မဲခေါင်၊ ဧပြီ ၁
ရှမ်းပြည်နယ်ရဲ့ အဓိက ထွက်ကုန်ထဲမှာပါတဲ့ ကြက်သွန်ဖြူစျေးကွက်မှာ တက်စျေးရနေတယ်လို့ အောင်ပန်းကြက်သွန်ဖြူပွဲရုံ စျေးကွက်မှ သိရပါတယ်။
ရှမ်းပြည်ထွက်ကုန်မှာ တည်ငြိမ်ပြီး အထားခံတဲ့ ကုန် ၂မျိုးမှာ ဂျင်းအပြင် ကြက်သွန်ဖြူက တစ်ပြည်လုံးရဲ့ ၅၀ ရာခိုင်နှုန်းထွက်ရှိပြီး ယခုနှစ်သင်္ကြန်ရှေ့မှာ အနည်းငယ်တက်စျေးကောင်းနေပေမယ့် သင်္ကြန်နောက်ပိုင်း စျေးကသာ တစ်နှစ်လုံးအတွက် ခန့်မှန်းရနိုင်မယ်လို့ အောင်ပန်းကုန်စိမ်းပွဲရုံပိုင်ရှင် ဦးမောင်မောင်က မဲခေါင်ကို ပြောပါတယ်။
“ခုက သင်္ကြန်တွင်း လိုအပ်ချက်အရ ဝယ်တဲ့ပေါက်စျေးပေါ့၊ နှစ်တိုင်း သင်္ကြန်ပြီး ပေါက်တဲ့စျေးကို ကြည့်ပြီးမှသာ တကယ့် တက်စျေး၊ ကျစျေးပြောနိုင်မှာဖြစ်တယ်၊ ဒီနှစ်မှာ ပြည်ပဝယ်လက်မရှိပေမယ့် ကြူကုတ်အဝင်နည်းတာလဲ ပါတယ်၊ ဒါပေမယ့် ကြူကုတ်ကို ဒီက သိပ်မကြိုက်ကြဘူး၊ ကြက်သွန်ဖြူစျေး အပြောင်းအလဲရှိနှိုင်တယ်၊ သင်္ကြန်အပြီး အခြေအနေကောင်းရင် ဒီနှစ်အတွက် ကောင်းပြီပဲ၊ ဘုရင့်နောင်ကုန်စည်ဒိုင် အတက်အကျအပေါ်မှာလည်း မူတည်နေနိုင်တယ်” လို့ရှင်းပြပါတယ်။
ဖေဖော်ဝါရီလအတွင်းကစျေးထက် မတ်လကုန်မှာ တစ်ပိဿာကို ကျပ် ၁၀၀၀ ကျော်တက်လာတာဖြစ်လို့ တောင်သူတွေ အတွက် လတ်တလော စျေးကောင်းရနေတာလို့ ပြောပါတယ်။
“စျေးတက်တယ်ဆိုပေမယ့် မျိုးစေ့က တစ်ပိဿာ ၁၅၀၀၀ နဲ့ စိုက်ထားရတာ၊ သွင်းအားစု၊ လုပ်သားခနဲ့ အရင်းကြေလောက်ပဲရှိပါသေးတယ်၊ ပွဲရုံဝယ်စျေး ၁၅၀၀၀၀ လောက်ရမှ တောင်သူ ကိုက်နိုင်ချေရှိလာမှာ” လို့ အောင်ပန်းကြက်သွန်စိုက် တောင်သူတစ်ဦးဖြစ်သူ ဦးအောင်ဌေးက ပြောပါတယ်။
လက်ရှိအောင်ပန်းစျေးကွက်မှာ ကြက်သွန်ဖြူကို စျေးကွက်အရ မျိုးခြားဆိုဒ်၊ လတ်ခြားဆိုဒ်၊ ထူး၁ က ထူး၅ ၊ ထူးလွန်ဆိုဒ်၊ အရော၊ ဥ တစ်လုံး၊ ကြူကုတ် အမည်များခေါ်ဝေါ်ကာ မတ်လ ၃၁ ရက် အောင်ပန်းပွဲရုံဝယ်စျေးမှာ ၄၅၀၀ ကျပ်မှ ၁၀၅၀၀ ကျပ်အထိ ရှိနေပြီး ရောင်းစျေးမှာ ၅၇၀၀ ကျပ်မှ ၁၅၀၀၀ ကျပ်အထိရှိနေတယ်လို့အောင်ပန်းကုန်စိမ်းပွဲရုံရဲ့ စျေးနှုန်းဖော်ပြချက်တွေအရ သိရပါတယ်။
ကြူကုတ်ကြက်သွန်ဖြူမှာ အလုံးကြီးပြီး ခွာရလွယ်သော်လည်း အနံ့မှာ မြန်မာမျိုးရင်းကို မမီဲတဲ့အတွက် ၁၀ ဦးမှာ ရဦးခန့်က မကြိုက်ကြဘဲ ၃ ဦးခန့်ကသာ ဆိုင်အတွက် သုံးကြတာလို့ပြောပါတယ်။
ပြည်တွင်းစျေးကွက်မှာ ရှမ်းတောင်ထွက် ကြက်သွန်ဖြူက အကောင်းဆုံးဖြစ်ပြီး ရှမ်းမြောက်၊ ရှမ်းအရှေ့တွေက နောက်ကလိုက်တယ်လို့ဆိုပါတယ်။
ကြက်သွန်ဖြူကို မီးဖိုချောင်သုံး၊ ဆိုင်သုံး၊ နေကြာစေ့လှော်လုပ်ငန်း၊ တိုင်းရင်းပရဆေးလုပ်ငန်းမှာနဲ့ အဓိက လက်ဘက်လုပ်ငန်းမှာ အများအပြားသုံးစွဲကြပါတယ်။
ရှုးရှဲလက်ဘက်လုပ်ရာမှာ ကြက်သွန်ဖြူနဲ့ရောနှယ်ပြီး အစပ်အရသာကောင်းအောင်လုပ်ကြတာမှာ အဓိက အောင်ပန်းကြက်သွန်ဖြူကို အများအပြားသုံးစွဲကြတယ်လို့ ဆိုပါတယ်။ ခရမ်းစွဲ ကြက်သွန်ဖြူကိုတော့ အဓိက တိုင်းရင်းဆေးထုပ်လုပ်ရာမှာ သုံးစွဲတယ်လို့ သိရပါတယ်။
ကြက်သွန်ဖြူဟာ နှစ်ပေါက် အထားခံလို့နဲ့ စျေးကွက်ငြိမ်တာ များလို့ ရှမ်းတောင်သူတွေအနေနဲ့ ကြက်သွန်ဖြူကို အဓိကသီးနှံအဖြစ် စိုက်သင့်တယ်လို့ အောင်ပန်းပွဲရုံစျေးကွက်က သိရပါတယ်။
MK-012