မဲခေါင်၊ ဇန်နဝါရီ ၁၃
NLD အစိုးရ စီးပွားရေးအကြံပေး ဩစတြေးလျနိုင်ငံသား မစ္စတာ ရှောင်တာနယ်ကို စစ်ကောင်စီက လွတ်ငြိမ်းခွင့်ပြန်လည် ရုပ်သိမ်းလိုက်ပြီး နိုင်ငံတကာရဲတပ်ဖွဲ့ အင်တာပိုဆီ ရာဇဝတ်သားအဖြစ် တိုင်ကြားထားနိုင်တဲ့အတွက် အာရှဒေသခရီးတွေမှာ စွန့်စားရတဲ့အန္တရာယ်မျိုးရှိနေတယ်လို့ မစ္စတာရှောင်တာနယ်က ထုတ်ဖော်ပြောလာပါတယ်။
ရှောင်တာနယ်ကို လူသားချင်းစာနာထောက်ထားမှုနဲ့ နှစ်နိုင်ငံဆက်ဆံရေးကောင်းဖို့အလိုငှာ လွတ်ငြိမ်းခွင့်ပေးခဲ့တာဖြစ်တယ်လို့ စစ်ကောင်စီက ကြေညာပြီး ထောင်ကလွတ်လွတ်ချင်း မိခင်နိုင်ငံကို ပြန်ပို့လိုက်တာပဲဖြစ်ပါတယ်။
ဒါပေမဲ့ အကျဉ်းသားတွေအဖြစ် တွေ့ခဲ့ရစဉ်က ဒေါ်အောင်ဆန်းစုကြည်က သူ့ကို တစ်ကမ္ဘာလုံးအမှန်တရား သိစေဖို့ ကြိုးစားပေးပါလို့ အမှာပါးလိုက်တဲ့အတိုင်း ရှောင်တာနယ်ဟာ သူ့ရဲ့ လူမှုကွန်ယက်စာမျက်နှာမှတဆင့်၊ ကမ္ဘာ့သတင်းမီဒီယာတွေက တစ်ဖုံ စစ်ကောင်စီရဲ့ လူ့အခွင့်အရေးချိုးဖောက်မှု၊ ထောင်တွင်း တရားလက်လွှတ်ပြုမှုနှိပ်စက်မှု၊ မြန်မာ့စီးပွားရေးပျက်ဆီးခဲ့မှုတွေကို ကမ္ဘာသိပြောဆိုခဲ့ပါတယ်။
ဒါကြောင့် စစ်ကောင်စီက လွတ်ငြိမ်းခွင့်ကို ပြန်ရုပ်သိမ်းကြောင်းနဲ့ နောက်ထပ် ထပ်ပြီးသတင်းအမှားတွေ ကို ထပ်ဖြန့်နေမယ်ဆို လက်ကျန်ပြစ်ဒဏ်ကျခံရုံသာမက ပြစ်ဒဏ်စီရင်ချက်အသစ်တွေနဲ့ပါ အရေးယူသွားမှာ ဖြစ်ကြောင်း တရားဝင်မဟုတ်တဲ့ သွယ်ဝိုက်ထုတ်ပြန်မှုတွေကို လုပ်ဆောင်ခဲ့ပါတယ်။
စစ်ကောင်စီက တရားဝင်ထုတ်ပြန်တာမဟုတ်ဘဲ လူမှုကွန်ရက်တွေပေါ်ကတစ်ဆင့် ဒီဇင်ဘာ ၆ ရက်နေ့မှာ ဖြန့်လိုက်တာဖြစ်ပေမယ့် မစ္စတာရှောင်တာနယ်က “ဒီကြေညာချက်က ဟန်ပြမဟုတ်ဘူး။ သူတို့ ကျွန်တော့် လွတ်ငြိမ်းခွင့်ကို ပြန်ရုပ်သိမ်းပြီးပြီ။ နိုင်ငံတကာရဲတပ်ဖွဲ့ကို ဖမ်းဖို့ တောင်းဆိုထားပြီးလောက်ပြီ။ (ဩစတြေးလျဟာမြန်မာနဲ့ တရားခံလွှဲပြောင်းရေး စာချုပ် မချုပ်ထား) ဒါကြောင့် အာရှဒေသတွေကို ကျွန်တော်သွားတာဟာ စွန့်စားရင်းနှီးမှုဖြစ်နေတယ်” လို့ ဗီအိုအေမှာ ပြောသွားခဲ့တယ်။
Ref: VOA
MKF-001