မဲခေါင် ၊ ဇွန် ၄
ကရင်နီပြည်နယ်အတွင်း စစ်ကောင်စီတပ်တွေဟာ စစ်ပွဲနဲ့မသက်ဆိုင်ပဲ အားအနည်းဆုံးဖြစ်နေတဲ့ စစ်ဘေးရှောင်စခန်းတွေနဲ့ လူထုတွေနေထိုင်တဲ့ ကျေးရွာတွေ ကလေးသူငယ်တွေကို ဦးတည်ပြီး တိုက်ခိုက်ဖျက်ဆီးဖို့ အမိန့်ပေးစေခိုင်းလာတယ်လို့ ကရင်နီ လူအခွင့်အရေး အဖွဲ့-KnHRG က ပြောပါတယ်။
စစ်ကောင်စီတပ်တွေဟာ အခုနောက်ပိုင်းမှာ လူထုကို ပိုပြီး ဦးတည်တိုက်ခိုက်လာတာကို တွေ့ရပြီး စစ်ရေးပစ်မှတ်နဲ့ မသက်ဆိုင်တဲ့ နေရာတွေကို လက်နက်ကြီးတွေ တိုက်လေယာဉ်တွေနဲ့ ဗုံးကြဲတိုက်ခိုက်တာတွေ ပိုပြုလုပ်လာတယ်လို့ KnHRG ပြောပါတယ်။
“အခုနောက်ပိုင်းကတော့ ပိုဆိုးတာက လူအများစုဝေးနေတဲ့ရော သို့တည်းမဟုတ် အထူးသဖြင့် ဆေးရုံ ဆေးခန်းတွေကို ဦးစားပေးတိုက်ခိုက်ဖို့ စစ်ကောင်စီက ပစ်မှတ်ထားတယ် စစ်ကောင်စီက အမိန့်ပေးထားတယ်ဆိုတာ ကျွန်တော်တို့ ကြားသိရတာရှိပါတယ်” လို့ KnHRG အဖွဲ့တည်ထောင်သူ ကိုဗညားကပြောပါတယ်။
စစ်ကောင်စီက အဲ့လိုတိုက်ခိုက်ဖို့ အမိန့်ပေးထားတယ်ဆိုတာ သူတို့ရဲ့ လုပ်ရပ်ကို ကြည့်ပြီး အလွယ်တကူသိနိုင်သလို့ အဲ့လိုတိုက်ခိုက်ဖို့ အမိန့်ပေးတဲ့ အချက်အလက်တွေကိုလည်း KnHRG အနေနဲ့ ရရှိထားတယ်လို့ သူကပြောပါတယ်။
စစ်ကောင်စီတပ်ဟာ ယခု ၂၀၂၃ ခုနှစ်အတွင်း ကရင်နီတပ်ပေါင်းစုတွေနဲ့ တိုက်ပွဲဖြစ်ပွားရာမှာ စစ်ရေးပစ်မှတ်မဟုတ်တဲ့ ဆောင်းဖွေးဆေးရုံ ၊ ဒေါတမကြီးဆေးရုံ အပါအဝင် ကျေးလက်ဆေးပေးခန်းတွေကို တိုက်လေယာဉ်တွေနဲ့ အကြိမ်ကြိမ် ဗုံးကြဲတိုက်ခိုက်ဖျက်ဆီးခဲ့ပါတယ်။
ဒါ့အပြင် စစ်ကောင်စီက စစ်ဘေးရှောင်စခန်းနဲ့ ဆေးရုံ ဆေးခန်းတွေကို ဗုံးကြဲတိုက်ခိုက်တာဟာ တမင်သက်သက် ရည်ရွယ်ချက်ချက်ရှိရှိနဲ့ တိုက်ခိုက်တာဖြစ်လို့ စစ်ပွဲနဲ့ မသက်ဆိုင်တဲ့ စစ်ဘေးရှောင်ပြည်သူတွေ ကလေးသူငယ်တွေ ထိခိုက်သေဆုံးမှု များလာတယ်လို့လည်း ကိုဗညားက ပြောပါတယ်။
