မဲခေါင်၊ မတ် ၁
ပြီးခဲ့တဲ့ ၂ လ အတွင်း အာဏာသိမ်း စစ်ကောင်စီက ကျန်းမာရေးဝန်ထမ်းတွေ အပါအဝင် တခြား အကြမ်းဖက် သတ်ဖြတ်ခဲ့မှုတွေကို အမျိုးသား ညီညွတ်ရေး အစိုးရ-NUG က ဒီကနေ့ ထုတ်ပြန်လိုက်ပါတယ်။
NUG ရဲ့ထုတ်ပြန်ချက်အရ ပြီးခဲ့တဲ့ ဇန်နဝါရီလ ၁၀ ရက်နဲ့ ၁၁ ရက်နေ့တွေမှာ ချင်းအမျိုးသားတပ်ဦး-CNF ဌာနချုပ် Camp Victoria စခန်းကို စစ်ကောင်စီ လေကြောင်း တိုက်ခိုက်ခဲ့လို့ CNF ရဲဘော် ၃ ဦး၊ ရဲမေ ၂ ဦး ကျဆုံးခဲ့ပြီး ပြင်ပလူနာကုသဆောင်၊ ဆေး စတိုနဲ့ လူနေအိမ်တွေ ထိခိုက်ပျက်စီး ခဲ့ရတယ်လို့ ဆိုပါတယ်။
ဇန်နဝါရီ ၂၁ ရက်ကလည်း မကွေးတိုင်း၊ မြိုင်မြို့နယ်၊ ဗဟင်းတိုက်နယ် ဆေးရုံကို စစ်တပ်က ရဟတ်ယာဉ်နဲ့ ပစ်ခတ်တိုက်ခိုက်ခဲ့ရာ ဆေးရုံဝန်ထမ်းတွေနဲ့ လူနာတွေ ရှောင်တိမ်းနိုင်ခဲ့ပေမဲ့ ဆေးရုံ အနီးမှာ နေထိုင်တဲ့ ၆၂ နှစ်အရွယ် ဒေါ်ကြည် ကျည်ထိမှန် သေဆုံးခဲ့ပြီး ဆေးရုံရှိ ဓာတ်မှန်စက် အပါအဝင် ဆေးရုံနံရံနဲ့ အဆောက်အအုံတွေ ထိခိုက်ပျက်စီးခဲ့ရတယ်လို့ သိရပါတယ်။
ဒါ့အပြင် ဖေဖော်ဝါရီ ၁၉ ရက်က စစ်ကိုင်းတိုင်း၊ နွယ်အင်းကျေးရွာကို စစ်ကောင်တပ်တွေ စစ်ကြောင်းထိုး ဝင်ရောက်ပြီး ကျေးလက်ကျန်းမာရေးဌာနခွဲ ဆေးခန်း တစ်ခုတည်းကိုသာ ရည်ရွယ်ချက်ရှိရှိ မီးရှို့သွားခဲ့တယ်လို့ NUG က ဆိုပါတယ်။
အရာတော်မြို့နယ်က မင်းရွာ၊ မလဲသာရွာနဲ့ ကန်ရင်းရွာတို့ကို စစ်ကောင်စီတပ်က ဖေဖော်ဝါရီ ၂၁ ရက်ကနေ ၂၅ ရက်အတွင်း မီးရှို့ဖျက်ဆီးခဲ့သလို အထက်တန်းကျောင်းနဲ့ ဆေးရုံကို ရဟတ်ယာဉ်နဲ့ ပစ်ခတ်ခဲ့ပြီး ဆေးနဲ့ ဆေးပစ္စည်းတွေကို စစ်ကောင်စီတပ်သားတွေ ဖျက်ဆီးသွားတယ်လို့ သိရပါတယ်။
ဇန်နဝါရီ ၂၉ ရက်နေ့ကလည်း တောထဲမှာ မွေးလူနာ ကိုကုသပေးပြီး အုတ်ဖိုမြို့ကို ပြန်လာတဲ့ CDM သူနာပြု ဆရာမ ဒေါ်မေဇွန်မိုး ဟာ PDF ရဲဘော် ၂ ဦးနဲ့အတူ အုတ်ဖိုမြို့နယ်၊ အေးမြသာယာအုပ်စု၊ ကျောက်ဖြူတောင်ကျေးရွာ အနီးက စစ်ကောင်စီ စစ်ဆေးရေးဂိတ်မှာ ဖမ်းဆီးခံခဲ့ရပါတယ်။
