည်း ရောက်လာကာ စကားများရန်ဖြစ် ပစ်ခတ်တတ်ကြတယ်လို့ ဒေသခံတစ်ဦးကပြောပါတယ်။
ဒါ့အပြင် စစ်ကောင်စီက မြို့ခံ ပြည်သူတွေနဲ့ အဖွဲ့အစည်းတွေကို သတင်းမီဒီတွေဆီ သတင်းပေးပို့တာ၊ ဖြေကြားတာတွေ မပြုလုပ်ဖို့ ပြောဆိုထားပြီး သတင်းတွေ ပို့ခဲ့ရင် ဖမ်းဆီးအရေးယူမယ်ဆိုပြီး ခြိမ်းခြောက်ထားတယ်လို့ အမည်မဖော်လိုသူ ဒေသခံတစ်ဦးကပြောပါတယ်
MK-007
#MeKongNews
#နမ့်လန်မြို့
#စစ်ကောင်စီ
#သေနတ်ဖောက်