“စစ်ဘေးရှောင်မှာ အများဆုံးက ကလေးနဲ့ အမျိုးသမီးက အများဆုံး ၇၅ ရာခိုင်နှုန်းဖြစ်တယ်။ ဒါကြောင့် IDP စခန်းတွေကို ပစ်မှတ်ထားတိုက်ခိုက်ခြင်း စစ်ဘေးရှောင်စခန်းတွေကို တိုက်ခိုက်သိမ်းပိုင်ခြင်းဟာ အမျိုးသမီးနဲ့ကလေးတွေကို ပစ်မှတ်တိုက်ခိုက်ဖို့အတွက် သွယ်ဝိုက်သောအားဖြင့်အမိန့်ပေးတယ်လို့ ကျွန်တော်တို့ သတ်မှတ်လို့ရပါတယ်” လို့ KnHRG အဖွဲ့တည်ထောင်သူ ကိုဗညားက ပြောပါတယ်။
စစ်ကောင်စီက အဲ့ဒီလို ပစ်မှတ်ထားတိုက်ခိုက်လို့ KnHRG ရဲ့ မှတ်တမ်းအရ ၂၀၂၃ ခုနှစ် ပထမ သုံးလမှာတင် အရပ်သား နဲ့ ကလေးသူငယ်တွေ ၃၀ နီးပါး သေဆုံးခဲ့ရပြီး မြေပြင်မှာ အဲ့ဒီအရေအတွက်ထက်ပိုများနိုင်တယ်လို့လည်း သူကပြောပါတယ်။
“ဒီအရေအတွက် စစ်ကောင်စီက သတ်ဖြတ်သွားတဲ့ အစုလိုက် အပြုံလိုက်သတ်တာမပါသေးဘူး။ ပြီးတော့ ကောက်ထားတဲ့စာရင်းကလည်း ဒီဖယ်ခုံမြို့နယ်အတွင်းစည်းအထိပဲပါတယ်” လို့ သူကပြောပါတယ်။
စစ်ကောင်စီက စစ်ဘေးရှောင်စခန်းတွေကိုသာမက ဆေးရုံ ဆေးခန်းတွေကိုပါ တိုက်ခိုက်နေတာတွေဟာ ဆေးရုံ ဆေးခန်းတွေမှာ ဆေးကုနေတဲ့သူ ဖျားနာနေတဲ့သူတွေက စစ်ဘေးရှောင်နေရတဲ့သူတွေ ကလေးတွေအများဆုံးဖြစ်နေတာကြောင့်ဖြစ်ပါတယ်။
“အဲ့ဒီလို တိုက်ခိုက်ခြင်းဟာ ဆေးရုံ ဆေးခန်းကို တိုက်တာဟာ ကလေးသူငယ်တွေကို ပိုခိုက်တာနဲ့တူတူပဲ ဒါကြောင့် အခုနောက်ပိုင်းမှာ ကလေးသူငယ်တွေပါ သေဆုံးတာများလာတယ်” လို့ ကိုဗညားကပြောပါတယ်။
စစ်ကောင်စီရဲ့ တိုက်ခိုက်မှုကြောင့် ကရင်နီပြည်နယ်အတွင်း ပြီးခဲ့တဲ့ မေလ ၂၇ ရက်နဲ့ ၂၉ ရက်မှာ ကလေးငယ် ၂ ဦးသေဆုံးပြီး ၂ ဦး ဒဏ်ရာရရှိခဲ့ပါတယ်။
ဒါကြောင့် စစ်ကောင်စီက စစ်ဘေးရှောင်ပြည်သူနဲ့ ကလေးငယ်တွေကို ရည်ရွယ်ချက်ရှိရှိ ပစ်မှတ်ထားတိုက်ခိုက်တာတွေ လူထုတွေကို လိုက်ခံတိုက်ခိုက်နေတာတွေဟာ စစ်ရာဇဝတ်မှုအပြင် လူသားမျိုးနွယ်အပေါ် ကျူးလွန်တဲ့ ရာဇဝတ်မှုလည်းဖြစ်တယ်လို့ ကရင်နီ လူ့အခွင့်အရေးအဖွဲ့ KnHRG က ပြောပါတယ်။
CJ-002
#MeKongNews
#KnHRG
#စစ်ကောင်စီတပ်
#စစ်ရှောင်စခန်း