အဲဒီ ဖြစ်စဉ်မှာ PDF ရဲဘော် ၂ ဦးကို စစ်ကောင်စီက ဖမ်းမိစဉ် တစ်ခါတည်း ပစ်သတ်ခဲ့ပြီး ဆရာမ ဒေါ်မေဇွန်မိုး ထွက်ပြေးပေမဲ့ စစ်တပ်က ပြန်မိသွားပြီး စစ်ကြောရေးမှာ နှိပ်စက်ခံခဲ့ကာ ဖော်ဖော်ဝါရီ ၁၆ ရက်နေ့မှာတော့ ထန်းပင်ကုန်းကျေးရွာအနီးမှာ စစ်ကောင်စီတပ်သားတွေ မုဒိမ်းကျင့် သတ်ဖြတ်ခဲ့တယ်လို့ NUG ကဆိုပါတယ်။
အဆိုပါနေ့မှာပဲ ဖလမ်းပြည်သူ့ဆေးရုံက CDM အထက်တန်း သူနာပြုဆရာမ ဒေါ်သဲသဲဝင်းဟာ ဇာတိ ကသာမြို့နယ်၊ မိုးဒါးကြီးကျေးရွာမှာ နေထိုင်စဉ် စစ်ကြောင်းထိုးလာတဲ့ စစ်တပ်က ဖမ်းဆီးပြီး ဖေဖော်ဝါရီ ၂၁ ရက်နေ့က သတ်ဖြတ်ခဲ့တယ်လို့ NUG ရဲ့ ထုတ်ပြန်ချက်မှာ ဖော်ပြထားပါတယ်။
အမျိုးသား ညီညွတ်ရေး အစိုးရရဲ့ ထုတ်ပြန်ချက်အရ စစ်ကောင်စီဟာ အာဏာသိမ်းကာလ ၂ နှစ်ကျော်အတွင်း ကျန်းမာရေးဝန်ထမ်း ၇၀ ကျော်ကို သတ်ဖြတ်ခဲ့ပြီး ၇၈၀ ကျော် ထိခိုက်ဒဏ်ရာရကာ ကျန်းမာရေးဝန်ထမ်း ၉၀၀ ကျော်ကို ဖမ်းဆီးထားကာ နိုင်ငံအနှံ့က ဆေးရုံ၊ ဆေးခန်း ၁၆၀ ကျော်ကို ဖျက်ဆီးခဲ့တယ်လို့ ဆိုပါတယ်။
အခုလို စစ်တပ်က ကျန်းမာရေး ဝန်ထမ်းတွေကို ပစ်မှတ်ထား တိုက်ခိုက်နေတာဟာ ဂျီနီဗာ ကွန်ဗန်းရှင်းကို ချိုးဖောက်နေသလို ကုလသမဂ္ဂ လုံခြုံရေးကောင်စီ ဆုံးဖြတ်ချက်တွေ၊ နိုင်ငံတကာနဲ့ ပြည်တွင်း ဥပဒေတွေကိုပါ ပြောင်ပြောင်တင်းတင်း ချိုးဖောက်နေတာ ဖြစ်တာကြောင့် NUG ကျန်းမာရေးဝန်ကြီးဌာနက ပြင်းပြင်းထန်ထန် ရှုံ့ချပြီး နိုင်ငံတကာ အနေနဲ့ အမြန်ဆုံး ထိရောက်စွာ တားဆီးပေးဖို့ လိုအပ်တယ်လို့ ဆိုပါတယ်။
အာဏာသိမ်းစစ်တပ်ကြောင့် ကျဆုံးခဲ့ရတဲ့ ကျန်းမာရေးလုပ်သား၊ တော်လှန်ရေး ရဲဘော်၊အြ ပစ်မဲ့ ပြည်သူတွေရဲ့ မိသားစုတွေနဲ့ ထပ်တူ ဝမ်းနည်းကြောင်းနဲ့ ကျဆုံးခဲ့ရမှုတွေကို တရာမျှတမှု ပြန်ရအောင် လုပ်ပေးမယ်လို့ NUG ကပြောပါတယ်။
MK-007