မဲခေါင်၊ ဖေဖော်ဝါရီ ၉
ရှမ်းပြည်နယ်ကို အတက်အဆင်း ကုန်သယ်နေတဲ့ ကုန်တင်ယာဉ်တွေဟာ ဆီစျေးတွေ တက်လာတဲ့အပြင် စစ်ဆေးရေးဂိတ်တွေမှာ ကြာမြင့်စွာ စောင့်ဆိုင်း စစ်ဆေးခံရတာကြောင့် ယာယီရပ်နားထားရတယ်လို့ ကုန်တင်ယာဉ်မောင်းအချို့ထံက သိရပါတယ်။
နှစ်စပိုင်းဖြစ်တဲ့ ဇန်နဝါရီလ အစပိုင်းတုန်းက စက်သုံးဆီ ဈေးတစ်လီတာကို ၂၀၀၀ အောက်သာ ရှိခဲ့ပေမယ့် ဖေဖော်ဝါရီလအစကနေ ဆီဈေး တစ်လီတာကို ၂၄၀၀ကျော်အထိ ပြန်လည်မြင့်တက်ခဲ့တယ်လို့ ယာဉ်မောင်းတစ်ဦးက ပြောပါတယ်။
“ကုန်ကားသမားတွေ ဖြစ်တဲ့အတွက်ဆီဈေးနဲ့ကိုက်မှ ကားထွက်လို့ရမှာ စစ်ဆေးရေးဂိတ်တွေမှာက တဖြည်းဖြည်းချင်း တိုးနေရတော့ ဆီပိုကုန်တယ်၊ တစ်ချိူ့ကုန်ကားသမားတွေဆို ရပ်ထားလိုက်ကြတယ်”လို့ ကုန်တင်ယာဉ်မောင်းတစ်ဦးက ဆိုပါတယ်။
ဆီဈေးမြင့်တက်နေတဲ့အပြင် စစ်ဆေးရေးဂိတ်တွေက စစ်ဆေးချိန်ကြာမြင့်ရုံမျှမက ငွေတောင်း ကြမ်းတာတွေကြောင့် ခရီးသည်တင်ယာဉ်လိုင်းတွေတောင် ယာဥ်စီးရေ လျော့ချပြေးဆွဲနေရပြီး တချို့မှာရပ်နားမှုတွေ ရှိခဲ့ပါတယ်။
သြဂုတ်လကစတင်ပြီး ဗဟိုဘဏ်က ဒေါ်လာနှုန်းထား ၂၁၀၀ ကျပ် သတ်မှတ်ခဲ့ပြီး နောက်မှာ စက်သုံးဆီ 92 တစ်လီတာကို ၂၀၀၀ ကျော်အထိရှိခဲ့တာကနေ အခုထပ်ပြီး တစ်လီတာ၂၄၀၀ ကျပ် နီးပါး စျေးမြင့်တက်လာဖြစ်ပါတယ်။
ဆီစျေးက နေ့စဉ် အတက်အကျ အလှုပ်အယမ်းများပြီး ဒီကနေ့မှာတော့ အနည်းငယ် ပြန်လည်ကျဆင်းလာပြန်တယ်လို့ သိရပါတယ်။
ဖေဖော်ဝါရီလ ၉ရက် ရည်ညွှန်းဈေးအရ ရန်ကုန်မှာ စက်သုံးဆီဈေး 92 တစ်လီတာ ၂၁၉၅၊95တစ်လီတာ၂၂၅၅၊ ဒီဇယ်တစ်လီတာ၂၂၅၀ ဖြစ်ပြီး မန္တလေးနဲ့နေပြည်တော်မှာတော့ 92 တစ်လီတာ၂၂၄၀ကျော်၊ ရှမ်းပြည်နယ်မှာ 92 တစ်လီတာ ၂၂၈၀ကျပ် ဝန်းကျင်မှာ ရှိနေပါတယ်။
ဆီစျေးမြင့်တက်တာကြောင့် ကုန်စိမ်းသယ်ယူခတွေက အစမြင့်တက်လာပြီး အရင်က တစ်ပိဿာလျင် ၁၀၀ ကျပ်အောက်သာ သယ်ယူခရှိရာခနေ အခု ၁၅၀ ကျော်အထိ ပေးနေရတယ်လို့ သီရိမင်္ဂလာဈေးရှိ ရှမ်းကုန်စိမ်း လက်ကားဒိုင်က တစ်ဦးက ပြောပါတယ်။
“ ရှမ်းကုန်အပါအဝင်၊ နယ်ဝေးဘက်ကကုန်တွေဆို ရာသီချိန်ကုန်လို့ အဝင်နည်းတာရယ်၊ လမ်းခရီးမှာ ကြန့်ကြာ နေတော့ ပစ္စည်းပြတ်လပ်ပြီး ဈေးတက်တယ်” လို့ သူက ဆိုပါတယ်။
သယ်ယူပို့ဆောင်စရိတ်တွေ မြင့်တက်လာတာကြောင့် အခြေခံစားသောက်ကုန်တွေပါ ဈေးမြင့်တက် လာကာ ပြည်သူတွေ စားဝတ်နေရေး အကြပ်အတည်းတွေနဲ့ ထပ်မံရင်ဆိုင်နေရတယ်လို့လည်း သိရပါတယ်။
ပြီးခဲ့တဲ့ အရပ်သားအစိုးရလက်ထက်မှာတော့ စက်သုံးဆီစျေးဟာ တစ်လီတာကို အမြင့်ဆုံး ၆၅၀ ကျပ်ထိသာ ရောက်ခဲ့ဖူးသလို အနိမ့်ဆုံး ၂၀၀ ကျော်အထိ ဆင်းခဲ့ဖူးပါတယ်။
#MeKongNews
#စက်သုံးဆီ
#ရှမ်းပြည်
MK – 006